گرۋزيادا بەلگىسىز سەبەپتەرگە بايلانىستى 26 جاستاعى قازاقستاندىق قازا تاپتى. اقپاراتتى سىرتقى ىستەر مينيسترلىگى مەن گرۋزيانىڭ ىشكى ىستەر مينيسترلىگى راستاعان. بۇل تۋرالى حابار 24 ايتتى، دەپ حابارلايدى «ادىرنا» ۇلتتىق پورتالى.
مارقۇمنىڭ ەسىمى – اسەل ايتپاەۆا. ونىڭ نەمەرە ءسىڭلىسى قىزدىڭ اجال قۇشار الدىندا قۇربىسىنا اۋديوجازبا جىبەرىپ ۇلگەرگەنىن ايتتى. وندا بەلگىسىز ەر ادامنىڭ قوقان-لوققى كورسەتكەن داۋىسى جازىلىپ قالعان. ءسىڭلىسىنىڭ ايتۋىنشا، اسەل ايتپاەۆا گرۋزياعا تۋىسقانىنىڭ شاقىرۋى بويىنشا ۋاقىتشا تابىس تابۋعا كەتكەن ەكەن. بىرنەشە كۇن بۇرىن بايلانىسقا شىقپاي قالعان. سوڭعى اۋديوجازبا 5 مامىردا كەلگەن.
«باسىندا ەشقانداي كۇمان مەن كۇدىك بولمادى. ويتكەنى شاقىرعان ادام تۋىسقانىمىز. ەكىنشىدەن ول جاقتاعىلار ورىس ءتىلىن جەتىك بىلەتىن ماماننىڭ بولماۋىنا بايلانىستى جۇمىسى جۇرمەي جاتقانىن ايتتى. ال قازاقستاندىق ازاماتتار گرۋزياعا كولىك ساتىپ الۋ ءۇشىن ءجيى بارادى ەكەن. «گرۋزيادا ورىس تىلىندە سويلەيتىن ادامدار از، ساتىلىم بويىنشا كەڭەس بەرەتىن كونسۋلتانت قىز كەرەك» دەدى.
اسىعىس شەشىم قابىلداعانىمىز دا سوندىقتان. تبيليسيدەن 20 شاقىرىم قاشىقتىقتا جاتقان جەرگە بارعان. اۋديوجازبادا گرۋزيالىق ازامات قىزدى قالاي قورقىتىپ، ۇرعانى تۋرالى ايتقان. مەنىڭ تۇسىنۋىمشە، اپكەم قورلىققا شىداماعان سياقتى. ناقتى بىلمەدىم. مۇمكىن ول گرۋزيالىق ازامات كومەكتەسكەن بولار. كىمنىڭ كىمگە سەس كورسەتكەنىن ءدوپ باسىپ ايتا المايمىن»، – دەيدى مارقۇمنىڭ ءسىڭلىسى اينا ايتپاەۆا.
"ادىرنا" ۇلتتىق پورتالى
