23-مامىر كۇنى بەلۋراس باسشىسى الەكساندر لۋكاشەنكونىڭ تىكەلەي بۇيرىعىمەن حالىقارالىق اۆياتسيا تاريحىنداعى ۇلكەن قىلمىس جاسالدى. ول افينا قالاسىنان ۆيلنيۋسكە بەت العان جولاۋشىلار ۇشاعىن جويعىش ۇشاقپەن قورقىتىپ، مينسك اۋەجايىنا قونۋعا ءماجبۇر ەتتى. ونداعى بار ماقساتى ۇشاق ىشىندەگى NEXTA تەلەگرام ارناسىنىڭ بۇرىنعى قىزمەتكەرى رومان پروتاسەۆيچتى تۇتقىنداۋ بولاتىن. رومانعا ەل ىشىنە بۇلىك سالدى، سەپاراتيستىك ارەكەتتەرگە باردى، رەۆوليۋتسيا جاساماق بولدى دەگەن اۋىر ايىپتار تاعىلۋدا. الايدا لۋكاشەنكونىڭ بۇل ارەكەتى جازاسىز قالمادى. ءبىر كۇننىڭ ىشىندە ەۋروپا ەلدەرى كەلەسىدەي شەشىمدەر شىعارىپ ۇلگەردى:
- ەو ەلدەرى بەلارۋس ەلىنە بەرەيىن دەپ وتىرعان 3 ملرد ەۋرو بەرىلمەيتىن بولدى. 800 ملن دوللاردى پۋتيننەن جالىنىپ سۇراپ جۇرەتىن لۋكاشەنكو ءۇشىن بۇل ۇلكەن سوققى.
- ەو ەرتەڭ بەلارۋستىڭ اۆياتسيالىق سەكتورىنا، بيزنەس جانە ەكونوميكاسىنا سانكتسيا سالۋ ماسەلەسىن تالقىلايدى.
- ۋكراينا بەلارۋسپەن اۋە قاتىناسىن ءۇزدى. ول بەلارۋس اسپانىن اينالىپ وتەدى.
- لاتۆيا بارلىق بەلارۋس ديپلوماتتارىن ەلىنە قايتاردى.
- بەلنەفتحيم جانە بەلارۋسكالياعا قارسى سانكتسيالار دايىندالىپ جاتىر.
- ۇلىبريتانيا "بەلاۆيا" ۇشاقتارىنىڭ ۇشىپ كىرۋىنە تىيىم سالدى. شۆەتسيانىڭ SAS اۆياكومپانياسى بەلارۋس ۇستىمەن ۇشپايتىن بولدى.
وسىنىڭ ءبارى لۋكاشەنكونىڭ ءبىر عانا ەسسىز ارەكەتىنەن كەيىن ىسكە استى. ءبىر ادامدى ۇستايمىن دەپ ەلىنە وسىنشالىقتى سوققى الىپ كەلدى. ال ۇستالعان رومان پروتاسەۆيچ ءتىپتى NEXTA ارناسىنان كەتىپ قالعانىنا ءبىراز ۋاقىت بولعان ەدى.
"ادىرنا" ۇلتتىق پورتالى
