بۇگىن، 4 قازان ۇلى ۇستاز، عالىم، تۇركتانۋشى، ادەبي سىنشى، اۋدارماشى، فيلولوگيا عىلىمىنىڭ دوكتورى ، پروفەسسور بەيسەنباي كەنجەباەۆتىڭ تۋعان كۇنى. 1904 جىلى قازىرگى تۇركىستان وبلىسى، ورداباسى اۋدانى،بوگەن اۋىلىندا دۇنيەگە كەلگەن. "ادىرنا" ۇلتتىق پورتالى عالىم ءومىرى جايلى دەرەكتى ۇسىنادى.
1925 جىلى ماسكەۋدەگى شىعىس ەڭبەكشىلەرى كوممۋنيستىك ۋنيۆەرسيتەتىن، ادەبيەت ينستيتۋتىنىڭ 2-كۋرسىن، 1942 جىلى قازمۋ-دى (قازىرگى قازۇۋ) بىتىرگەن.
«جاس قايرات»، «لەنينشىل جاس» (قازىرگى «جاس الاش»، 1923–28), «كەڭەس تۋى» (1929–30), «وڭتۇستىك قازاقستان» (1932–33), «سوتسياليستىك قازاقستان» (قازىرگى «ەگەمەن قازاقستان»، 1928–29, 1931–32, 1933–35), ت.ب. گازەت-جۋرنالداردا ءبولىم مەڭگەرۋشىسى، رەداكتوردىڭ ورىنباسارى، رەداكتور، 1938 – 1941 – «كسرو جوعارعى كەڭەسىنىڭ ۆەدوموستارىندا» اۋدارماشى، 1941-1944 – قازاقستان مەملەكەتتىك بىرىككەن باسپاسىنىڭ باس رەداكتورى بولىپ قىزمەت ىستەگەن. 1961 جىلدان قازمۋ-دا كافەدرا مەڭگەرۋشىسى، 1975-1987 جىلدارى وسى ۋنيۆەرسيتەتتە پروفەسسور بولدى.
«XX عاسىردىڭ باس كەزىندەگى قازاقتىڭ دەموكرات جازۋشىلارى (مونوگرافيا بويىنشا)» دەگەن تاقىرىپتا دوكتورلىق ديسسەرتاتسيا قورعاعان. كەنجەباەۆ – قازاق ادەبيەتىنىڭ ماسەلەلەرىنە، قازاق ءباسپاسوزىنىڭ تاريحىنا ارنالعان ىرگەلى ەڭبەكتەردىڭ، اباي، س.تورايعىروۆ، جامبىل جاباەۆ، م.سەرالين، م.اۋەزوۆ، س.ءشارىپوۆتىڭ ءومىرى مەن شىعارمالارى تۋرالى زەرتتەۋلەردىڭ اۆتورى. جوعارى وقۋ ورىندارى ستۋدەنتتەرىنە ارنالعان «XX عاسىر باسىنداعى قازاق ادەبيەتى» وقۋلىعىن، «ەرتەدەگى قازاق ادەبيەتى حرەستوماتياسىن» (1967) جاريالادى. اۋىز ادەبيەتى ۇلگىلەرىن جيناۋ، جۇيەلەۋ، زەرتتەۋمەن اينالىستى. كەڭەستىك كەزەڭدە كوممۋنيستىك يدەولوگياعا وراي، قازاق ادەبيەتىنىڭ تاريحى بۇقار جىراۋدان ء(حىح ع.) باستالادى دەگەن جاڭساق پىكىردى تەرىسكە شىعارىپ، ونىڭ ورحون-ەنيسەي جازبالارىنان باستالاتىندىعىن عىلىمي تۇرعىدان دالەلدەدى.
ۇلى ۇستاز – 1987 جىلى 17 شىلدەدە الماتى قالاسىندا ومىردەن وزدى.
