11 جاسار اسپاز: پاريجدەگىدەي مەيرامحانا اشقىم كەلەدى

10229
Adyrna.kz Telegram

بولار بالا جاسىنان. دۋلات تانتاەۆ - ەلىمىزدەگى ەڭ جاس اسپازداردىڭ ءبىرى. نەبارى ون ءبىر جاستاعى جەتكىنشەك بالا كەزىنەن اسپازدىق ونەردى مەڭگەرىپ، بۇگىندە ءوز ناپاقاسىن تاۋىپ ءجۇر. «ادىرنا» ۇلتتىق پورتالى  ونەرلى ورەنمەن بولعان سۇحباتتى نازارلارىڭىزعا ۇسىنادى.

اسپازدىق - سۇيىكتى ءىسىم

– وسىدان ەكى-ءۇش جىل بۇرىن عالامتوردان تانىمال اسپازداردىڭ ۆيدەولارىن كورە باستادىم. ۋاقىت وتە كەلە تاماق پىسىرۋگە دەگەن قىزىعۋشىلىعىم ارتا ءتۇستى. ەڭ العاش ءتاتتى كەكس ازىرلەگەن بولاتىنمىن. ونى دايىنداۋ بارىسىندا ايتارلىقتاي قيىندىقتار بولمادى. وسىلايشا باسقا دا تاعام تۇرلەرىن جاساپ ۇيرەندىم.  قازىرگى تاڭدا اسپازدىق مەنىڭ سۇيىكتى ىسىمە اينالدى.

كەز كەلگەن تاماقتى جاساي الامىن

– قانشا ءتۇرلى تاماق ازىرلەي الاتىنىمدى ناقتى بىلمەيمىن. دەسە دە، تاعامنىڭ رەتسەپتىسىن بىلسەم، كەز كەلگەن ءتۇرىن جاساي الامىن. ولاردىڭ ىشىنەن ۇناعانىن تاڭداپ، دايىندالۋ جولىمەن بولىسەمىن.

Instagram ارقىلى تاپسىرىس قابىلدايمىن

–Instagram  جەلىسىندە جەكە پاراقشام بار.  ونى نەگىزىنەن ءتۇرلى رەتسەپتتەرمەن ءبولىسۋ ءۇشىن اشقان بولاتىنمىن. ءبىرىنشى ۆيدەومدا ناپولەون تورتىنىڭ جاسالۋ جولىن ءتۇسىندىردىم. كوپشىلىك وزدەرىنىڭ جاعىمدى پىكىرلەر قالدىردى. كەيىن ءتۇرلى ۇسىنىستار تۇسكەندىكتەن، تاپسىرىس قابىلداي باستادىم.  «اس يەسىمەن ءتاتتى» دەمەكشى،  ءاربىر تاپسىرىستى ۇلكەن ىجداعاتتىلىقپەن دايىندايمىن.

وتباسىم مەنى بىردەن قولدادى

– كاسىپتى باستاۋىما اعام كومەكتەستى.  وتباسىم مەن جاقىندارىما جاساعان تاعامدارىم قاتتى ۇناعاندىقتان،  مەنىڭ قىزىعۋشىلىعىمدى بىردەن قولدادى. بۇگىندە تاپسىرىس قابىلداۋمەن قاتار،  تۇرلى تاتتىلەر مەن تاعامداردىڭ ۆيدەورەتسەپتىلەرىن تۇسىرەمىن.

6-سىنىپتا وقيتىن جاس تالانت سۇحبات بارىسىندا بارلىعىنا ۇلگەرەتىنىن جەتكىزدى.

– وقۋ ۇلگەرىمىم جاقسى. بوس ۋاقىتىمدا فۋتبول ويناپ، سپورتپەن شۇعىلدانامىن. سونداي-اق، YouTube-تەن ءارتۇرلى رەتسەپتىلەردى كورىپ، جاڭا تاعام تۇرلەرىنىڭ مازىرىمەن تانىسامىن.

ارمانى اسقاق دۋلات

– ارمانسىز ادام بولمايدى. بولاشاقتا مىقتى اسپاز بولىپ، الماتى قالاسىندا پاريجدەگىدەي كۇشتى مەيرامحانا اشقىم كەلەدى.

سۇيىكتى ىسىڭىزبەن اينالىسىڭىز!

– التىنداي ۋاقىتىڭىزدى بوسقا وتكىزبەي، سۇيىكتى ىسىڭىزبەن اينالىسىڭىز. ەڭبەكتەنىڭىز. سول كەزدە ءسىز ەڭ باقىتتى ادام بولاسىز.

اڭگىمەلەسكەن ديانا اسان،

«ادىرنا» ۇلتتىق پورتالى

پىكىرلەر