ەلىمىزدە مۇمكىندىگى شەكتەۋلى بولعانىمەن، تاعدىر تاۋقىمەتىنە جاسىماۋدىڭ جارقىن ۇلگىسىن كورسەتىپ جۇرگەندەر كوپ. سولاردىڭ ءبىرى — گۇلناز قوسمۋرزيەۆا. 2006 جىلى جول اپاتىنا ۇشىراپ، ءجۇرۋ قابىلەتىنەن ايىرىلعان جان بولاشاققا دەگەن ءۇمىتىن ۇزبەگەن. بۇگىندە ول «ءبىز دە ادامبىز!» قوعامدىق قورىن اشىپ، وڭىردەگى كومەككە مۇقتاج جاندارعا قول ۇشىن سوزىپ ءجۇر.
گۇلناز ماقساتقىزىنىڭ باستاماسىمەن قالا ءدارىحانالارىندا، ازىق-تۇلىك دۇكەندەرىندە، ۇلكەن ويىن-ساۋىق ورتالىقتارىندا تالاپقا ساي پاندۋستار قويىلىپ، اتىراۋ اۋەجايىندا اربادا وتىرعان جاندارعا ارنالعان ليفت ورناتىلعان. «ادىرنا» ۇلتتىق پورتالى قازاقتىڭ قايسار قىزىمەن بولعان سۇحباتتى نازارلارىڭىزعا ۇسىنادى.
– قوعامدىق قور اشۋدى بىرنەشە جىلدان بەرى ويلاستىرىپ جۇرگەنمىن. بۇل ويىمدى جاقىندارىم مەن دوستارىم دا قولداي كەتتى. شىنى كەرەك، ەلىمىزدە مۇگەدەكتەرگە قولايلى جاعداي جاسالماعان. مىسالى، قاراپايىم ءدارىحانا، مەيرامحانا، اۋرۋحانا سەكىلدى نىسانداردىڭ كوپشىلىگىندە پاندۋستار جوق. مەن ۇنەمى «ءبىز دە ادامبىز عوي، نەگە مۇمكىندىگى شەكتەۋلى ادامدارعا جاعداي جاسامايسىزدار، الدە ولار تەك ۇيدە وتىرۋلارى كەرەك پە؟» دەپ ءوز رەنىشىمدى ءبىلدىرىپ جۇرەتىنمىن. وسىنداي سوزدەرىمدى ءجيى ەستيتىن قۇربىم ءبىر كۇنى «ءبىز دە ادامبىز!» دەگەن اتاۋدى ۇسىندى. بۇل اتاۋ ماعان بىردەن ۇناپ، كارانتين كەزىندە قور اشۋعا بەل بۋدىم. وسىلايشا مامىر ايىندا رەسمي تىركەۋدەن وتتىك.
قوردىڭ قۇرىلعانىنا از عانا ۋاقىت بولسا دا، گۇلناز حانىم باستاعان توپ توتەنشە جاعداي كەزىندە ءبىرشاما مۇقتاج جانعا كومەكتەسىپ ۇلگەرگەن. اتاپ ايتساق، ۇيىم اتىراۋ وبلىسىنىڭ ەرىكتىلەر شتابىمەن بىرلەسە 2005-گە جۋىق وتباسىنى ازىق – تۇلىكپەن قامتاماسىز ەتىپ، وبلىس كولەمىندە الەۋمەتتىك جاعىنان وسال توپ مۇشەلەرىنە 22 مىڭ دانا ماسكانى تەگىن تاراتقان.
اياعى جوق، قولى جوق قانشاما جان باقىتتى عۇمىر كەشۋدە
— مەنىڭ ۇلگى تۇتاتىن ادامىم – انام. سونداي-اق، ۇنەمى پوزيتيۆتە جۇرەتىن جانداردان شابىت الامىن. بۇگىندە اياعى جوق، قولى جوق قانشاما جان باقىتتى عۇمىر كەشۋدە. ولاردىڭ اراسىندا تابىستى بيزنەسمەن، مىقتى سپورتشى بولعاندارى دا بار. ماسەلەن، الەمگە تانىمال نيك ۆۋيچيچ بۇگىندە كوپتەگەن ادامنىڭ موتيۆاتورىنا اينالدى.
بارلىعىن وزىڭىزدەن باستاڭىز
– ءوزىمدى شىنايى باقىتتى جانداردىڭ قاتارىنا قوسامىن. ۇمىتپاڭىز، ءومىر سىزگە ءبىر-اق رەت بەرىلەدى. ادام وزگەلەر ءۇشىن ەمەس، ەڭ الدىمەن ءوزى ءۇشىن ءومىر ءسۇرۋى كەرەك. كەز كەلگەن جاننىڭ باسىنان قيىنشىلىقتار وتەدى. ءبىزدىڭ اتا-بابالارىمىز سوعىستى دا باستان كەشىردى عوي. دەسە دە، مويىمادى. نەگىزىنەن بارلىعى دا ادامنىڭ ءوز قولىندا، سەبەبى تاڭداۋ قاشان دا تابىلادى.
ومىرگە عاشىق جان جىگەرى مۇقالعان جاندارعا ءوز اقىل-كەڭەسىن دە ايتا كەتتى.
«بىرىنشىدەن، ادام ءوز-ءوزىن قولعا الۋى كەرەك. ەكىنشىدەن، ءاردايىم ىزدەنىس ۇستىندە بولعانى ابزال. كىتاپ وقىڭىز، سەمينار ترەنينگتەردە قاتىسىڭىز. بىلايشا ايتقاندا، تۇلعالىق جاعىنان دامىڭىز. ءسىز وزگەرسەڭىز، الەم دە وزگەرەدى. سول ءۇشىن دە بارلىعىن وزىڭىزدەن باستاڭىز»،-دەپ ءسوزىن قورىتىندىلادى ول.
اڭگىمەلەسكەن ديانا اسان،
«ادىرنا» ۇلتتىق پورتالى
