الەۋمەتتىك جەلىدە حالىقتى زورلىق-زومبىلىققا ۇگىتتەگەنى ءۇشىن ايىپتالعان قۋات حاميتوۆ بوستاندىققا شىقتى، – دەپ حابارلايدى «ادىرنا» ۇلتتىق پورتالى.
14 قىركۇيەك كۇنى Polisia.kz قۋات حاميتوۆتىڭ الەۋمەتتىك جەلىدە حالىقتى زورلىق-زومبىلىققا شاقىرعانى ءۇشىن جاۋاپقا تارتىلعانىن حابارلاعان بولاتىن. بۇل فاكت سوتقا دەيىنگى تەرگەۋدىڭ بىرىڭعاي تىزىمىنە قازاقستان رەسپۋبليكاسى قىلمىستىق كودەكسىنىڭ 272-بابى، 3-ءبولىمى بويىنشا تىركەلگەن.
ءىىم-ءنىڭ رەسمي وكىلى ءنۇردىلدا وراز دا قارجى پيراميدالارىن تەرگەۋ ىسىنە بايلانىستى وتكەن بۇگىنگى بريفينگتە سپورتشىنىڭ بۇل ارەكەتىنە قاتىستى قىلمىستىق جاۋاپكەرشىلىك قاراستىرىلاتىنى جايلى مالىمدەدى.
جاپپاي تارتىپسىزدىككە جانە ازاماتتارعا قاتىستى كۇش قولدانۋعا شاقىرۋ، ارانداتۋ ءۇشىن ءۇش جىلعا دەيىن باس بوستاندىعىنان ايىرىلۋى نەمەسە وسى مەرزىمگە باس بوستاندىعىن شەكتەۋى مۇمكىن سپورتشىنىڭ بۇگىن Instagram الەۋمەتتىك جەلىسىندە ۆيدەوۇندەۋى جاريالاندى. سپورتشى: «...دەزينفەكتور تۋرالى تاراپ كەتكەن ۆيدەوعا قاتىستى: ول ۆيدەو قالجىڭ رەتىندە تۇسىرىلگەن ۆيدەو. مەن ەشكىمدى جاپپاي كوتىرىلىسكە شاقىرمايمىن جانە ونداي ارەكەت ىستەمەڭىزدەر»، – دەپ اقتالعان.
ۆيدەوۇندەۋ جاريالانعاننان كەيىن كوپ ۇزاماي سپورت ءجۋرناليسى سەرىك نويان Instagram پاراقشاسىندا قۋات حاميتوۆتىڭ بوستاندىققا شىققانى جايلى اقپار جەتكىزدى. ازىرگە اتىشۋلى سپورتشىعا قاتىستى قىلمىستىق ءىستىڭ اياقتالعاندىعى تۋرالى ەشبىر دەرەك جوق.
ەستەرىڭىزگە سالا كەتسەك، بۇل قۋات ءحاميتوۆتىڭ ەلدەگى كوروناۆيرۋس ينفەكتسياسىمەن كۇرەس شارالارىنا قاتىستى تۋدىرعان ءبىرىنشى داۋى ەمەس. بۇعان دەيىن سپورتشى كوروناۆيرۋستىڭ وتىرىك ەكەندىگىن، سونداي-اق ۆيرۋسقا قارسى ۆاكتسينانى دەپۋتاتتار ەڭ ءبىرىنشى ءوز بالالارىنا سىناپ كورۋى جايلى دا جازبا جاريالاپ، سىنعا ىلىككەن.
فوتو اشىق دەرەككوزدەن الىندى
«ادىرنا» ۇلتتىق پورتالى
