قىزىلوردا وبلىسى، شيەلى اۋدانى، جيدەلىارىق اۋىلىندا ءبىر جارىم جىل ىشىندە بىردە-ءبىر قىلمىس فاكتىسى تىركەلمەگەن، دەپ حابارلايدى «ادىرنا» ءتىلشىسى. بۇل تۋرالى Polisia.kz باعدارلاماسىنىڭ كەزەكتى شىعارىلىمىندا ايتىلدى.
قازىرگى تاڭدا اۋىلدا 518 وتباسى تۇرادى. جەرگىلىكتى تۇرعىنداردىڭ ايتۋىنشا، اۋىلدا 2019 جىلدان باستاپ بۇگىنگە دەيىن بىردە-ءبىر قىلمىس جاسالماعان. بۇعان ازاماتتاردىڭ تاتۋ-ءتاتتى قاتىناستا بولۋى جانە ۋچاسكەلىك پوليتسيا ينسپەكتورىنىڭ قولعا العان پروفيلاكتيكالىق شارالارى نەگىز بولدى. اتاپ ءوتۋ كەرەك، اتالمىش اۋىلدا ەكى دۇكەن بار، الايدا، ەشقايسىسىندا الكوگول ساتىلمايدى.
توقتارباي دۋلاتوۆ – وسى ايماقتىڭ تۋماسى. ۋچاسكەلىك ينسپەكتور بولعاندىقتان، ول ءبىرىنشى كەزەكتە اۋىل تۇرعىندارىمەن جانە اقساقالدارمەن، كەنت اكىمشىلىگىمەن، جەرگىلىكتى مەكتەپ وقۋشىلارىمەن جانە ولاردىڭ اتا-انالارىمەن ءوزارا بايلانىس ورناتقان. ۋچاسكەلىك ينسپەكتور اۋىل اكىمشىلىگىمەن بىرگە مال جايۋدى ۇيىمداستىردى. ەندى جانۋارلار ۇنەمى باقىلاۋدا. سونىمەن قاتار، توقتار كومەكشىلەرىمەن بىرگە اتپەن نەمەسە كولىكپەن كەنتتى جانە ونىڭ اينالاسىن ۇنەمى پاترۋلدەيدى.
– توقتار وسى اۋىلعا كەلگەلى قىلمىس ازايىپ، اۋىلىمىزدا قازىر مال ۇرلىعى جوق دەپ ايتۋعا بولادى. ۋچاسكەلىك ينسپەكتور مەكتەپ قىزمەتكەرلەرىمەن تىعىز بايلانىستا. وقۋشىلارمەن، اتا-انالارمەن رەيدتەر ۇيىمداستىرىپ تۇرادى، – دەدى اۋىل اكىمى ەرلان ابىلداشەۆ.
جيدەلىارىقتا “ساقشى-سارباز” قوعامدىق بىرلەستىگى جۇمىس ىستەيدى. كۇن سايىن ەكى اۋىل تۇرعىنى ۋچاسكەلىك ينسپەكتورعا ءتارتىپتى قاداعالاۋعا كومەكتەسەدى. جالپى، قىزىلوردا وبلىسى بويىنشا مال ۇرلىعى فاكتىلەرى 20%-عا ازايعان. بۇعان قۇقىق قورعاۋ ورگاندارىنىڭ ارنايى ازىرلەگەن الدىن-الۋ شارالارى جانە وسى قىلمىس ءۇشىن جازانى كۇشەيتۋ ىقپال ەتتى. ەندى مال ۇرلىعى ءۇشىن بارلىق مۇلىكتەن ايىرىلىپ، ءىستىڭ ءمان-جايىنا بايلانىستى 5 جىلدان 12 جىلعا دەيىن باس بوستاندىعىنان ايىرۋ جازاسى قاراستىرىلعان.
– ساقشى-ساربازدارمەن بىرىگىپ، تۇندە دە، كۇندىز دە قىلمىستىڭ الدىن-الۋ پروفيلاكتيكالىق جۇمىستارىن جۇرگىزەمىز. وسى جۇمىستاردىڭ ناتيجەسىن ەلەپ، قىزىلوردا وبلىسىنىڭ پوليتسيا دەپارتامەنتىنىڭ باستىعى NIVA جاڭا اۆتوكولىگىن بەردى، – دەپ اتاپ ءوتتى ۋچاسكەلىك ينسپەكتور توقتارباي دۋلاتوۆ.
«ادىرنا» ۇلتتىق پورتالى
