3 256 ادام كوروناۆيرۋس جۇقتىرعان جانە ناۋقاستارمەن بايلانىستا بولعان. بۇل - Ashyq قوسىمشاسى ەنگىزىلگەننەن كەيىنگى دەرەك. بۇل تۋرالى دەنساۋلىق ساقتاۋ ءمينيسترى الەكسەي تسوي ۇكىمەت وتىرىسىندا ايتتى، دەپ حابارلايدى «ادىرنا» ۇلتتىق پورتالى.
«Ashyq ەنگىزىلگەن ساتتەن باستاپ 3 256 ادامدا «قىزىل» جانە «سارى» ستاتۋس شىقتى. ونىڭ ىشىندە 1 867 ادامدا پتر-تەست وڭ ناتيجە كورسەتسە، 1 389-ى ناۋقاستارمەن بايلانىستا بولعاندار»، - دەدى مينيستر.
ءمينيستردىڭ ايتۋىنشا، اتالمىش ءموبيلدى قوسىمشا 12 مامىردان نۇر-سۇلتان، 21 مامىردان الماتى اۋەجايلارىندا پيلوتتىق رەجيمدە ىسكە قوسىلعان. سول كەزدە 37 ادامنىڭ ۆيرۋس جۇقتىرعانى جانە 37 ادامنىڭ ىندەتكە شالدىققاندارمەن بايلانىستا بولعانى بەلگىلى بولدى.
«وكىنىشكە قاراي، بۇل ستاتيستيكا كەيبىر ساناسىز ازاماتتار ۇيدە وقشاۋلانۋ رەجيمىن ساقتامايتىنىن كورسەتەدى، ولار حالىق كوپ جينالاتىن ورىندارعا بارىپ، ەل ىشىندە ەمىن-ەركىن جۇرەدى. وسىلايشا باسقا ادامدار مەن ۇشاقتاعى جولاۋشىلارعا ۆيرۋس جۇقتىرۋ قاۋپىن توندىرەدى»، - دەدى تسوي.
"ادىرنا" ۇلتتىق پورتالى
