بىلتىرعى جىلدىڭ شىلدە ايىندا مەملەكەت باسشىسىنىڭ وكىمىمەن ارۋجان سايىن قازاقستان رەسپۋبليكاسىنىڭ بالا قۇقىقتارى جونىندەگى ۋاكىلى قىزمەتىنە تاعايىندالعان بولاتىن. الايدا، اتالعان ورىنعا ارۋجان حانىم كەلگەلى بالا قۇقىعى قورعالعاننان گورى، تاپتالۋ وقيعالارى جيىلەپ كەتتى.
«بالالاردىڭ قۇقىعىن قورعاي الماي وتىرعان ارۋجان ساين وتستاۆكىگە كەتسىن!»-دەدى زاڭگەر ايگۇل ورىنبەك. ءبىر اپتا ىشىندە بىرنەشە بالا زورلاۋ وقيعاسى بولعانىن تىلگە تيەك ەتكەن قوعام بەلسەندىسى بالا قۇقىعىن قورعاۋشى ومبۋدسمەن بولۋ، ينتەرنەتتە تاپسىرما بەردىم دەپ پوست جازۋ ەمەس، ناقتى ىسكە كوشۋ. بالالاردى قورعاۋ ءۇشىن ناقتى نە جاسالىنىپ جاتىر؟ قاي وڭىردە زورلىق-زومبىلىقتىڭ كوپ ەكەنى تۋرالى ستاتيستيكا جاسالىپ، ەسەپ بەرگەنىن كورمەدىم. حالىقتىڭ ءتىلىن بىلمەيتىن، تۇسىنبەيتىن ادام بالالاردىڭ قۇقىعىن قورعايدى دەپ ويلامايمىن،-دەپ جازدى زاڭگەر. حالىقتىڭ ءتىلى دەگەننەن شىعادى. ارۋجان حانىم نە سەبەپتى قازاقشا سويلەمەيتىنىن دە ايتقان بولاتىن. شامامەن ءبىر جىل بۇرىن قازاق ءتىلىنىڭ ونشا جاقسى ەمەستىگىن، بىراق كۇندەلىكتى جاتتىعۋ جاسايتىنىن ايتقان ول اقىر اياعىندا ۋاقىت كەرەك. ال وعان قازىر ۋاقىت جوق دەپ جالتارعان ەدى. بالالار ومبۋدسمەنىنىڭ بۇلدىرشىندەردىڭ قۇقىعىن قورعاۋعا دا ۋاقىتى جوق پا دەگەن ويعا كەلەمىز. سەبەبى، ستاتيستيكا سوعان ماجبۇرلەيدى.
ەلىمىزدىڭ باس پروكۋراتۋراسىنىڭ مالىمەتىنە سۇيەنسەك، بىلتىرعى جىلى 154 ءجاسوسپىرىم قاسكويلەردىڭ زۇلىمدىق ارەكەتىنىڭ قۇربانى بولعان. بيىل نەبارى 6 ايدىڭ ىشىندە 125 بالاعا زورلىق-زومبىلىق كورسەتۋ فاكتىسى تىركەلگەن. جىل سوڭىنا دەيىن ءالى بىرنەشە ۋاقىت بار ەكەنىن ەسكەرسەك، كورسەتىلگەن ساندار ءوسىپ، انتيرەكورد ورناۋى دا مۇمكىن. بەتى اۋلاق، ارينە! ال، ارۋجان حانىمنىڭ اتالعان ماسەلەدەن گورى، باس اۋرۋى باسقادا سەكىلدى. بىرنەشە كۇن بۇرىن فەيسبۋكتەگى پاراقشاسىندا الماتى وبلىسىنداعى №1 بالالار ۇيىندەگى بالالاردىڭ قارجىسى جىمقىرىلعانى تۋرالى جازىپتى. ارۋجان حانىم، جەتىمگە قارايلاسقان، ولاردىڭ مۇڭ-مۇڭتاجىن بولىسكەن قۇپتارلىق ءىس قوي، ارينە. الايدا، بالالار ۇيىندەگى قارجى ماسەلەسىمەن سول سالانىڭ «قاساپشىلارى» اينالىسقانى دۇرىس شىعار...
قارجى تۋرالى كۇنى كەشە بالا قۇقىقتارى جونىندەگى ۋاكىل تاعى كوتەردى. «533 ميلليون 630 مىڭ تەڭگە» جايىندا سويلەسەيىك، - دەدى الەۋمەتتىك جەلىدە. ءبىر جىل بۇرىن جاڭا قىزمەتىنە كىرىسكەن ول 2017-2019 جىلدار ارالىعىنداعى قارجىلىق قۇجاتتاردى كورىپ، ەسەڭگىرەپ قالعان. جازباسىندا جارتى ميللياردتان استام اقشانىڭ قايدا جۇمسالعانىنى جايىندا «جىلىكتەپ» بەرىپتى.
وعان جۋرناليست گۇلبانۋ ابەنوۆا: ءبىر جىل بۇرىن قوعام بەلسەندىسىن بالالار ومبۋدسمەنى رەتىندە تاعايىنداعاندا كوبى قۋانىپ ەدى. ال، سول ومبۋدسمەن جىل بويى كولل-ورتالىقتاردىڭ قارجىسىن ەسەپتەۋمەن اينالىسقان با؟ قىسقاسى، ەلىمىزگە كاسىپكەر، حالىقتىڭ نەمەسە بيۋدجەتتىڭ اقشاسىن جيناۋشى ەمەس، بالالاردى ءبولىپ-جارماي قورعايتىن ومبۋدسمەن كەرەك،-دەدى.
«ادىرنا» ۇلتتىق پورتالى
