قازاقستاندا ازاماتتىق قوعام سوڭعى جىلدارى ايتارلىقتاي جاندانىپ، قوعام مەن مەملەكەت اراسىنداعى بايلانىستى نىعايتاتىن ماڭىزدى فاكتورعا اينالىپ كەلەدى. اسىرەسە، ازاماتتاردىڭ بەلسەندىلىگى ارتىپ، قوعامدىق باستامالار كوبەيىپ، ۆولونتەرلىك مادەنيەت جاڭا دەڭگەيگە كوتەرىلدى. بۇل تۋرالى "ادىرنا" ءتىلشىسى مەملەكەتتىك قىزمەتكەر مەن ەرىكتىنىڭ پىكىرىن الىپ، باعامداپ كوردى.
ازاماتتىق بەلسەندىلىك ارتىپ كەلەدى
سوڭعى جىلدارى قازاقستاندىقتار ەل ومىرىنە بەلسەندى ارالاسا باستادى. الەۋمەتتىك جەلىلەر، قوعامدىق باستامالار، ەرىكتىلەر قوزعالىسى — مۇنىڭ ءبارى ازاماتتىق قوعامنىڭ قالىپتاسىپ كەلە جاتقانىن كورسەتەدى.
مەملەكەتتىك قىزمەتشى ارايلىم مىرزابەكوۆانىڭ ايتۋىنشا، بۇگىندە حالىقتىڭ پىكىرىن ەسكەرۋگە باعىتتالعان تەتىكتەر كوبەيگەن.
«قازىرگى تاڭدا ازاماتتار مەن مەملەكەت اراسىنداعى ديالوگ كۇشەيىپ كەلەدى. ءارتۇرلى قوعامدىق كەڭەستەر، اشىق الاڭدار ارقىلى تۇرعىندار ءوز ۇسىنىستارىن ايتىپ، شەشىم قابىلداۋ پروتسەسىنە قاتىسا الادى. بۇل – ازاماتتىق قوعامنىڭ دامۋىنىڭ ناقتى كورىنىسى»، – دەيدى ول.
ۆولونتەرلىك – قوعامنىڭ قوزعاۋشى كۇشى
ازاماتتىق قوعامنىڭ ماڭىزدى بولىگى – ۆولونتەرلىك قوزعالىس. سوڭعى جىلدارى ەرىكتىلەر سانى ارتىپ، ولار الەۋمەتتىك، ەكولوگيالىق جانە قايىرىمدىلىق باعىتتارىندا بەلسەندى جۇمىس ىستەپ كەلەدى.
ۆولونتەر بولىپ جۇمىس ىستەگەن ايجان مامەش بۇل تاجىريبەنىڭ قوعامعا دا، ادامعا دا ۇلكەن اسەرى بار ەكەنىن ايتادى.
«ۆولونتەرلىك – تەك كومەك بەرۋ عانا ەمەس، بۇل جاۋاپكەرشىلىك پەن جاناشىرلىقتى قالىپتاستىرادى. مەنىڭشە، ادامدار ءبىر-بىرىنە بەيجاي قاراماي، كومەكتەسە باستاعاندا قوعام دا وزگەرەدى»، – دەيدى ول.
دامۋ بار، بىراق شەشىمىن كۇتكەن ماسەلەلەر دە جەتكىلىكتى
سونىمەن قاتار، ازاماتتىق قوعامدى دامىتۋدا بىرقاتار ماسەلەلەر دە بار. كەي وڭىرلەردە بەلسەندىلىك تومەن، ال كەيبىر قوعامدىق ۇيىمداردىڭ رەسۋرسى جەتكىلىكسىز.
ساراپشىلاردىڭ پىكىرىنشە، بۇل باعىتتا حالىقتىڭ قۇقىقتىق ساۋاتتىلىعىن ارتتىرۋ، ازاماتتىق باستامالاردى قولداۋ جانە وڭىرلىك تەڭسىزدىكتى ازايتۋ ماڭىزدى.
جالپى العاندا، قازاقستاندا ازاماتتىق قوعام قالىپتاسۋ كەزەڭىنەن ءوتىپ، دامۋ ساتىسىنا بەت العانى بايقالادى. ەڭ باستىسى – بۇل ءۇردىس تۇراقتى جالعاسىپ، ءار ازامات ەلدىڭ دامۋىنا ۇلەس قوسا الاتىن ورتا قالىپتاسىپ كەلەدى.
