مەملەكەتتىك كەڭەسشى ەرلان قاريننىڭ توراعالىعىمەن 2026 جىلعى قازاقستان رەسپۋبليكاسىنىڭ اباي اتىنداعى ادەبيەت پەن ونەر سالاسىنداعى مەملەكەتتىك سىيلىعىن بەرۋ جونىندەگى كوميسسيانىڭ العاشقى وتىرىسى ءوتتى، دەپ حابارلايدى "ادىرنا".
جيىن بارىسىندا كوميسسيا مۇشەلەرى ادەبيەت پەن ونەر سالالارى بويىنشا ۇسىنىلعان جۇمىستاردى قاراپ، كونكۋرستىق ىرىكتەۋدىڭ كەلەسى كەزەڭىنە وتەتىن ۇمىتكەرلەردى انىقتادى.
وتىرىستا اباي اتىنداعى مەملەكەتتىك سىيلىققا ۇسىنىلعان 32 جۇمىس تالقىلاندى. بۇل ماراپات ادەبيەت پەن ونەر سالاسىنداعى ۇزدىك تۋىندىلار مەن شىعارماشىلىق جەتىستىكتەردى قولداۋعا باعىتتالعان ەلىمىزدەگى ەڭ بەدەلدى مەملەكەتتىك سىيلىقتاردىڭ ءبىرى بولىپ سانالادى.
كوميسسيا مۇشەلەرى قازاقستان رەسپۋبليكاسى پرەمەر-ءمينيسترىنىڭ ورىنباسارى – مادەنيەت جانە اقپارات ءمينيسترى ايدا بالاەۆانىڭ بايانداماسىن تىڭدادى. مينيستر بيىلعى بايقاۋعا ۇسىنىلعان جۇمىستار تۋرالى اقپارات بەرىپ، ولاردىڭ كونكۋرستىق راسىمدەردەن ءوتۋ بارىسىنا توقتالدى.
كوميسسيا قۇرامىنا ادەبيەت، مادەنيەت جانە ونەر سالاسىنداعى بەلگىلى قوعام جانە شىعارماشىلىق قايراتكەرلەرى ەنگەن. داۋىس بەرۋ ناتيجەسىندە كونكۋرستىق ىرىكتەۋدىڭ كەلەسى كەزەڭىنە وتەتىن ۇمىتكەرلەر انىقتالدى.
ەندى ۇمىتكەرلەردىڭ جۇمىستارى بەلگىلەنگەن تارتىپكە سايكەس جان-جاقتى قارالىپ، ساراپتامادان وتەدى.
ايتا كەتەيىك، اباي اتىنداعى ادەبيەت پەن ونەر سالاسىنداعى مەملەكەتتىك سىيلىق ۇلتتىق مادەنيەتتى دامىتۋعا، قالامگەرلەر مەن ونەر قايراتكەرلەرىنىڭ ەڭبەگىن قولداۋعا جانە قوعامداعى شىعارماشىلىق قۇندىلىقتاردى دارىپتەۋگە باعىتتالعان. بۇل ماراپات شىعارماشىلىق قاۋىمداستىق ءۇشىن ەڭ جوعارى مەملەكەتتىك باعالاردىڭ ءبىرى سانالادى.
