قازاقستاندا 1,5 ملن-عا جۋىق بالا 2047 ارالاس ءتىلدى مەكتەپتە ءبىلىم الىپ جاتىر. ءبىلىم سالاسى ساراپشىلارىنىڭ پىكىرىنشە، انا ءتىلىمىزدىڭ دامۋىنا كەدەرگى كەلتىرىپ تۇرعان ءبىر توسقاۋىل – وسى ارالاس مەكتەپتەر. قوعامدى الاڭداتقان ماسەلەنى ساراپشىلار MEDIA CLUB QAZAQSTAN الاڭىندا تالقىلادى.
«Nur Otan» پارتياسىنىڭ ءبىلىم مەن عىلىمدى دامىتۋدىڭ رەسپۋبليكالىق قوعامدىق كەڭەسىندە دەپۋتات دينار نوكەتاەۆا ەلىمىزدە جاڭادان اشىلاتىن 800 مەكتەپكە قويىلار باستى تالاپ قازاق تىلىندە ءبىلىم بەرۋى ەكەنىن اتاپ وتكەن. حالىق سانى جىل ساناپ ارتىپ جاتقان ەلوردامىزدا ارالاس ءتىلدى ءبىلىم بەرەتىن مەكتەپتەر كوبەيىپ جاتىر، وكىنىشتىسى، ولاردىڭ سانى قازاق ءتىلدى مەكتەپتەردەن كوپ. ءبىلىم باسقارماسىنىڭ مالىمەتىنشە، نۇر-سۇلتان قالاسىندا جالپى 91 مەملەكەتتىك مەكتەپ بار، ونىڭ 34-ءى قازاق مەكتەبى، 8-ءى ورىس مەكتەبى، 49-ى ارالاس ءتىلدى.
ەفير بارىسىندا مودەراتور ەربولات مۇحامەدجان نۇر-سۇلتان قالاسى ءبىلىم باسقارماسىنىڭ باسشىسىنا ارالاس مەكتەپتەر اشىلاتىن كەزدە جەرگىلىكتى تۇرعىندار اراسىندا جۇرگىزىلگەن ساۋالناما، زەرتتەۋدىڭ ناتيجەسىمەن ءبولىسۋىن سۇرادى.
نۇر-سۇلتان قالاسى ءبىلىم باسقارماسى باسشىسىنىڭ ايتۋىنشا، ەلوردامىزدىڭ سول جاعالاۋىندا ورىس تىلىندە وقىتاتىن مەكتەپتەر از، ءۇش اۋىسىمدى مەكتەپتەر كوپ. سوندىقتان ارالاس مەكتەپ سالۋ بۇل ماسەلەنى شەشەتىنىن ايتادى.
«قانداي دا ءبىر ءىستى باستاماس بۇرىن اناليز جاسالۋى كەرەك. ول جاعىنان كەلىسەمىن، بۇل باعىتتا جۇمىس ىستەيمىز. جەرگىلىكتى تۇرعىنداردان قاجەتتىلىگىمىزدى ەسكەرمەيسىزدەر دەگەن شاعىمدار ءجيى تۇسەدى. استانامىزدىڭ سول جاعالاۋىندا ورىس تىلىندە وقىتاتىن مەكتەپتەر سانى از بولعاندىقتان، اتا-انالار ورىس ءتىلدى سىنىپتار اشۋىمىزدى سۇرايدى. سۇرانىس بار، سوندىقتان ارالاس مەكتەپتەر اشىلۋدا. بارلىق مەكتەپتەر ءۇشىن قازاق ءتىلىنىڭ ءبىلىم باعدارلاماسىن قايتا قاراستىراتىن بولامىز»،-دەيدى نۇر-سۇلتان قالاسى ءبىلىم باسقارماسىنىڭ باسشىسى شاكارىم سەيسەنباي.
ەفير بارىسىندا قوعام قايراتكەرى ورازكۇل اسانعازى ارالاس مەكتەپتەردى اشقانشا، قازاق ءتىلدى مەكتەپتەردىڭ سانىن ارتتىرۋ كەرەك ەكەنىن باسا ايتتى. ءتىل جاناشىرى ەلباسى ن. نازارباەۆتىڭ 2006 قازاقستان حالقى اسسامبلەياسىنىڭ ءحىح سەسسياسىنداعى جاساعان بايانداماسىندا: «قازاق تىلىندە ءبىلىم بەرەتىن مەكتەپتەردە وقيتىنداردىڭ سانى 63 پايىزدى قۇرايدى. ءبىز 2020 جىلعا قاراي بارلىق قازاقستاندىقتاردىڭ 95 پايىزى مەملەكەتتىك ءتىلدى مەڭگەرۋى ءتيىس دەگەن مىندەت قويىپ وتىرمىز»، - دەگەن ءسوزىن العا تارتتى. ەكس-دەپۋتات 2020 جىل ءوتىپ كەتسە دە ورىس سىنىبىندا وقيتىن بالالاردىڭ قازاق ءتىلىن بىلمەيتىنىن ايتىپ، قازىرگى ءبىلىم سالاسى باسشىلارىنا ارالاس مەكتەپتەردەگى يدەولوگيا بولەك ەكەنىن اتاپ ءوتتى.
