الماتىدان تاراز قالاسىنا ستۋدەنت بولىپ كەتىپ، اكتريسا بولىپ ورالعان جاس ونەر يەسى ۋسەنوۆا ينجايىممەن “ادىرنا” ۇلتتىق پورتالى سۇحباتتاسقان ەدى. ءسۇرىنىپ قايتا تۇرعان ونەر يەسىنىڭ سۇبەلى اڭگىمەسىن نازارلارىڭىزعا ۇسىنامىز.
- الماتى-ارماندار ورىندالاتىن قالا. وسى قالانى قيىپ تاراز قالاسىنا كەتۋىڭىزگە نە سەبەپ بولدى؟
- الماتىعا گرانتقا وقۋعا تۇسە الماعان سوڭ وزىمە قالتام كوتەرەتىن وقۋ ورنىن ىزدەپ تاراز قالاسىنا باردىم. جاقىندارىم بولعان سوڭ اتا-انام دا قارسى بولمادى. قۇجاتتارىمدى تاپسىرىپ, الماتىعا قايتا كەلگەنىمدە جىلاعىم كەلىپ، تارازعا وقۋعا تاپسىرعانىم ءۇشىن وكىنگەنىم راس. ال قازىر قۋانامىن. ارماندار تەك قانا الماتىدا ورىندالمايدى. بۇيىرعان كەتپەيدى، قۋعان جەتپەيدى دەمەكشى بارلىعى نيەتىڭە, باعىڭا قاراي بولادى.
- «تيگۋ جاستار تەاترىنا» قالاي كەلدىڭىز؟
- وقۋعا تۇسكەن جىلى ء“بىز تالانتتاردى ىزدەيمىز” دەگەن سايىسقا قاتىسىپ جۇلدەلى ورىن الدىم. كەلەسى كۇنى “تيگۋ جاستار تەاترىندا” كاستينگ بولىپ جاتىر دەگەندى ەستىدىم. العاشىندا ءمان بەرمەگەن ەدىم, كەيىن ۋنيۆەرسيتەتتەگى اعا-اپكەلەرىم “بارىپ باعىڭدى سىناپ كور، سەن كاستينگتان وتەسىڭ!” دەپ قولداۋ كورسەتكەن سوڭ كوڭىلدەرىن قيماي باردىم. كاستينگتەن اعا-اپكەلەرىم ايتقانداي ءوتىپ كەتتىم. باسىندا نە بولعانىن تۇسىنبەي ءجۇردىم. كەيىن قاتتى قۋاندىم. وسىلايشا قازىر “تيگۋ جاستار تەاترىنىڭ” جاس اكتريساسىمىن.
- تەاتردا جۇرگەنىڭىزگە قانشا جىل بولدى؟ سول جىل ىشىندە قانشا ساحنا مەن قانشا قالانى باعىندىرىپ ۇلگەردىڭىز؟
- بيىل مىنە ءۇشىنشى جىلعا اياق باستى. ۇستازىم مەن كوماندانىڭ ارقاسىندا قانشا قالا مەن اۋىلداردى ارالاپ شىقتىق. قازاقستاننىڭ ءوڭتۇستىك-ءسولتۇستىگىن كوردىك. ورتالىققا دا بارىپ ونەر كورسەتىپ قايتتىق. شىعىس قازاقستان وڭىرىنە دە گاسترولگە شىقتىق. باتىسقا بارۋدى جوسپارلاپ وتىرعانىمىزدا مىنا ىندەت تاراعان سوڭ شىعا المادىق. شەكارالاس باۋىرلارىمىز قىرعىستانعا دا قوناق بولىپ قايتتىق.
- تەاتردا ەڭ العاش ويناعان سپەكتاكلىڭىز قانداي؟ جانە كىمنىڭ رولىندە وينادىڭىز?
- ەڭ العاش «جەلتوقسان جاڭعىرىعى» سپەكتاكلىندە دامەتكەنءنىڭ (قايرات رىسقۇلبەكوۆتىڭ اناسى) ءرولىن وينادىم. ەڭ العاش كاستينگكە بارعاندا دامەتكەننىڭ ديالوگىن وقىعان ەدىم. سول كەزدە ۇستازىم ماعان “اينالايىن قىزىم، سەنىڭ ءوزىڭدى، ءسوزىڭدى كورىپ دامەتكەننىڭ ءوزىن كورگەندەي بولدىم. سەنى سونشا كۇتتىك قوي. داۋىسىڭنان اينالدىم. سەنى سونشا كۇتتىك قوي”،- دەپەمىرەنىپ، سول ءرولدى ماعان تاپسىردى. ەڭ العاشقى ءرولىم وسى.
- ماماندىعىڭىز ونەرمەن بايلانىستى ما؟ تەاتر ساباعىڭىزعا كەدەرگى كەلتىرمەي مە؟
- وقۋىم ونەرمەن بايلانىستى ەمەس. العاشىندا وقۋعا اعىلشىن ءتىلى ءپانىنىڭ مۇعالىمى بولىپ ءتۇستىم. كەيىن اتا-اناممەن اقىلداسىپ فيلولوگيا ماماندىعىنا اۋىستىم. قازىر وسىماماندىق بويىنشا ءبىلىم الىپ جاتىرمىن. تەاتر وقۋىما كەدەرگى كەلتىرمەيدى. ەكى جاقتى قاتار الىپ، ۇلگەرىپ ءجۇرمىن. بىراق وقۋعا قاراعاندا تەتاردا ۋاقىت وتكىزگەن وزىمە قاتتى ۇنايدى. كەيدە ساباقتان قاشىپ تەاترداعى دايىندىقتارعا كەتىپ قالاتىن كەزدەر دە بولادى. جانىم تەاتردى قالايدى.
- ءوزىڭىزدىڭ تەاترداعى ۇستازىڭىز كىم؟
- ونەرگە باۋلىعان ۇستازىم ءانشى، كومپوزيتور، قر ەڭبەك سىڭىرگەن قايراتكەر-ابيىربەك تىناليەۆ. بويىمىزداعى تالانتتى ودان ءارى دارىتقان, بار بىلگەنىن ۇيرەتىپ, بويىمىزعا سىڭىرتكەن ۇستازىما ارقاشان دا العىس ايتىپ جۇرەمىن. تەك قانا اكتەرلىك شەبەرلىگىمىزدى عانا شىڭداپ قويماي، ومىرلىك ازىق بولار اقىلىن دا ايتىپ جۇرەدى.
- بالا كەزىڭىزدە ۇلكەن ساحنادا ونەر كورسەتۋدى ارماندادىڭىز با؟
- ساحنانىڭ ۇلكەن-كىشىسى بولمايدى. تەاتراكتريساسى بولۋدى ارمانداپ ۇلگەرمەدىم دە.بىراق، كينوعا ءتۇسىپ، جۇرگىزۋشى بولۋدى ارماندايتىن ەدىم. وسىلاي تاعدىر ءوزى مەنى وسى جولعا سالدى. بىزگە وسىنداي مۇمكىندىك بەرگەن ۋنيۆەرسيتەتىمىزدىڭ رەكتورى ساۋرىقوۆ ەربولات پەن تەاترىمىزدىڭ پروديۋسەرى اشيربەكوۆ سانات اعايعا العىس بىلدىرەمىن.
- ءوزىڭىزدىڭ زامانداستارىڭىزعا قانداي كەڭەس بەرەسىز?
- ماماندىق تاڭداۋدان قاتەلەسپەڭىزدەر. مەن سياقتى ءبىر جىلدى بوسقا وتكىزىپ ءجۇرىپ قالماڭىزدار. قاتەلەسپەيتىن ادام بولمايدى، وسىنداي قاتەلىكتەردىڭ ارقاسىندا ءومىر ءسۇرۋدى ۇيرەنمىز. اتا-اناڭىز ايتقان ماماندىقتى ەمەس، جانىڭىز قالاعان ماماندىقتى تاڭداڭىز. اتا-اناڭىزعا كەيىن قاتەلەسپەگەنىڭىڭىزدى دالەلدەي الاسىز. اقشا كوپ جەرگە ەمەس، جەتەلەيتىن جەرگە ۇمتىلىڭىز. ومىرلىك تاجىربيەمنەن بار ايتارىم وسى.
“ادىرنا” ۇلتتىق پورتالىنىڭ اتىنان سىزگە شىعارماشىلىق تابىستار تىلەيمىز. ونەرىڭىز ورگە جۇزە بەرسىن!
سۇحباتتاسقان: لاۋرا تۇرسىنجان،“ادىرنا” ۇلتتىق پورتالى
