يۋري شاتۋنوۆتىڭ اناسى قازاق بولىپ شىقتى

8549
Adyrna.kz Telegram

يۋرا شاتۋنوۆتىڭ قامقورشى قازاق اناسى ءباتيما
حح عاسىردىڭ 80-جىلدارىنداعى سسسر-دەگى ەڭ تانىمال توپ «لاسكوۆىي ماي» ەكەنىن ءبارى دە بىلەدى، توپ ءانشىسى يۋرا شاتۋنوۆتىڭ ونەرىنە ميلليونداعان تابىنۋشىلارى بولعاندىقتان، كۇشەيتىلگەن كۇزەتپەن عانا جۇرەتىن جاعدايعا جەتتى، بۇل توپ تۋرالى «لاسكوۆىي ماي» دەگەن سەريال دا شىقتى، سوندا 13-16 جاستاعى قىزدار يۋرانى قولعا تۇسىرسە تىرناقتارىمەن-اق بولشەكتەپ الىپ كەتەتىن جاعدايعا جەتكەنىن كورۋگە بولادى.
ال، جەتىم قالعان يۋرانى قامقورلىعىنا الىپ قاتارعا قوسقان قازاق ايەلى – ءباتيما بولسىنقىزى تازاكەنوۆا ەكەنىن ايتپاي، ۆالەنتينا نيكولاەۆنا تازيكينوۆا دەپ جاسىرىپ كەلدى.
ورىستار تالانتتى ءانشىنى تاعدىر تالكەگىنەن امان الىپ قالعانى ءۇشىن وسى قازاق ايەلىنە قارىزدار.
ءباتيما بولسىنقىزى تازاكەنوۆا 1946 جىلى 25 ناۋرىزدى چكالوۆ وبلىسىنداعى چەبەنكي ەلدى مەكەنىندە دۇنيەگە كەلدى. 1969-1972 جىلدارى ورىنبور پەداگوگيكالىق ينستيتۋتىندا وقىدى. «رف-نا ەڭبەگى سىڭىرگەن مۇعالىمى»، پەداگوگيكا عىلىمىنىڭ كانديديتى، «وتان الدىندا ەڭبەگى سىڭگەنى ءۇشىن» مەدالىن ۆ.ۆ.ءپۋتيننىڭ قولىنان العان.👍 2015 جىلى 7 قاڭتاردا ورىنبور قالاسىندا قايتىس بولدى.
رەسەيدىڭ ەسترادا جۇلدىزى يۋري شاتۋنوۆقا قالاي قامقورشى انا بولىپ ءجۇر؟
يۋري شاتۋنوۆ 1973 جىلدىڭ 6 قىركۇيەگىندە باشقۇرت اسسر-ءنىڭ كەمىرتاۋ قالاسىندا دۇنيەگە كەلدى. اكەسى ۆاسيلي كليمەنكو (1950-2020), اناسى ۆەرا شاتۋنوۆا (1955-1984). اكەسى بالاسىنان باس تارتقاننان سوڭ، اناسى ءوزىنىڭ فاميلياسىنا جازدىرىپ الدى. 1975 جىلى ەكەۋى اجىراسىپ كەتكەسىن، يۋرا ناعاشى اتا-اجەسىنىڭ قولىندا وسەدى. 1977 جىلى اتاسى قايتىس بولعاسىن ۆەرا بالاسىن قولىنا العانمەن، ەكىنشى كۇيەۋى ماسكۇنەم بولعاندىقتان، مەكتەپكە باراتىن جىلى كەمىرتاۋداعى مەكتەپ ينتەرناتقا تاپسىرادى. 1984 جىلى 7 قاراشادا اناسى ۆەرا اراقتان ۋلانىپ ولگەن سوڭ، ارتىنان كەلەتىن ەشكىمى بولماعاسىن يۋرا ينتەرناتتان قاشىپ كەتىپ قاڭعىباستىق ءومىر كەشىپ، باشقۇرتستان مەن ورىنبور وبلىسىندا كامىلەتكە تولماعاندار ءىسى جونىندەگى ينسپەكتسياعا ۇستاتپاي جۇرەدى، ۇستاپ حاتتاما تولتىرىپ ينتەرناتقا تاپسىرعانمەن ودان دا قايتا قاشىپ كەتىپ ءجۇردى. ورىنبور وبلىسىنداعى اقبۇلاق پوسەلكەسىندەگى مەكتەپ ينتەرناتتا ديرەكتورى ءباتيما بولسىنقىزى، ينسپەكتسيا قىزمەتكەرلەرى ۇستاعان 11 جاستاعى قاڭعىباس يۋرا شاتۋنوۆتىڭ ءىسى تۋرالى شاقىرعاندا، كوك كوزدى سۇيكىمدى ورىستىڭ بالاسىن اياپ، ءوزىنىڭ قامقورلىعىنا الادى. الايدا، كوپ ۇزاماي ءباتيما وبلىس ورتالىعى ورىنبور قالاسىنداعى № 2-ءشى ينتەرنات ديرەكتورلىعىنا قىزمەتى ءوسىپ، كەتىپ قالعاندا، يۋرا قايتادان قاشىپ كەتىپ قاڭعىباستىققا سالىنادى. مۇنى ەستىگەن ءباتيما بولسىنقىزى يۋرا تابىلعان كەزدە، ءوز ينتەرناتىنا اۋدارىپ الادى. ورىنبورداعى وسى ينتەرناتتاعى كوركەمونەرپازدار ۇيىرمەسىنە قاتىستىرادى. وسى ۇيىرمە جەتەكشىسى تالانتتى مۋزىكانت سەرگەي كۋزنەتسوۆ يۋرانىڭ داۋىس ەرەكشەلىگىن بايقاپ، توپ قۇردى، قۇرامىندا ۆ.پونومارەۆ جانە س.سەرىكوۆ بولدى. جەتىم بالالاردان قۇرىلعان بۇل توپتىڭ «لەتو»، «بەلىە روزى»، «سەدايا نوچ» «پۋست بۋدەت نوچ» ت.ب. اندەرىمەن تانىلىپ شاقىرتۋلار الا باستايدى. وزدەرىنىڭ وسى اندەرى سۇرانىسقا يە ەكەنىڭ ءبىلىپ، قازىرگى تىلمەن ايتقاندا «حيت» اندەرىن ماگنيتوفون كاسسەتاسىنا جازىپ، ورىنبور ۆوكزالىنداعى جولاۋشىلارعا ساتا باستايدى. وسىنداي كاسسەتاداعى اندەرىن پوەزد ۇستىندە ەستىگەن، «ميراج» توبىنىڭ مەنەدجەرى اندرەي رازين جولدان ءتۇسىپ قالىپ قايتادان باسقا پوەزعا وتىرىپ ورىنبورعا كەلىپ، تالانتتى جاس جەتىم مۋزىكانتتاردى موسكۆاعا الىپ كەتىپ، پروديۋسسەرى رەتىندە «لاسكوۆىي ماي» توبىن قۇرىپ، ەڭ باي ادامداردىڭ قاتارىنا قوسىلادى.

1991 جىلدىڭ 25 جەلتوقسانىندا اللا پۋگاچەۆانىڭ «روجدەستۆەنسكيە ۆستەچي» كەشىندە جەكە ءان ايتقاسىن، 1992 جىلدىڭ قاڭتارىنان باستاپ جەكە ءانشى بولىپ كەلەدى.
2013 جىلى ءوزىنىڭ قازاق اناسى ءباتيما تازاكەنوۆا باسقاراتىن ورىنبور بالالار ۇيىنە تەكسەرۋ ءجۇرىپ، سوڭى قىلمىستىق ءىس قوزعالعاندا، يۋرا شاتۋنوۆ اناسىنا اراشا ءتۇستى، 30 جىل بولعان ديرەكتورلىق قىزمەتىنەن كەتكەن سوڭ، ەكى جىلدان سوڭ جۇرەككە تۇسكەن كەسەلدەن قايتىس بولعاندا، يۋرا شاتۋنوۆ ءوزىنىڭ پاراقشاسىنا مىناداي كوڭىل ايتۋ جازىپ جولدادى: «ۆالەنتينا نيكولاەۆنانىڭ ورنى مەن ءۇشىن ەرەكشە. ول ماعان انالىق جىلۋ مەن ماحابباتتى سىيلادى. ارامىزدا ەندى جوق ەكەنىن سەزگەندە، كوڭىلىم قۇلازىپ كەتتى. ونىڭ وتە قامقور جانە قايىرىمدى بولعانىڭ جالعىز مەن عانا ەمەس ءبارىمىز دە بىلەتىنبىز. بەينەسى ەسىمىزدە ساقتالىپ جانە بىزگە جەتىسپەيتىن بولادى».

 

باقىتجان ابدۋل-تۇمەنباەۆ،

تاريحشى، جۋرناليست-دايدجەست.

پىكىرلەر