ادىلەت احمەتۇلىنىڭ جاڭا كىتابى جارىق كوردى

4048

تەرەڭ تىنىستى جىرلارىمەن وقىرماندار جۇرەگىنەن ورىن الىپ جۇرگەن اقىن ادىلەت احمەتۇلىنىڭ  «جۇمجۇما سۇلتان» اتتى ەكىنشى كىتابى باسىلىم كوردى. بۇل جاڭالىقپەن اۆتور  Facebook جەلىسىندەگى رەسمي پاراقشاسىندا ءبولىستى، دەپ حابارلايدى «ادىرنا» ۇلتتىق پورتالى.

 «جۇمجۇما سۇلتان» – التىن وردا ادەبي مۇرالارىنداعى شوقتىعى بيىك، كەسەك تۋىندى. سونى نازيرالىق (قايتالاي جىرلاۋ) داستۇرىمەن قازىرگى قازاق تىلىنە اۋدارىپ، كوركەم پوەزيا ۇلگىسىندە كىتاپ ەتىپ شىعاردىم. بۇل ءوزى كىشكەنتاي كىتاپ. بىراق سالماعى اۋىر مۇرا. كىتاپقا وزگە بىرنەشە پوەما، ولەڭدەرىم ەندى. بۇل ەڭبەگىمىزدى التىن وردانىڭ 750 جىلىنا جانە التىن وردا مۇراگەرى – سىزدەرگە ارنايمىن!» ،-دەپ جازدى اقىن.

التىن وردانىڭ ادەبيەتشىسى حۇسام كاتيبتىڭ «جۇمجۇما سۇلتانى» 1370 جىلدارى جازىلعان. اۆتورى جايىندا ءجوندى ماعلۇمات جوق. تىرلىگىندە كوپ جاماندىق جاساپ، كۇناعا باتقان ادامداردىڭ و دۇنيەدە توزاق ازابىن تارتقاندىعى تۋرالى اڭگىمە، اڭىزدار حۇسام كاتيبتىڭ پوەماسىنان بۇرىن دا كۇنشىعىس، باتىس ەلدەرىندەگى اقىندار شىعارمالارىنا نەگىز بولعان: يراننىڭ اتاقتى اقىنى فاريد-اد-دين اتتار (1119 جىلى تۋعان), يتاليا ويانۋشىلىعىنىڭ الىبى دانتە (1265–1321) وسى تاقىرىپتا «ءتاڭىرى كومەدياسىن» جازعان.
كۇللى تۇرىك جۇرتىنا ورتاق، تىپتەن الەمدىك دەڭگەيدەگى ادەبي تۋىندىنىڭ ءبىرى اتانعان وسى داستاندى ءا. احمەتۇلى نازيرالىق داستۇرمەن قايتادان جىرلاپ، كىتاپ ەتىپ شىعارىپتى. 30-قاراشا كۇنى الماتىداعى «عىلىم ورداسى» رمك ورتالىق عىلىمي كىتاپحانادا ونلاين-وفلاين فورماتتا بۇل كىتاپتىڭ تۇساۋى كەسىلىپ، اقىننىڭ «التىن وردا اماناتى» اتتى شىعارماشىلىق كەشى وتەدى. بەتاشار رەتىندە جاڭا كىتاپتان اۆتوردىڭ بىرەر شۋماق جىرىن ۇسىنايىق:
التىن وردا – كيەلىم،
ماعان يە بولدىڭ سەن، مەن دە وزىڭە يەمىن.
ارقاسىنا اڭىز كومگەن،
تاۋ-تاسىنا بادىزدەلگەن
تاريح.
قۇلاي-قۇلاي سۇيەمىن!
جىلاي-جىلاي سۇيەمىن!

قاھارىمەن اسپان استىن قالتىراتقان قاعانات،
اق قاعازعا قالتىرىپسىڭ التى باتپان امانات.
سەنى تاپتىم ەرتىستى ورلەپ،
ەدىل بويىن ساعالاپ،
جايىق بويىن جاعالاپ.

باقشاساراي التىن دىڭگەك،
تۇرعان شاقتا داڭقىڭ بۇرلەپ،
عۇلامالار ماڭدايلارىن نۇر ساجدەگە تيگىزگەن.
ەر توقتامىس، جوشى، باتۋ،

باسى باردى يگىزگەن.
قايران الىپ التىن وردام،
ءتاڭىرى مىنەز حاندارى-اي،
اۋىزى تۇكتى كاۋىرلەردى ەتەگىنەن سۇيگىزگەن...

«ادىرنا» ۇلتتىق پورتالى

پىكىرلەر
رەداكتسيا تاڭداۋى