قۇرمەتتى قوناقتى اۋەجايدا وبلىس اكىمى ارحيمەد مۇحامبەتوۆ باستاعان وبلىس اكىمدىگىنىڭ وكىلدەرى قارسى الدى.
ايدا عالىمقىزى قوستاناي وبلىستىق راديو جانە تەلەارنانىڭ 60 جىلدىعىنا ارنالعان سالتاناتتى ءىس-شاراعا قاتىستى. ءىس – شارا بارىسىندا ديرەكتسيانىڭ 14 قىزمەتكەرى اقپارات جانە قوعامدىق دامۋ مينيسترلىگىنىڭ قۇرمەت گراموتالارىمەن، توعىز ادام وبلىس اكىمىنىڭ گراموتالارىمەن ماراپاتتالدى.
بۇدان كەيىن مينيستر وبلىستىق تەلەورتالىققا بارىپ، وبلىستىق راديو جانە تەلەۆيدەنيە ديرەكتسياسىنىڭ جۇمىسىمەن، قىزمەتكەرلەردىڭ ەڭبەك جاعدايىمەن جانە قر ەفيرلىك حابار تاراتۋدى تسيفرلىق فورماتقا كوشىرۋ ارناسىنداعى تەحنيكالىق جاڭالىقتارمەن تانىستى.
- قوستانايعا كەلۋ مەن ءۇشىن ارقاشان ەرەكشە وقيعا. فيليالدىق جەلىنىڭ دامۋى ءاردايىم وبلىس باسشىلىعىنا بايلانىستى، سوندىقتان قوستاناي فيليالىنىڭ بۇل جاعىنان جولى بولدى دەپ ايتا الامىن. فيليال ۇجىمىن 60 جىلدىعىمەن قۇتتىقتايمىن. قوستاناي ەلىمىزدە العاشقىلاردىڭ ءبىرى بولىپ ەفيرلىك تەلەۆيزيانى تسيفرلىق فورماتقا كوشىرۋدى اياقتادى، ءارى قاراي دا جاقسى ناتيجەلەر بولاتىنىنا سەنەمىن، - دەدى ايدا بالاەۆا.
مينيستر ديرەكتسيا ارداگەرلەرى ۆلاديمير مارارعا ("ەڭبەك ارداگەرى" مەدالى) جانە مۇرات مولداحمەتوۆكە ("اقپارات سالاسىنىڭ ۇزدىگى") توسبەلگىلەرىن تابىس ەتتى. ۆلاديمير ۆاسيلەۆيچ "قازتەلەراديو" اق-دا 49 جىل جۇمىس ىستەگەن. ول ءوز مانسابىن نەبارى 18 جاسىندا قاراپايىم مونتەر لاۋازىمىنان باستاعان. بايلانىس ارداگەرى مۇرات مولداحمەتوۆتىڭ دا تاجىريبەسى از ەمەس.
سونداي-اق، مينيسترلىكتىڭ جانە وبلىس اكىمىنىڭ گراموتالارى رتس ينجەنەرلەرىنە، تەحنيكتەرىنە، وبەكت بويىنشا كەزەكشىلەرگە، ليساكوۆ، جىتىقارا، ارقالىق، قوستاناي، اۋداندارىنان انتەننا-ماچتوۆيكتەرگە، ەكونوميستەرگە، اكىمشىلىك پەرسونالعا بەرىلدى.
