ءسان

2824
Adyrna.kz Telegram

تاڭعا جۋىق زار ەتتى تەلەفونىم. «ە، اللام، تىنىشتىق بولعاي» دەپ-اق كوتەرىپ ەم، بولمادى. «تەز جەتشى. ءامينادان ايىرىلىپ قالدىق» دەپ جىلادى ار جاقتا بىرەۋ. استانادامىن. الىستامىن. جارىعىم-اي، قىرشىننان قيىلىپ كەتكەنىڭ-اي! كەپپەگەن كوزىمنىڭ جاسى-اي...
بەۋ-بەۋلەتىپ جەتتىك الماتىعا. ءتۇس اۋىپ كەتكەن كەز بولاتىن. قارالى ءۇي. زارلى ءۇي. اڭىراپ مەن دە كىرە بەردىم. ءسىڭىلىم مەنى قۇشاعىنا باسىپ ۇلگەرمەي، وتىرعان جەرىندە سۇلق ءتۇستى. دۇرلىگىپ كەتتىك ءبارىمىز. سۋ شاشىپ، جالىنىپ ءجۇرىپ وياتىپ الدىق...
– بالاپانىم-اۋ، «ولەمىن» دەپ كەتىپ پە ەڭ؟ بىلمەي دە قالدىق قوي... سۇپ-سۇلۋ بوپ، قاسى-كوزىڭدى بوياپ، قول بۇلعاپ كەتە بەرگەنىڭ-اي! اڭىراپ سوڭىڭدا قالعانىم-اي... – دەپ جاتىر مىنە قايتا كوزىن اشىسىمەن.
مەكتەپ بىتىرگەنىنە ون جىل بولعان. سىنىپتاستارمەن كەزدەسۋ. اپات. جەتە الماپتى. جازمىش-اي! كورەر جارىعىنىڭ ەرتە تاۋسىلعانى-اي!..
– تۋعاندا ءوزىڭ شومىلدىرىپ، تىرناق، شاشىن ءبىرىنشى بوپ الىپ ەڭ، اقتىق ساپارعا دا ءوزىڭ جۋىندىرىپ شىعارىپ سال.
مۇندايدى ەستىرتىپ كەتە بارعانىڭ-اي، مىنا ماعان... قارلىعامنان ءۇش جاسىڭ كەم. ۇزاتىپ، تويىڭدا كيىت كيگەنىم ءجون ەمەس پە ەدى؟ وكسىگىمدى باسا الماي، قان قىسىمىم سەكىرىپ تۇرسا دا، كىردىم سەن جاتقان بولمەگە. مۇزداي ەدەندە جاتىر ەكەنسىڭ. قاسىمدا زىليقا جەڭگەڭ دە بار. «سوققى ىشتەن بولعان، تەك ءىش-قۇرىلىسقا زاقىم كەلگەن. كەسۋگە قارسى ەكەنىمىزدى ايتىپ، ءمايىتحانادان ساتىپ الدىق. تانىنە تۇسكەن جاراقات جوق. قورىقپاساڭ بولادى» دەگەنىنە قاراماستان بەتىڭە جابىلعان اق شىتتى بىردەن اشا الماي، ءبىراز وتىردىق جانىڭدا. ءبىر كەزدە ەسىك اشىلىپ، ىشكە كىرگەن گۇلبارشىن:
– مولدا كەلدى. «مايىتتە بوگدە زات قالماسىن. تۋعاندا قالاي كەلسە، سولاي اتتانۋى كەرەك» دەپ ەسكەرتتى دە: – وتىرماڭدار. جۋىندىرعان سوڭ، رۋحى جەڭىلدىك تابادى، – دەپ اسىقتىردى.
اشتىم بەتىڭدى. مولدىرەپ جاتىر ەكەنسىڭ. وتىزعا دا جەتپەدىڭ-اۋ. قاسى-كوزىڭ قيىلىپ. اسەمدىكتى ءسۇيۋشى ەڭ...
– بالام-اي، ءبىزدى بۇعان قالاي عانا قيىپ كەتە باردىڭ؟ مىنا كوزىڭدەگى كىرپىگىڭدى قايتىپ جۇلامىز؟ – دەپ جىلادى وسى كەزدە زىليقا.
سوندا عانا ءمان بەردىم، راسىندا كىرپىك جالعاپ الىپسىڭ.
– ەندى قايتتىق؟ بالكىم باسىن جۋىپ، بەتىنە سۋ تيگىزسەك، ءوزى ءتۇسىپ قالار... – دەپ بولجادىم مەن.
سويتتىك. تۇسپەدى. بىلق ەتكەن دە جوق. تارتىپ كورۋگە جۇرەك تە، قول دا بارمادى. ول عانا ەمەس، اياق-قولدىڭ تىرناعى بويالعان، وسكەن بوپ شىقتى. ەكى كەمپىر نە بىلەمىز؟ قارلىعامدى شاقىردىم. جىلاپ-ەڭىرەپ كىردى بايعۇسىم، سۇيەككە ءتۇسۋى العاش. ونىڭ دا كىرپىگى ۇزىن. تىرناعى دا. قازىرگى جاستىڭ بارىنىكى وسى بولدى عوي.
– بالام، مىنانى قالاي كەتىرەمىز؟ – دەپ سۇرادىم ودان.
سۇپ-سۇر بوپ كەتتى قىزىم.
– سالونعا بارۋ كەرەك. ارنايى سۇيىقتىعى بولادى. بىلاي الا المايمىز، – دەگەن ول ءوز ءسوزىنىڭ ورىنسىز ەكەنىن ءوزى دە بىلگەن سوڭ: – جۇلىپ الۋىمىز كەرەك پە ەندى سوندا؟ – دەپ جىلادى سوڭىندا.
ءبىز دە قوسىلىپ ەگىلدىك وعان. قالاي ويتپەكپىز؟ باستىسى كىم ىستەيدى مۇنى؟ ارى قيپاقتاپ، بەرى قيپاقتاپ، مەن كورمەك بولدىم، نە شارا... بالاپانىم-اۋ، ءولى بولساڭ دا، سەنى مۇندايعا قالاي قيامىن؟ قولىم قالتىراپ، ۇستاعان كىرپىكتى تارتۋعا ءالىم جەتىڭكىرەمەي، قارلىعانىڭ سۇڭقىلداپ جىلاعانى ودان بەتەر جىگەرىمدى ۇرلاپ بارا جاتتى.
– قىسقارت، ەندى، ءيتتىڭ بالاسى! – دەپ زىرك ەتتىم وعان. – نە كەرەگى بار ەدى وسىنىڭ؟ قاراشى جۇرەكتى ەزگەندەرىڭدى؟
جىم بولدى ول. تارتىپ كەپ قالدىم سول كەزدە. ءتىلىپ تۇسكەندەي بولدى جوتامدى بىرەۋ. نە كورگەنىم مەن سەزگەنىمدى ءتىرى جان بىلمەسىن. باسقا بەرمەسىن وزگەنىڭ. وزىممەن الا كەتەيىن.
ەكىنشى كوزى بار ەدى ءالى...
اياعىڭنىڭ تىرناعىن اۋرەلەنىپ جاتىپ وشىردىك. كەتۋى قيىن سيا بوپ شىقتى. كوكەسىندى بىراق، قولىڭا كەلگەندە كوردىك. وزىڭدىكى ەمەس بوپ شىقتى ول دا، سوياۋداي. نە وشىرۋگە، نە كەسۋگە كەلمەدى. قايشى تيگەن سايىن تۇبىمەن قوپارىلا بەردى. امال نەشىك:
– مۇنى دا جۇلۋىمىز كەرەك پە؟ – دەپ سۇرادىم قارلىعادان.
ءوز تىرناعىن ۋىسىنا جاسىرعان قىزىم ءۇنسىز جىلاي بەردى.
– جارىعىم-اۋ، سەنى ءوز قولىممەن ولتىرگەندەي كوڭىلمەن ءومىر سۇرەتىن ەتتىڭ-اۋ مىنا مەنى، – دەپ كوزىمنىڭ جاسىن ەتەگىمە ءسۇرتتىم دە، قايتا قولىڭدى الدىم.

اينالايىندار، ۋاقىت ايتىپ بىتە مە، سۇلۋلىقتىڭ دا ءجونى بار. قيماڭدارشى ارتتا قالعانداردى مۇنداي ازاپقا. ءبارىبىر بارار جاقتا قاجەتى جوق كورىندى جالعاندىقتىڭ.

اۆتور ومىردەرەگى: 

تورعىن جولداسبەكقىزى 17.04.1985 جىلى الماتى وبلىسى، ىلە اۋدانى، اقشي اۋىلىندا دۇنيەگە كەلگەن.

جوعارعى ءبىلىمدى ءال-فارابي اتىنداعى قازاق ۇلتتىق ۋنيۆەرسيتەتىنىڭ فيلولوگيا فاكۋلتەتىندە العان. 2019 جىلى "اراشا" اتتى اڭگىمەلەر جيناعى جارىق كورىپ، سول جىلى لوندون ۇيىمداستىرعان “Open Eurasia” كونكۋرسىنىڭ جەڭىمپازى اتاندى. قازىرگى كۇنى اۆتور Sector X راديوسىندا "شەكسىز مۇمكىندىك" ، "اراشا" اتتى باعدارلامالارىن جۇرگىزەدى.

وزگە اقپارات:
Facebook: تورعىن جولداسبەكقىزى.
Instagram : @torgyn_zholdasbekkyzy
You tube: تورعىن جولداسبەكقىزى
پودكاست: "اراشا"

پىكىرلەر