ەرلىك – ەلگە مۇرا، ۇرپاققا – ۇلگى. دەي تۇرعانمەن «ەرلىكتى جاساۋ ءۇشىن قولىڭا قارۋ الىپ، جاۋىڭمەن ارپالىسۋىڭ كەرەك» دەگەن قاعيدا جوق. بەيبىت زاماننىڭ دا ەرلىككە لايىقتى ءتۇرلى ىس-ارەكەتتەرى بولادى. جۋىردا قر مادەنيەت مينيسترلىگىنىڭ تاپسىرىسى بويىنشا ش.ايمانوۆ اتىنداعى «قازاقفيلم» اق تۇسىرگەن «بەيسەتاي داۋرەنبەكوۆ جانە 12 تاعدىر» اتتى جاڭا دەرەكتى ءفيلمنىڭ كورستەتىلىمىندە بولىپ، بەيبىت كۇندەگى قاھارماننىڭ ءومىر جولىمەن تانىستىق.
دەرەكتى ءفيلمنىڭ جەلىسى وسىدان جارتى عاسىرعا جۋىق بۇرىن الماتى وبلىسىندا بولعان قايعىلى وقيعاعا نەگىزدەلەدى. وقيعا بىلاي بولعان ەكەن. ءدارىباي اۋىلىندا قازاقتاردان باسقا ورىس، بەلورۋس، ۋكراين، شەشەن، پولياك سياقى ۇلتتار دا تۇراتىن. وسى ۇلت وكىلدەرىنىڭ بالالارى ۇشجارماداعى ورىس ينتەرناتىندا ءبىلىم الدى. سول زاماننىڭ ءۇردىسى بويىنشا كەيبىر قازاق وتباسىلارى دا بالالارىن سول ينتەرناتقا بەرگەن ەكەن. بالالار ينتەرناتقا بارۋ ءۇشىن ىلە وزەنىنىڭ ارعى بەتىنە قايىقپەن (كوپىر بولماعاسىن) ءوتىپ ءجۇردى. بىردە ۇستىنە 15 ينتەرنات تاربيەلەنۋشىسىن تيەگەن پاروم وزەن ورتاسىندا اۋدارىلىپ كەتەدى. سول مەزەتتە وزەن جاعاسىندا جۇرگەن بەيسەتاي داۋرەنبەكوۆ دەرەۋ سۋعا ءتۇسىپ، 12 بالانى قۇتقارىپ قالادى. ال ۇشەۋى بەيسەتاي سۋ ورتاسىنا جەتەم دەگەنشە اعىپ كەتەدى. اجال اۋزىندا تۇرعان 12 ادامنىڭ ءومىرىن امان الىپ قالعان جاس جىگىتتىڭ ەرلىگى بۇگىنگە دەيىن ەل جادىندا ساقتاۋلى.
بەيسەتاي داۋرەنبەكوۆ قازىر 78 جاستا. امان قالعان 12 وقۋشى وعان العىستارىن ايتۋدان تانعان ەمەس. قازىر سول 12 وقۋشىدان 60-قا جۋىق ۇرپاق تاراعان.
فيلم رەجيسسەرى قايرات قۋانىشباەۆ وسى تۋىندىسى ارقىلى ەل اراسىنداعى بەيمالىم قاھارماندى شىنايى قالپىمەن جەتكىزۋگە تىرىسقانىن اڭعارۋعا بولادى. «بۇل وقيعا جايىندا دوسىم – سۋرەتشى جانۇزاق ءمۇساپىر ايتىپ بەرگەن بولاتىن. ءفيلمنىڭ باستى كەيىپكەرى جاساعان ەرلىك كەز كەلگەن ادامنىڭ قولىنان كەلە بەرمەيدى. مۇنداي جانقيارلىق ارەكەتتى جاساۋ بەيسەتاي اقساقالدىڭ تاعدىرىنا جازىلعان بولار» دەدى ول.
اسەت ەرنازاروۆ، «قازاقفيلم» اق «دەرەكتى فيلمدەر جانە كينوشەجىرە» شىعارماشىلىق-وندىرىستىك بىرلەستىگىنىڭ جەتەكشىسى:
-بۇل تۋىندىنىڭ اۆتورى قايرات قۋانىشباەۆ وقيعامەن ون جىلدان بەرى تانىس. وقيعانى ەستىگەن سوڭ، فيلم ءتۇسىرۋدى ويلاستىرىپ قويدى. ءبىز جوسپارعا ەنگىزگەننەن كەيىن تۇسىرىلە باستادى. قازىرگى دەرەكتى فيلمدەر ماقتاۋ مەن ماداقتاۋلارعا تولىپ كەتكەنىن كورىپ ءجۇرمىز. قايراتتىڭ بۇل تۋىندىسىنان تەك شىنايىلىقتى عانا كورۋگە بولادى. ءبىزدىڭ حالىق شىنايى دەرەكتى ءفيلمدى كورۋگە سۋساپ وتىر. بۇل فيلم سول ۇدەدەن شىعادى دەپ ويلايمىن. قازىر كينونى بىرنەشە حالىقارالىق بايقاۋلارعا شىعارايىن دەپ جاتىرمىز. كەم دەگەندە ەكى جۇلدەدەن ءۇمىتىمىز بار.
جاسۇلان ناۋرىءزالى
