قازاقستان مەن قىتاي قورعاس وزەنىندە بىرلەسكەن دوستىق سۋ ەلەكتر كەشەنىندە سۋ قويماسىن سالۋدى جوسپارلاپ وتىر، دەپ حابارلايدى «ادىرنا» ۇلتتىق پورتالى ەكولوگيا مينيسترلىگىنىڭ ءباسپاسوز قىزمەتىنە سىلتەمە جاساپ.
بۇل سۋ قويمانى سالۋ ءۇشىن جوبالىق-سمەتالىق قۇجاتتاما دايىندالدى. بۇل شەشىمدى سۋ رەسۋرستارى كوميتەتىنىڭ «كازۆودحوز» رمك باس ديرەكتورى التاي ەلجاسوۆ ايماققا جۇمىس ساپارى بارىسىندا قابىلدادى.
دوستىق سۋ ەلەكتر كەشەنى قىتايمەن شەكارادا، قورعاس ترانسشەكارالىق وزەنىندە ورنالاسقان. كەشەن 2013 جىلى قولدانىسقا بەرىلدى. ونىڭ اۋماعى 14,5 مىڭ گەكتاردى قۇرايدى. ال قۇرىلىمنىڭ سىيىمدىلىعى - 456,0 م3/س.
ۇكىمەتتىڭ ايتۋىنشا، كەيىنگى ءۇش جىلدا كورشى مەملەكەتتەن ازداعان اعىن سۋ كەلىپ، كليماتتىق اۋىتقۋ بولعان. اتالمىش ماسەلەنى شەشۋدىڭ جالعىز جولى – قورعاس وزەنىنە سۋ قويماسىن سالۋ بولىپ وتىر.
«ءبىزدىڭ اۋدانداعى باستى ماسەلەلەردىڭ ءبىرى – سۋارمالى سۋدىڭ جەتىسپەۋشىلىگى. بۇل ەكولوگيالىق جاعدايمەن تىكەلەي بايلانىستى. شىندىعىندا تاۋلاردا مۇزدىقتاردىڭ ازايۋى بايقالادى. ال بۇل سۋدىڭ از مولشەردە كەلۋىنە اكەلەدى. ەكى ەل دە وسى وزەن سۋىمەن بىردەي بولىسەدى. الايدا جەتكىزىلەتىن سۋ وزەن ارناسى بويىمەن وتەتىندىكتەن، سۋ قويماسىن سالۋ ارقىلى ماسەلەنى تۇبەگەيلى شەشۋگە بولادى»، – دەدى «كازۆودحوز» الماتى فيليالىنىڭ پانفيلوۆ وندىرىستىك ۋچاسكەسىنىڭ باستىعى تۇرىسبەك نۇراحمەتوۆ.
جەرگىلىكتى اكىمدىك اتالمىش جوبانى ۇكىمەت پەن ەكولوگيا، گەولوگيا جانە تابيعي رەسۋرستار مينيسترلىگىنىڭ قاراۋىنا جىبەرەدى دەپ كۇتىپ وتىر. ال قازاقستان ۇكىمەتى قىتايمەن سۋدى ءبولۋ تۋرالى كەلىسسوزدەر جۇرگىزۋدى باستاپ كەتتى.
"ادىرنا" ۇلتتىق پورتالى
