Byltyrǧy jyldyŋ şılde aiynda memleket basşysynyŋ ökımımen Arujan Saiyn Qazaqstan Respublikasynyŋ Bala qūqyqtary jönındegı uäkılı qyzmetıne taǧaiyndalǧan bolatyn. Alaida, atalǧan orynǧa Arujan hanym kelgelı bala qūqyǧy qorǧalǧannan görı, taptalu oqiǧalary jiılep kettı.
«Balalardyŋ qūqyǧyn qorǧai almai otyrǧan Arujan Sain otstavkıge ketsın!»-dedı zaŋger Aigül Orynbek. Bır apta ışınde bırneşe bala zorlau oqiǧasy bolǧanyn tılge tiek etken qoǧam belsendısı bala qūqyǧyn qorǧauşy ombudsmen bolu, internette tapsyrma berdım dep post jazu emes, naqty ıske köşu. Balalardy qorǧau üşın naqty ne jasalynyp jatyr? Qai öŋırde zorlyq-zombylyqtyŋ köp ekenı turaly statistika jasalyp, esep bergenın körmedım. Halyqtyŋ tılın bılmeitın, tüsınbeitın adam balalardyŋ qūqyǧyn qorǧaidy dep oilamaimyn,-dep jazdy zaŋger. Halyqtyŋ tılı degennen şyǧady. Arujan hanym ne sebeptı qazaqşa söilemeitının de aitqan bolatyn. Şamamen bır jyl būryn qazaq tılınıŋ onşa jaqsy emestıgın, bıraq kündelıktı jattyǧu jasaitynyn aitqan ol aqyr aiaǧynda uaqyt kerek. Al oǧan qazır uaqyt joq dep jaltarǧan edı. Balalar ombudsmenınıŋ büldırşınderdıŋ qūqyǧyn qorǧauǧa da uaqyty joq pa degen oiǧa kelemız. Sebebı, statistika soǧan mäjbürleidı.
Elımızdıŋ bas prokuraturasynyŋ mälımetıne süiensek, byltyrǧy jyly 154 jasöspırım qasköilerdıŋ zūlymdyq äreketınıŋ qūrbany bolǧan. Biyl nebärı 6 aidyŋ ışınde 125 balaǧa zorlyq-zombylyq körsetu faktısı tırkelgen. Jyl soŋyna deiın älı bırneşe uaqyt bar ekenın eskersek, körsetılgen sandar ösıp, antirekord ornauy da mümkın. Betı aulaq, ärine! Al, Arujan hanymnyŋ atalǧan mäseleden görı, bas auruy basqada sekıldı. Bırneşe kün būryn feisbuktegı paraqşasynda Almaty oblysyndaǧy №1 Balalar üiındegı balalardyŋ qarjysy jymqyrylǧany turaly jazypty. Arujan hanym, jetımge qarailasqan, olardyŋ mūŋ-mūŋtajyn bölısken qūptarlyq ıs qoi, ärine. Alaida, balalar üiındegı qarjy mäselesımen sol salanyŋ «qasapşylary» ainalysqany dūrys şyǧar...
Qarjy turaly künı keşe bala qūqyqtary jönındegı uäkıl taǧy köterdı. «533 million 630 myŋ teŋge» jaiynda söileseiık, - dedı äleumettık jelıde. Bır jyl būryn jaŋa qyzmetıne kırısken ol 2017-2019 jyldar aralyǧyndaǧy qarjylyq qūjattardy körıp, eseŋgırep qalǧan. Jazbasynda jarty milliardtan astam aqşanyŋ qaida jūmsalǧanyny jaiynda «jılıktep» berıptı.
Oǧan jurnalist Gülbanu Äbenova: Bır jyl būryn qoǧam belsendısın balalar ombudsmenı retınde taǧaiyndaǧanda köbı quanyp edı. Al, sol ombudsmen jyl boiy koll-ortalyqtardyŋ qarjysyn esepteumen ainalysqan ba? Qysqasy, elımızge käsıpker, halyqtyŋ nemese biudjettıŋ aqşasyn jinauşy emes, balalardy bölıp-jarmai qorǧaityn ombudsmen kerek,-dedı.
«Adyrna» ūlttyq portaly
