تۇركىستان وبلىسىندا وزگەنىڭ اتىنان نەسيە راسىمدەگەن الاياق جىگىت ۇستالدى دەپ حابارلايدى "ادىرنا" ۇلتتىق پورتالى Polisia.kz-كە سىلتەمە جاساپ.
كەنتاۋ قپب-عا بىرنەشە جەرگىلىكتى تۇرعىن ارىزدانادى. جابىرلەنۋشىنىڭ ءبىرىنىڭ ايتۋىنشا، ونىڭ اتىنان بەلگىسىز بىرەۋ ونلاين-نەسيە الىپ، 135 مىڭ تەڭگە شىعىن كەلتىرگەن. ال ەكىنشى ارىزدانۋشىنىڭ اتىنان 60 مىڭ تەڭگە الىپ، ونى بانككە قارىز ەتكەن. ءبىراز ۋاقىت وتكەن سوڭ بەرەشەكتەرى كوبەيىپ، بانكتەن حابار كەلگەندە، جابىرلەنۋشىلەر تەز ارادا ءتارتىپ ساقشىلارىنان ءمان-جايدى انىقتاۋعا كومەك بەرۋلەرىن سۇراعان. اتالعان دەرەكتەر قر قك-ءنىڭ 190-بابى (الاياقتىق) بويىنشا تىركەلگەن.
ارىزدانۋشىلاردىڭ شاعىمىنا سايكەس، ورىن العان الاياقتىق قىلمىسىن اشىپ، كۇدىكتىنى انىقتاۋ ماقساتىندا كەنتاۋ قپب پوليتسەيلەرى قاجەتتى ءىس-شارالاردى جۇرگىزدى. تەكسەرۋ جۇمىستارى ناتيجەسىندە، پوليتسەيلەر وسى قىلمىسقا قاتىستى كۇدىكتىنى انىقتاپ، ونى تۇرعىلىقتى مەكەنجايىنان ۇستادى.
الاياقتىق جاساعان جاس جىگىت جابىرلەنۋشىلەردىڭ تانىسى بولىپ شىقتى. وسى ءىستى سوڭىنا جەتكىزىپ، الاياقتىق قىلمىسىنىڭ اق-قاراسىن اجىراتىپ، ناقتى دالەلدەردى تابۋدا كەنتاۋ قپب-نىڭ تەرگەۋ بولىمشەسىنىڭ قىزمەتكەرلەرى قارقىندى قىزمەت جاسادى.
تەرگەۋشى پوليتسيا اعا لەيتەنانتى ايدوس الپىسباي بىلاي دەيدى:
– انىقتالعانداي، كۇدىكتى ازامات تانىستارىنا حابارلاسىپ، ولاردىڭ بانكتىك كارتىشكەلەرىنىڭ نومىرلەرىن سۇراعان. “بىرەۋ اقشا سالاتىن ەدى” دەگەن سىلتاۋمەن جابىرلەنۋشىلەردىڭ ناقتى مالىمەتتەرىن العان الاياق، ودان ارى ءوز ارام ويىن جۇزەگە اسىرعان. جابىرلەنۋشىلەردىڭ اتىنان بانككە سۇرانىس جىبەرىپ، ماقۇلداۋ العان. سودان شاعىمدانۋشىلاردىڭ ەسەپشوتىنا تۇسكەن اقشانى وزىنە اۋدارتىپ الادى. كۇدىكتى ءوز كىناسىن تولىق مويىندادى. سوتقا دەيىنگى تەرگەۋ امالدارى جۇرگىزىلىپ، جيناقتالعان ءىس-قۇجاتتارى ايىپتاۋ اكتىسىمەن سوتقا جولداندى.
پوليتسەيلەر وزگە ازاماتتارعا وزىڭىزگە قاتىستى جەكە، قۇپيا سانداردى ەشكىمگە بەرمەۋ كەرەكتىگىن ەسكەرتەدى. بانكتىك كارتوچكالارىڭىز بەن جەكە كۋالىگىڭىزگە، جالپى قۇجاتتارىڭىزعا ۇقىپتى بولىڭىزدار. ەگەر وسىنداي ينتەرنەت-الاياقتىعىنىڭ كۋاسى نەمەسە قۇربانى بولساڭىز، تەز ارادا پوليتسيانىڭ “102” تەلەفونىنا حابارلاسىڭىزدار.
"ادىرنا" ۇلتتىق پورتالى.
