قازۇۋ-دىڭ جەر اۋماعى نەگە قىسقاردى؟

3308
Adyrna.kz Telegram

«اق جول» دەموكراتيالىق پارتياسى قازاق ۇلتتىق ۋنيۆەرسيتەتىنە جەر اۋماعى كولەمىنىڭ بەلگىسىز سەبەپتەرمەن ازايۋىنا بايلانىستى الاڭداۋشىلىق بىلدىرۋدە. بۇل تۋرالى ءماجىلىستىڭ جالپى وتىرىسىندا فراكتسيا دەپۋتاتى بەرىك دۇيسەمبينوۆ دەپۋتاتتىق ساۋال جولدادى، دەپ حابارلايدى "ادىرنا" ۇلتتىق پورتالى. 

قر باس پروكۋرورى

ع. د. نۇرداۋلەتوۆقا

 

قر ءبىلىم جانە عىلىم ءمينيسترى

ا. ق. ايماعامبەتوۆقا

 

«اق جول» فراكتسياسىنىڭ ساۋالى قازاق ەلىنىڭ شامشىراعى بولعان، قابىرعاسىندا قانىش ساتباەۆ پەن مۇحتار اۋەزوۆ ءدارىس بەرگەن، ال جۇلدىزدى تۇلەكتەرىنىڭ ءتىزىمى وسى ساۋالعا سىيمايتىن، قازاقستاننىڭ جوعارى ءبىلىمىنىڭ قارا شاڭىراعى قازاق ۇلتتىق ۋنيۆەرسيتەتى تۋرالى بولماق.

ءبىر عاسىرعا جۋىق تاريحى بار ۇلتتىق ۋنيۆەرسيتەتتىڭ بۇگىنگى جاناشىر تۇلەكتەرى مەن قوعام بەلسەندىلەرى ۋنيۆەرسيتەتكە تيەسىلى جەر اۋماعى كولەمىنىڭ بەلگىسىز سەبەپتەرمەن ازايۋىنا بايلانىستى الاڭداۋشىلىق بىلدىرۋدە.

جەر قۇقىعى بويىنشا ساراپشى، زاڭگەر باقىتجان بازاربەكتىڭ مالىمەتتەرىنە سۇيەنسەك، 2012 جىلعى 30 قاڭتارداعى الماتى قالاسى اكىمىنىڭ قاۋلىسىنا سايكەس ۋنيۆەرسيتەتتىڭ جالپى كولەمى 73,26 گەكتار جەر پايدالانۋ قۇقىعىنا بەرىلگەن.

ال، 2017 جىلى 2 قازاندا الماتى قالاسىنىڭ اكىمىنىڭ № 4/392-22-36 دەگەن قاۋلىسىنا سايكەس قازۇۋ-ءنىڭ جالپى جەرى ۇلەستەرگە ءبولىنىپ، جەر كولەمى - 72,48 گەكتار بولىپ شىقتى. سونىڭ ىشىندە قازۇۋ-ءنىڭ تىكەلەي ۇلەسىن الاتىن بولساق، ول – 71,40 گەكتار جەر، ياعني، وقۋ ورنىنىڭ جالپى جەر كولەمى 1,8 گەكتارعا ازايعانىن بايقايمىز.

بۇل ورايدا، «ۋنيۆەرسيتەتكە تيەسىلى جەر نەگە ازايعان؟» دەگەن سۇراق تۋىندايدى. ەلىمىزدىڭ ءبىلىم ورداسىندا وقيتىن جاستارىمىزدىڭ يگىلىگىنە ارنالعان جەر بەلگىسىز بىرەۋلەردىڭ ەنشىسىندە، قازاقشا ايتقاندا، «ۇستاعاننىڭ قولىندا، تىستەگەننىڭ اۋىزىندا» كەتە بەرمەك پە؟  وسى ماسەلەگە كىمدەر جاۋاپتى دەگەن سۇراققا  وكىلەتتى ورگانداردان ماردىمدى جاۋاپ بولعان جوق.

مۇنداي  جاعدايلار تەك ۇلتتىق ۋنيۆەرسيتەتپەن عانا شەكتەلىپ جۇرگەن جوق. ەلىمىزدىڭ ءار ايماعىندا جوعارعى وقۋ ورىندارىنىڭ جەر تەلىمدەرىنىڭ جەكە مەنشىككە ساتىلىپ جاتقانىن، ستۋدەنت جاستار تۇراتىن جاتاحانالاردىڭ ازايىپ، ۋنيۆەرسيتەت مەنشىگىندەگى وقۋ پروتسەستەرىن قامتاماسىز ەتەتىن قوسىمشا جىلجىمايتىن مۇلىك وبەكتىلەرىنىڭ ساۋداعا سالىنىپ جاتقانىنان بۇقارالىق اقپارات قۇرالدارىنان جانە بارلىعىن كورىپ ءبىلىپ وتىرعان ەلدىڭ اۋزىنان ەستىپ ءجۇرمىز. مىسالى، شىعىس قازاقستان مەملەكەتتىك ۋنيۆەرسيتەتىنىڭ باس عيماراتىنان ون قادام قاشىقتىقتا ورنالاسقان وندىرىستىك شەبەرحانا بۇگىندە ويىن-ساۋىق ورنىنا اينالعان.

 

جوعارىدىعىنى بايانداي كەلىپ، «اق جول» فراكتسياسىنىڭ دەپۋتاتتارى:

  1. مەملەكەت مۇددەسى مەن جاستاردىڭ ءبىلىم الۋ بولاشاعىن ەسكەرە وتىرىپ، قازاق ۇلتتىق ۋنيۆەرسيتەتىنە تيەسىلى جەر اۋماعىنان جەر ۋچاسكەلەرىنىڭ ءبولىنىپ شىعارىلعانى قانشالىقتى زاڭدى ەكەنىن تەكسەرىپ، زاڭسىزدىق ورىن العان جاعدايدا جاۋاپتى ادامداردى جانە حالقىمىز كيەلى ساناپ، ارقاشان ەرەكشە قۇرمەتپەن قارايتىن ءبىلىم وشاقتارىنا قاراپ اۋزىن اشىپ وتىرعان توعىشارلاردى جاۋاپقا تارتۋدى;
  2. وسىنداي تەكسەرۋدى وبلىستاردا ورنالاسقان جوعارعى وقۋ ورىندارىندا دا جۇرگىزىپ، ناتيجەسىن بىزگە حابارلاۋلارىڭىزدى سۇرايدى.

 

قۇرمەتپەن،

«اق جول» فراكتسياسىنىڭ دەپۋتاتتارى

پىكىرلەر