ەلىمىزدە ومىرگە كەلەتىن ءاربىر 9-شى ءسابيدىڭ كىندىگى الماتى پەرزەنتحانالارىندا كەسىلەدى. بۇل تۋرالى الماتى قالاسى دەنساۋلىق ساقتاۋ باسقارماسى كەڭەيتىلگەن القا كەڭەسى وتىرىسىنىڭ قورىتىندىسىندا باياندالدى.
الماتى - ەلىمىزدەگى حالىق كوپ شوعىرلانعان الىپ شاھار. 2016 جىلى 43 مىڭ نارەستە تۋسا، ونىڭ 5-ەۋى ۇشەم، 532-ءسى - ەگىزدەر. ياعني، الماتى پەرزەنتحانالارىندا تاۋلىگىنە 100-دەن استام انا بوبەگىن باۋىرىنا باسادى.
سونىمەن قاتار، دەنساۋلىق ساقتاۋ باسقارماسى ءباسپاسوز قىزمەتىنىڭ مالىمدەۋىنشە، الماتىدا قىزمەت كورسەتۋ نارىعىندا باسەكەگە قابىلەتتىلىكتى دالەلدەي العان قالانىڭ دەنساۋلىق ساقتاۋ سالاسىندا يننوۆاتسيالىق دامۋ قارقىنى تۇراقتى ارتىپ كەلەدى.
«قالا ەمحانالارىندا مەديتسينا قىزمەتكەرلەرىنىڭ جۇمىسىن جەڭىلدەتەتىن جانە پاتسيەنتتەرگە بارىنشا قولايلى جاعداي تۋعىزاتىن 15 باعدارلامالىق يننوۆاتسيالىق تەحنولوگيالار مەن ەلەكتروندىق شەشىمدەر («ەلەكتروندى تىركەۋ»، «سىرقاتتانۋ پاراعى»، «فليۋوروتەكا»، «يممۋندىق پروفيلاكتيكا»، «اقپاراتتىق دۇڭگىرشەكتەر»، «باسشى كەيسى»، قالالىق گلاۋكوما ورتالىعىنىڭ باعدارلامالىق ءمودۋلى جانە ت.ب) قىزمەت اتقارادى.
ايتا كەتەيىك، 2016 جىلى الماتى قالاسىنىڭ دەنساۋلىق ساقتاۋ جۇيەسى قازاقستان رەسپۋبليكاسىنىڭ دەنساۋلىق ساقتاۋ سالاسىن دامىتۋدىڭ «دەنساۋلىق» مەملەكەتتىك باعدارلاماسى مەن الماتى قالاسىنىڭ اكىمدىگى بەكىتكەن وڭىرلىك ءىس-شارالار جوسپارىن ىسكە اسىرۋدى باستادى.
دەنساۋلىق باسقارماسىنىڭ حابارلاۋىنشا، جىل ىشىندە مەديتسينالىق كومەك كورسەتۋدىڭ نەگىزگى ينديكاتورلارىنىڭ جاقسى كورسەتكىشتەرىنە قول جەتكىزدى. «قالا تۇرعىندارىنىڭ تۋ كورسەتكىشى 18%-عا ءوستى (1000 ادامعا شاققاندا 1991 جىلى 15,8-دەن 2015 جىلى 17,52-گە دەيىن), قازاقستان رەسپۋبليكاسى بويىنشا 8,2%-عا ءوستى; جالپى ءولىم كورسەتكىشى 28%-عا (1000 ادامعا شاققاندا 8,6-دان 6,34-كە دەيىن), قازاقستان رەسپۋبليكاسى بويىنشا 6%-عا تومەندەدى، حالىقتىڭ تابيعي ءوسىمى 2 ەسەگە دەيىن ارتتى (1000 ادامعا شاققاندا 7,2-دەن 11,41-گە دەيىن), قازاقستان رەسپۋبليكاسى بويىنشا 17%-عا ارتتى، انا ءولىمى 33 ەسەگە (100 مىڭ ءتىرى تۋعانعا شاققاندا 78,4-تەن 2,4-كە دەيىن), قازاقستان رەسپۋبليكاسى بويىنشا 5,4 ەسەگە تومەندەدى، نارەستە ءولىمى 3,2 ەسەگە (100 مىڭ ءتىرى تۋعانعا شاققاندا 22,9-دان 7,2-گە دەيىن), قازاقستان رەسپۋبليكاسى بويىنشا 3 ەسەگە تومەندەدى.
قالا تۇرعىندارىنىڭ قان اينالىمى جۇيەسىنەن بولاتىن ءولىمى 3,2 ەسەگە دەيىن (100 مىڭ ادامعا شاققاندا 443,5-تەن 139,5-كە دەيىن), قازاقستان رەسپۋبليكاسى بويىنشا 1,9-عا دەيىن تومەندەدى، قاتەرلى ىسىكتەن بولاتىن ءولىم كورسەتكىشى 45%-عا (100 مىڭ ادامعا شاققاندا 171,0-نان 94,3-كە دەيىن), قازاقستان رەسپۋبليكاسى بويىنشا 33%-عا تومەندەدى. جازاتايىم وقيعالاردان، جاراقاتتاردان جانە ۋلانۋدان بولاتىن ءولىم 47%-عا (100 مىڭ ادامعا شاققاندا 100,5-تەن 53,4-كە دەيىن), قازاقستان رەسپۋبليكاسى بويىنشا 23%-عا تومەندەدى. كۇتىلەتىن ءومىر ءسۇرۋ ۇزاقتىعى 5,2 جىلعا ءوستى (70 جاستان 75,2 جاسقا دەيىن), قازاقستان رەسپۋبليكاسى بويىنشا 4,4 جىلعا (67,6-دان 72 جاسقا دەيىن) ءوستى.
