ادامگەرشىلىكتى بيىك ۇستاپ، كىسىلىكتى تۋ ەتىپ، جانى جارالى جاننىڭ جاسىن ءسۇرتىپ، جىلى لەبىزىن اياماي، قولدان كەلگەن جاردەمىن ۇسىنىپ جۇرگەن جاقسى جاندار تۋرالى دا ءجيى ايتىلادى بۇگىنگى قوعامدا. اۋدانىمىزعا قاراستى گۇلدالا اۋىلىنداعى ايەلدەر قاۋىمىنىڭ ءتورايىمى ايشيگۋل توحتيەۆا دا - قايىرىمدى جاندار قاتارىن تولتىرىپ جۇرگەن كەڭ جۇرەكتى انا. قاشاندا يگى باستامالارعا مۇرىندىق بولىپ جۇرەتىن جان 1 ماۋسىم – بالالاردى قورعاۋ كۇنى مەيرامىنا وراي تاعى ءبىر قايىرىمدى ىسكە سەبەپشى بولدى.
اۋىلداعى «نازۋگۋم» توبىنىڭ ۇجىمى مەن اۋىل بەلسەندىلەرىنىڭ دەمەۋشىلىگىمەن وتىز مۇمكىندىگى شەكتەۋلى بالاعا مەرەكەلىك كەش ۇيىمداستىرىپ بەردى. يگى شاراعا اۋداندىق قوعامدىق كەلىسىم كەڭەسىنىڭ ءتورايىمى جۇماقىز بۇتاباەۆا، قازاقستان رەسپۋبليكاسىنىڭ ۇيعىر ەتنومادەني ورتالىعىنىڭ جانىنان قۇرىلعان انالار كەڭەسىنىڭ ءتورايىمى زورابۋۆي اۋتوۆا، «جانان» فوندىنىڭ پرەزيدەنتى ميزانگۋل اۆامۋسليموۆا، اۋداندىق ۇيعىر ەتنومادەني ورتالىعى جانىنداعى ايەلدەر كەڭەسىنىڭ ءتورايىمى كامينۋر سوپيەۆا مەن ورىنباسارى گۋلبانۋ باكيەۆا، گۇلدالا اۋىلدىق مەشىتىنىڭ يمامى يسمايلجان باكيەۆ، اۋداندىق ۇيعىر ەتنومادەني ورتالىعىنىڭ توراعاسى يمين توحتاحۋنوۆتار ارنايى شاقىرىلعان ەدى. مەرەكەلىك كەش بەساعاش اۋىلىندا ورىن تەپكەن «سانرايز» مەيرامحاناسىندا ءوتتى. كەڭ زالعا جايىلعان مول داستارحان باسىنا جايعاسقان بالالار مەن اتا-انالارعا كونتسەرتتىك باعدارلاما ۇسىنىلدى. بالالار اراسىندا ونەر بايقاۋى ۇيىمداستىرىلىپ، بالالاردىڭ ءبىرى ءان سالسا، ءبىرى بي بيلەپ، ەندى ءبىرى ولەڭ وقىدى. اللا بالالاردى مۇمكىندىگىن شەكتەپ ءبىر سىناسا دا، بويلارىنا تالانتتى توگىپ بەرىپ شاپاعاتىن توگەتىنى دە راس. ارباعا تاڭىلسا دا جۇرەك تەبىرەنتەر اندەرىن شىرقاپ، ولەڭىن وقىعان بالالارعا ءدان ريزا بولدىق. بايقاۋ جەڭىمپازدارىنا ءتۇرلى باعالى سىيلىقتار تابىس ەتىلدى. مەرەكەلىك شاراعا شاقىرىلعان بارلىق بالاعا دەمەۋشىلەر تاراپىنان تاتتىگە تولى دوربالار مەن كاراوكە ميكرافوندار سىيعا تارتىلدى. بۇل كۇنگى كەشتە ۇلكەن دە، كىشى دە داستارحاننان ءدام تاتىپ، كونتسەرت تاماشالاپ، كوتەرىڭكى كوڭىل-كۇيدە تارقاستى.
پەريزات اۋعانبايقىزى
