وسى جىلدىڭ 3 مامىرىنان باستاپ تۇركىلەردىڭ رۋحاني استاناسى تۇركىستاننان ستامبۋلعا تىكەلەي ۇشاقپەن جەتۋگە مۇمكىندىك اشىلادى. تۇرىك اۋە جولدارى 3 مامىردان باستاپ تۇركىستان-ستامبۋل باعىتى بويىنشا ۇشاق رەيستەرى اشىلاتىنىن مالىمدەدى دەپ حابارلايدى «ادىرنا» ۇلتتىق پورتالى دەرەككوزگە سىلتەمە جاساپ.
قازاقستان ونەركاسىپ جانە ينفراقۇرىلىمدى دامىتۋ مينيسترلىگىنىڭ حابارلاۋىنشا، ۇشاق رەيستەرى اپتاسىنا ءۇش رەت قاتىنايتىنىن ايتتى. ۆ-737 تيپتەگى ۇشاقتارمەن ەندى قازاقستاندىقتار تۇركياعا الاڭسىز بارىپ قايتاتىن بولادى. سونىمەن قاتار تۇركىستان اۋەجايىنان الداعى ۋاقىتتا بىشكەككە جانە تاشكەنتكە دە تىكەلەي ۇشاق رەيستەرى اشىلاتىنى دا وسى اقپاراتتا ءسوز ەتىلگەن.
ەستەرىڭىزگە سالىپ وتەيىك، بيىلعى 21 ناۋرىز كۇنى تۇركىستان حالىقارالىق اۋەجايىنان ستامبۋلعا العاشقى رەيس ساپارعا شىققان بولاتىن. Fly Arystan اۋە كومپانياسى وتە ارزان ۇشاق بيلەتتەرىن ساتىپ، قازاقستاندىقتارعا تۇركياعا بارىپ كەلۋىنە ۇلكەن جاعداي جاساعان. ەندى الداعى ۋاقىتتا تۇرىك اۋە جولدارى ءوز ۇشاقتارىن تۇركىستان-ستامبۋل باعىتىنا قوسسا، اربىرىڭىزگە تۇركيانى كوزبەن كورىپ قايتۋ اسا قيىنعا سوقپايتىنى انىق. ويتكەنى، اۋە كومپانيا رەيستەرى نەعۇرلىم كوپ بولسا، سوعۇرلىم ۇشاق بيلەتىنىڭ باعاسى دا ءتيىمدى بولا تۇسەدى ەمەس پە؟! ولاي بولسا، تۇركيانى كورۋ ەندى بۇرىنعىداي ارمان بولمايتىن شىعار.
"ادىرنا" ۇلتتىق پورتالى.
