جۇمىسپەن قامتۋ ورتالىقتارى - قر ازاماتتارىنا جۇمىسپەن قامتۋ قىزمەتىن ۇسىناتىن «ەڭبەك نارىعىنداعى بىرىڭعاي تەرەزە». «ادىرنا» ۇلتتىق پورتالىنىڭ كەزەكتى سۇحباتى الماتى قالاسى اكىمدىگى حالىقتى جۇمىسپەن قامتۋ ورتالىعىنىڭ ءباسپاسوز حاتشىسى تاشيباەۆا اسەل نۇرلانقىزىمەن بولدى.
– قازاقستاندا قانشا حالىقتى جۇمىسپەن قامتۋ ورتالىعى بار؟ ولاردىڭ نەگىزگى ماقساتى قانداي؟
– قازاقستان رەسپۋبليكاسىنداعى جۇمىسپەن قامتۋ ورتالىقتارىنىڭ سانىنا قاتىستى ناقتى جاۋاپتى تەك ەڭبەك جانە حالىقتى الەۋمەتتىك قورعاۋ مينيسترلىگى عانا بەرە الادى. بىراق, Enbek.kz پورتالىنىڭ مالىمەتتەرى بويىنشا, قازاقستاندا 203 حالىقتى جۇمىسپەن قامتۋ ورتالىعى جۇمىس ىستەيدى. قازاقستان رەسپۋبليكاسىنىڭ زاڭىنا سايكەس، "حالىقتى جۇمىسپەن قامتۋ تۋرالى"جۇمىسپەن قامتۋ ورتالىعى نەگىزگى ماقساتى تومەندەگىدەي:
11-باپ. حالىقتى جۇمىسپەن قامتۋ ورتالىعى
1. حالىقتى جۇمىسپەن قامتۋ ورتالىعى:
1) حالىقتى جۇمىسپەن قامتۋدىڭ جاي-كۇيىن باعالاۋدى جانە دامۋىن بولجاۋدى، حالىقتى ەڭبەك نارىعىنىڭ جاي-كۇيى تۋرالى حاباردار ەتۋدى جۇزەگە اسىرادى;
2) وسى زاڭدا كوزدەلگەن جۇمىسپەن قامتۋعا جاردەمدەسۋدىڭ بەلسەندى شارالارىن، سونداي-اق بيۋدجەت قاراجاتى ەسەبىنەن قارجىلاندىرىلاتىن جۇمىسپەن قامتۋعا جاردەمدەسۋدىڭ قوسىمشا شارالارىن ىسكە اسىرۋدى جۇزەگە اسىرادى;
3) ءوتىنىش جاساعان ادامداردى وسى زاڭنىڭ 13-بابىنا سايكەس جۇمىس ىزدەۋشىلەر رەتىندە تىركەيدى;
4) جۇمىسىنان ايىرىلعان جاعدايدا مەملەكەتتىك الەۋمەتتىك ساقتاندىرۋ قورىنىڭ قاراجاتى ەسەبىنەن الەۋمەتتىك تولەم تاعايىنداۋ ءۇشىن تىزبەسىن حالىقتى جۇمىسپەن قامتۋ ماسەلەلەرى جونىندەگى ۋاكىلەتتى ورگان بەلگىلەگەن قاجەتتى قۇجاتتاردى قابىلداۋدى جۇزەگە اسىرادى جانە ولاردى مەملەكەتتىك كورپوراتسياعا جىبەرەدى;
5) الەۋمەتتىك كاسىپتىك باعدارلاۋ بويىنشا قىزمەتتەر كورسەتەدى;
6) جۇمىس ىزدەپ جۇرگەن ادامدارعا جانە جۇمىسسىزدارعا جەكە ءوزى بارعان نەمەسە اقپاراتتىق-كوممۋنيكاتسيالىق تەحنولوگيالار جانە (نەمەسە) ۇيالى بايلانىس جەلىسىنىڭ ابونەنتتىك قۇرىلعىسى ارقىلى ءوتىنىش جاساعان كەزدە ولاردى لايىقتى جۇمىستىڭ بار ەكەندىگى تۋرالى مىندەتتى تۇردە حاباردار ەتە وتىرىپ، لايىقتى جۇمىس تاڭداۋدا جاردەمدەسەدى;
7) مەملەكەتتىك الەۋمەتتىك ساقتاندىرۋ قورىمەن ءوزارا iس-قيمىل جاساۋدى جۇزەگە اسىرادى;
8) بوس ورىنداردىڭ ەسەبىن جۇرگىزەدى;
9) جۇمىسپەن قامتۋدىڭ جەكە كارتاسىن جۇرگىزەدى;
10) الەۋمەتتىك كەلىسىمشارتتار جاساسادى;
11) جۇمىس ىزدەپ جۇرگەن ادامدارعا، جۇمىسسىزدارعا جانە ءوتىنىش جاساعان وزگە دە ادامدارعا ەڭبەك دەلدالدىعىن كورسەتەدى;
11-1) جۇمىسسىز رەتىندە تىركەۋ تۋرالى انىقتامانى وتەۋسiز نەگiزدە بەرەدى;
11-2) تىركەلگەن جۇمىسسىزدارعا قاتىستى بيۋدجەت قاراجاتى ەسەبىنەن جانە كورسەتىلگەن قىزمەتتەر ءۇشىن ولاردان تولەماقى الماي، حالىقتى جۇمىسپەن قامتۋ سالاسىندا كورسەتىلەتىن قىزمەتتەردىڭ اۋتسورسينگىن حالىقتى جۇمىسپەن قامتۋ ماسەلەلەرى جونىندەگى ۋاكىلەتتى ورگان ايقىندايتىن تارتىپپەن جۇزەگە اسىرادى;
11-3) حالىقتى جۇمىسپەن قامتۋ سالاسىندا كورسەتىلەتىن قىزمەتتەردىڭ اۋتسورسينگى تۋرالى شارتتىڭ ىسكە اسىرىلۋ بارىسىن مونيتورينگتەۋدى جانە باقىلاۋدى جۇزەگە اسىرادى;
11-4) قازاقستان رەسپۋبليكاسىنىڭ حالىقتى جۇمىسپەن قامتۋ تۋرالى زاڭناماسىنا سايكەس قازاقستان رەسپۋبليكاسى ازاماتتارىنىڭ قونىس اۋدارۋشىلاردى قابىلداۋدىڭ وڭىرلىك كۆوتاسىنا ەنگىزۋ تۋرالى وتىنىشتەرىن قابىلدايدى;
12) قازاقستان رەسپۋبليكاسىنىڭ حالىقتى جۇمىسپەن قامتۋ تۋرالى زاڭناماسىندا كوزدەلگەن جۇمىسپەن قامتۋعا جاردەمدەسۋدىڭ وزگە دە شارالارىن كورسەتەدى.
2. حالىقتى جۇمىسپەن قامتۋ ورتالىقتارىنىڭ قىزمەتىن قارجىلاندىرۋ قازاقستان رەسپۋبليكاسىنىڭ زاڭناماسىندا بەلگىلەنگەن تارتىپپەن جۇزەگە اسىرىلادى.
– جۇمىس ىزدەپ جۇرگەن ادامدار جۇمىسسىز رەتىندە قالاي تىركەلە الادى؟
– قازاقستان رەسپۋبليكاسىنىڭ 2016 جىلعى 6 ساۋىردەگى "حالىقتى جۇمىسپەن قامتۋ تۋرالى" زاڭىنا سايكەس ءسىز بىردەن جۇمىسسىز رەتىندە تىركەلە المايسىز. الدىمەن جۇمىس ىزدەۋشى رەتىندە تىركەلۋ قاجەت. مۇنداي تىركەۋدى تۇرعىلىقتى جەرى بويىنشا حالىقتى جۇمىسپەن قامتۋ ورتالىعىنان نەمەسە Egov پورتالى ارقىلى ونلاين رەجيمىندە الۋعا بولادى. جۇمىسپەن قامتۋ ورتالىعىنا جۇگىنگەن كەزدە جەكە كۋالىك قاجەت.
– جۇمىسپەن قامتۋ ورتالىعى كىمدەردى جۇمىسپەن قامتي الادى؟ جالاقى مولشەرى قانداي؟
– ورتاشا جالاقى 60 000- 85 000 تەڭگە قۇرايدى.جۇمىسسىز ازاماتتارعا تۇراقتى جانە ۋاقىتشا جۇمىس ورىندارىنا (جاستار پراكتيكاسى، قوعامدىق جۇمىستار، الەۋمەتتىك جۇمىس ورىندارى) جۇمىسقا ورنالاسۋعا جاردەم كورسەتىلەدى.
– جۇمىسپەن قامتۋ ورتالىقتارى جوق اۋىل تۇرعىندارى كىمگە جۇگىنۋى قاجەت؟
– بارلىق دەرلىك اۋىلداردا وزدەرىنىڭ جۇمىسپەن قامتۋ ورتالىقتارى بار، ولار بولماعان جاعدايدا ازاماتتار وبلىستىق جۇمىسپەن قامتۋ ورتالىقتارىنا بارا الادى نەمەسە ەلەكتروندىق ەڭبەك بيرجاسى Enbek.kz پورتالى ارقىلى قىزمەتتەرگە ونلاين تاپسىرىس بەرە الادى.
– جۇمىستى ونلاين تۇردە ىزدەۋ مۇمكىندىگى بار ما؟
– ازاماتتار ەلەكتروندى ەڭبەك بيرجاسى Enbek.kz ارقىلى ونلاين جۇمىس ىزدەي الادى. الماتى قالاسى اكىمدىگىنىڭ حالىقتى جۇمىسپەن قامتۋ ورتالىعىنىڭ ماماندارى جۇمىس بەرۋشىلەرمەن بوس جۇمىس ورىندارى تۋرالى مالىمەتتەردى جيناۋ جانە enbek.kz ينتەرنەت-پورتالىنداعى جەكە كابينەتتەردە بوس جۇمىس ورىندارى تۋرالى اقپاراتتى تولتىرۋ، سونداي-اق، وسى سالاداعى زاڭنامانى ءتۇسىندىرۋ بويىنشا تۇراقتى جۇمىس جۇرگىزەدى.
– سوڭعى 3 اي كولەمىندە قانشا ادام جۇمىسپەن قامتىلدى؟
– 2020 جىلدىڭ باسىنان باستاپ الماتى قالاسى اكىمدىگىنىڭ حالىقتى جۇمىسپەن قامتۋ ورتالىعى 34148 ادامدى تۇراقتى جۇمىس ورىندارىنا ورنالاستىردى.ۋاقىتشا جۇمىس ورىندارىنا 18649 ادام جۇمىسقا ورنالىستىرىلدى.
«ادىرنا» ۇلتتىق پورتالى
