دۇنيەجۇزىلىك دەنساۋلىق ساقتاۋ ۇيىمىنىڭ باسشىسى تەدروس ادانوم گەبرەيەسۋس COVID-19 اۋرۋىن تۋدىراتىن SARS-CoV-2 كوروناۆيرۋسى قىتايدىڭ ۋحان قالاسىنىڭ زەرتحاناسىندا پايدا بولدى جانە تارالدى دەگەن نۇسقانى تولىقتاي جوققا شىعارۋعا ءازىر ەرتە ەكەنىن مالىمدەدى دەپ حابارلايدى «ادىرنا» ۇلتتىق پورتالى «centralasia.media-عا» سىلتەمە جاساپ.
«مەن ءوزىم لابورانت بولدىم، يممۋنولوگپىن، زەرتحانادا جۇمىس ىستەدىم جانە مۇنداي جاعدايلار زەرتحانادا بولاتىنىن بىلەمىن. مۇنداي جاعداي كەيدە بولادى»، - دەدى ددۇ باسشىسى.
گەبرەيەسۋس بولعان جاعدايدى تەكسەرۋ پاندەميانىڭ تارالۋىنا قانداي دا ءبىر زەرتحانالاردىڭ قاتىسى بار-جوعىن انىقتاۋ ءۇشىن وتە ماڭىزدى ەكەنىن اتاپ ءوتتى.
«بىزگە اقپارات قاجەت، پاندەميا باستالعانعا دەيىن جانە وسى زەرتحانادا قانداي جاعداي بولعاندىعى تۋرالى تىكەلەي اقپارات كەرەك»، - دەگەن ول قىتايدىڭ وسى ماسەلەنى شەشۋ ءۇشىن ىنتىماقتاستىققا دايىن ەكەندىگىن اتاپ ءوتتى.
«ەگەر ءبىز تولىق اقپارات الساق، بۇل زەرتحانانىڭ پاندەميانىڭ تارالۋىنا قاتىسى بار دەگەن بولجامدى جوققا شىعارا الامىز»، - دەدى ددۇ باسشىسى.
ايتا كەتۋ كەرەك، بيىلعى جىل باسىندا ددۇ-نىڭ ارنايى توبى پاندەميانىڭ سەبەپتەرىن زەرتتەۋ ءۇشىن العاش كوروناۆيرۋس انىقتالعان ۋحان قالاسىنا بارعان ەدى. سول كەزدە ساراپشىلار ۆيرۋستىڭ شىعۋىنىڭ ءتورت نۇسقاسىن قاراستىردى: ادامنىڭ جارقاناتتاردان تىكەلەي ينفەكتسيا جۇقتىرۋى، ورتادا باسقا دا جانۋاردان جۇقتىرۋ دەرەگى، تاماق ونىمدەرى ارقىلى بەرىلۋى جانە جاساندى شىعارۋ دەرەگى، ياعني زەرتحانادا جاسالۋى.
ناتيجەسىندە ناۋرىز ايىندا ۇيىم وكىلدەرى تەرگەۋدىڭ الدىن-الا ناتيجەلەرىن جاريالادى. وندا «ۆيرۋس زەرتحانادا جاسالدى» دەگەن بولجام مۇلدەم شىندىققا جاناسپايتىنى ايتىلعان. ناقتى دەرەكتەر الدا بەلگىلى بولماق.
"ادىرنا" ۇلتتىق پورتالى.
