استانا كۇنىنە وراي الماتى وبلىسىندا 200 وتباسى باسپانالى بولدى. قونىس تويىن وبلىس ورتالىعىندا عانا ەمەس، قاپشاعاي قالاسىندا، سونداي-اق ەڭبەكشىقازاق، ىلە اۋداندارىندا اتاپ ءوتتى.
تالدىقورعان قالاسىندا كوپتەن كۇتكەن 55 وتباسى پاتەر كىلتىن قولدارىنا الدى. جاڭا قونىس يەلەرىن وسىنداي ايتۋلى وقيعامەن الماتى وبلىسى اكىمىنىڭ ءبىرىنشى ورىنباسارى ءلاززات تۇرلاشوۆ قۇتتىقتادى.
- مەملەكەتتىك باعدارلامالاردى تابىستى ىسكە اسىرۋدىڭ ارقاسىندا ءبىزدىڭ تاۋەلسىز مەملەكەتىمىزدە ەكونوميكا نىعايىپ، ينفراقۇرىلىم جاقسارۋدا، وبلىستىڭ قالالارى مەن اۋىلدارىنىڭ ءومىر ءسۇرۋ دەڭگەيى مەن كەلبەتىن ەداۋىر جاقسارتاتىن جاڭا الەۋمەتتىك جانە مادەني نىساندار پايدا بولۋدا.155 كوتتەدجدىڭ قۇرىلىسىنا جەرگىلىكتى بيۋدجەتتەن 1,5 ميلليارد تەڭگە ءبولىندى، ال 55 پاتەردى بۇگىن، استانا كۇنىنە وراي بەرەمىز. بارشاڭىزدى مەرەكەمەن جانە قونىس تويىمەن شىن جۇرەكتەن قۇتتىقتايمىن، - دەدى ول.
"كوكتەم" شاعىن اۋدانىندا بەس قاباتتى ءۇي "نۇرلى جەر"باعدارلاماسىن جۇزەگە اسىرۋ اياسىندا سالىندى. ۇيدەگى پاتەرلەردىڭ جالپى سانى - 55, ونىڭ ىشىندە 15 – ءبىر بولمەلى، 15 – ەكى بولمەلى، 20 ء–ۇش بولمەلى، 5-ءتورت بولمەلى. تۇرعىن ءۇي قۇرىلىس جيناق بانكىنىڭ سالىمشىلارى "شاڭىراق"باعدارلاماسى بويىنشا پاتەرلەرگە يە بولدى.
- مىنە، كوپتەن كۇتكەن كۇن كەلدى. مەن ءتىپتى كۇتكەن جوقپىن. بۇگىن ءبىز ءوزىمىزدىڭ ەكى بولمەلى پاتەرىمىزگە يە بولدىق. ءبىز بۇل ءساتتى ۇزاق كۇتتىك. بارشاڭىزدى استانا كۇنىمەن قۇتتىقتايمىز. بۇل ءۇي ءبىز ءۇشىن، قازاقستان تاۋەلسىزدىگىنىڭ 30 جىلدىعىنا ارنالعان ەڭ ۇزدىك سىيلىق دەپ سانايمىن،-دەدى مۇراتبەك بالتابەكوۆ.
سونداي-اق، استانا كۇنىن مەرەكەلەۋ قارساڭىندا ەڭبەكشىقازاق اۋدانىنىڭ ەسىك قالاسىندا 30 وتباسى پاتەر كىلتتەرىنە يە بولدى. پاتەر يەلەرى قاتارىندا جەتىم بالالار، مۇمكىندىگى شەكتەۋلى جاندار جانە حالىقتىڭ الەۋمەتتىك وسال توپتارىنىڭ وكىلدەرى بار. ەكىنشى شاعىن اۋداندا ورنالاسقان جاڭا 30 پاتەرلى ءۇي "نۇرلى جەر"مەملەكەتتىك باعدارلاماسى بويىنشا سالىندى. تۇرعىن ءۇي جانىندا بارلىق الەۋمەتتىك قاجەتتى نىساندار بار.
سونداي-اق، قاپشاعايلىق 50 وتباسىدا قۋانىشقا كەنەلىپ، ءۇيلى بولدى. سونىمەن قاتار، وتەگەن باتىر اۋىلىندا 60 پاتەرلى كوپ قاباتتى تۇرعىن ءۇي پايدالانۋعا بەرىلدى. ءۇيدىڭ جانىندا بالالار الاڭى سالىنىپ، تۇرعىندار ءۇشىن بارلىق جاعداي جاسالعان.
تاۋەلسىزدىكتىڭ 30 جىلدىعىن مەرەكەلەۋ جىلى تاعى دا كوپتەن كۇتكەن قۋانىش-جامبىل اۋدانىندا دارىگەرلىك امبۋلاتوريانىڭ پايدالانۋعا بەرىلۋى، ىلە اۋدانىندا مەكتەپتىڭ جانە تەكەلى قالاسىندا قوناق ءۇي كەشەنىنىڭ اشىلۋى بولدى.
ەكى زاماناۋي امبۋلاتوريا ەلوردا كۇنى قارساڭىندا جامبىل اۋدانىندا ەسىگىن ايقارا اشتى. ەندى ۇڭگىرتاس جانە قاراسۋ اۋىلدارىنىڭ تۇرعىندارىنا ەڭ جاقسى مەديتسينالىق قىزمەتتەر قول جەتىمدى بولادى. ۇڭگىرتاس اۋىلىنىڭ ەمحاناسىندا 58 ەم-دوم بولمەسى بار. ولاردىڭ اراسىندا ەرەسەكتەر مەن بالالارعا ارنالعان قابىلداۋ بولمەسى، ستوماتولوگ، گينەكولوگ، تەراپەۆت كابينەتى، زەرتحانا، تاڭۋ، فەلدشەرلىك، اكۋشەرلىك پۋنكتتەر جانە كۇندىزگى ستاتسيونار بار.
-جاڭا اۋرۋحانا زاماناۋي مەديتسينالىق جابدىقتارمەن جابدىقتالعان. مەكەمە ۋاقىتتىڭ بارلىق تالاپتارىنا سايكەس كەلەدى. اۋىسىمعا 35 ادامعا دەيىن قابىلداۋ مۇمكىندىگى بار، بارلىعى اۋىلدىق وكرۋگتە 4590 تۇرعىن بار. ۇجىم 12 قىزمەتكەردەن تۇرادى. ءبىزدىڭ اۋرۋحانانىڭ دارىگەرلەرى مەن مەدبيكەلەرى ادامدارعا لايىقتى كومەك كورسەتەدى دەپ سەنەمىن", - دەدى امبۋلاتوريا مەڭگەرۋشىسى باعلان توباجانوۆ.
سونىمەن قاتار، اششىبۇلاق اۋىلدىق وكرۋگىندە ەلوردا كۇنىنە وراي 650 ورىندىق "Montessori akademy" جەكەمەنشىك مەكتەبى اشىلدى.
سالتاناتتى شاراعا اۋدان اكىمى باعدات قاراساەۆ قاتىستى. بۇل اۋداندا اشىلاتىن جەتىنشى مەكتەپ.
ينفورماتيكا، ادەبيەت، مۋزىكا كابينەتتەرى، بي زالى جانە سپورت زالى بار. مەكتەپىشىلىك ونەردى دامىتۋ باستى ماقسات بولعاندىقتان، سۋرەتشىلەرگە ارنالعان جەكە بولمە بار.
ايتا كەتەيىك، بۇل وقۋ ورنىندا بالالار مونتەسسوري ادىستەمەسى بويىنشا ءبىلىم الاتىن بولادى.
-قازاقستان رەسپۋبليكاسى تاۋەلسىزدىگىنىڭ 30 جىلدىعىن مەرەكەلەۋ اياسىندا تەكەلى قالاسىندا جوڭعار الاتاۋىنىڭ باۋرايىندا ورنالاسقان جاڭا "VUSLAT" قوناق ءۇي كەشەنىنىڭ لەنتاسى قيىلدى.
قوناق ۇيدە جايلى دەمالىس وتكىزۋ مۇمكىندىگىمەن قاتار "VUSLAT" تۇجىرىمداماسىنا ەكوتۋريزم قاعيدالارى دا ەنگىزىلگەن. تۋريستەر ءۇشىن قازاقستاننىڭ ەڭ بيىك سارقىراماسى – بۇرحان-بۇلاققا شىعۋ جانە جاياۋ ءجۇرۋ مارشرۋتتارى قاراستىرىلعان. قىستا شاڭعى بازاسىنا بارۋ مۇمكىندىگى بار. قوناق ءۇي كەشەنىنىڭ قۇرىلىسىنا 200 ملن. تەڭگە ينۆەستيتسيا تارتىلىپ، 12 تۇراقتى جۇمىس ورنى اشىلدى.
