پاۆلودار وبلىسىندا 18 ادامدى ۇسىك شالدى، دەپ حابارلايدى «ادىرنا» ءتىلشىسى «Astana TV»-گە سىلتەمە جاساپ.
اياق-قولى ءۇسىپ قالعاندار اراسىندا نارەستەلەر دە بار. ەكىباستۇزداعى سولنەچنىي كەنتىندە 1 جاستاعى قىز بالا ساۋساعى ءۇسىپ اۋرۋحاناعا تۇسكەن.
«2019 جىلعى قىز بالا جايىن ناقتىراق ايتىپ كەتەتىن بولساق، ول كەشكى ۋاقىتتا ساعات 22.00-دە اناسىمەن دالاعا شىعىپ سەرۋەندەگەن. قىز بالانىڭ جاعدايى جاقسى. قازىر بارلىق ەم شارالارىن الىپ جاتىر»،-دەدى وبلىستىق دەنساۋلىق ساقتاۋ باسقارماسىنىڭ ءباسپاسوز حاتشىسى ەلميرا تەمىرعاليەۆا.
وبلىس ورتالىعى - پاۆلوداردا دا ۇسىك شالعاندار از ەمەس. جاڭا جىل كىرگەلى بەرى 11 ادام اۋرۋحاناعا ءتۇسىپتى. دەنى اياق-قولى ۇسىگەندەر. كۇن رايى قولايسىزدىعىنا بايلانىستى ايماقتا كۇرە جولدار جابىلدى. الايدا ەسكەرتۋلەرگە قاراماستان جولعا شىعىپ، كولىگى سىنىپ جاتقاندار از ەمەس.
وسى كۇندە پاۆلودار وڭىرىندە اۋانىڭ تەمپەراتۋراسى 40 گرادۋستان تومەن. ديزەل وتىنىمەن جۇرەتىن كولىكتەرگە جانە قوعامدىق كولىكتەرگە الىس جولعا شىعۋعا تيىم سالىندى. پوليتسيا دەپارتامەنتى كەلتىرگەن دەرەكتەرگە قاراعاندا، جانار مايى قاتىپ قالاتىن جۇك كولىكتەرى كوبەيگەن. شىعىس قازاقستان وبلىسىندا، جولدا قالىپ قويعان 15 ادام قۇتقارىلىپتى.
«ادىرنا» ۇلتتىق پورتالى
