مەديتسينا قىزمەتكەرلەرىنىڭ كاسىبي مەرەكەسىندە وبلىس اكىمى سەرىكباي ترۇموۆ ءبىر توپ دارىگەردى قر دەنساۋلىق ساقتاۋ مينيسترلىگىنىڭ «ەڭبەك ارداگەرى»، «دەنساۋلىق ساقتاۋ ىسىنە قوسقان ۇلەسى ءۇشىن» جانە «دەنساۋلىق ساقتاۋ ءىسىنىڭ ۇزدىگى» توسبەلگىسىمەن جانە قۇرمەت گراموتالارىمەن ماراپاتتادى دەپ حابارلايدى "ادىرنا" ۇلتتىق پورتالىنىڭ ءتىلشىسى.
سالتاناتتى شارادا س.ترۇموۆ ماڭعىستاۋ وبلىسىنىڭ دەنساۋلىق ساقتاۋ سالاسىنىڭ دامۋىنا زور ۇلەس قوسقان 20 مەديتسينالىق مەكەمەگە 100 000 تەڭگەلىك سەرتيفيكاتتار تابىستادى.
ماڭعىستاۋ وبلىسىنىڭ اكىمى دارىگەرلەردى كاسىبي مەرەكەلەرىمەن قۇتتىقتاپ، قاتەرلى ىندەتكە قارسى ارپالىستىڭ الدىڭعى شەبىندە جۇرگەن ماماندارىنىڭ تاباندى ەڭبەكتەرىنە تابىس تىلەدى.
«بۇگىنگى كۇنى ادام ءومىرىن قورعاۋدا ءوز باسىن قاتەرگە تىگىپ جۇرگەن جاندارعا قانداي قۇرمەت كورسەتىلسە دە ارتىق ەتپەيدى. بۇل جەتىستىكتەر – بۇگىنگى تاڭدا قىزمەت اتقارىپ جاتقان ءبىر جارىم مىڭ دارىگەر مەن 6 مىڭنان استام ورتا بۋىن مەديتسينا قىزمەتكەرلەرىنىڭ ەڭبەگىنىڭ ناتيجەسى دەپ بىلەمىز. ولاردىڭ ىشىندە ءوز قىزمەتىنە ادال، ءبىلىمدى دارىگەرلەر مەن مەيىربيكەلەر از ەمەس»،- دەدى س.ترۇموۆ.
ونىڭ ايتۋىنشا، تاۋەلسىزدىك العالى بەرى ماڭعىستاۋ وبلىسىندا 150-دەن استام دەنساۋلىق ساقتاۋ نىسانى ىسكە قوسىلعان. وزىق ۇلگىدەگى انا مەن بالا ءۇيى، قان ورتالىعى، كارديو حيرۋرگيا ورتالىعى اشىلىپ، ەم الۋ ءۇشىن الىسقا سابىلاتىن تۇرعىندارعا وبلىس اۋماعىندا ەمدەلىپ، كۇردەلى وتالاردى جاساۋعا مۇمكىندىك تۋدى. بىلتىر جەدەل-جاردەم اۆتوپاركى 100%-عا جاڭارىپ، تالاپقا ساي، قاجەتتى مەديتسينالىق قۇرالدارمەن تولىق جابدىقتالعان جاڭا كولىكتەر سالىپ الىندى.
اقتاۋ قالاسىنىڭ شاعىن اۋداندارىندا قادامدىق قولجەتىمدىلىك قاعيداتى بويىنشا جاڭا مەديتسينالىق ورتالىقتار اشىلدى. وندا تۇرعىنداردىڭ ەم قابىلداپ، دياگنوستيكا جاساۋى ءۇشىن بارلىق جاعداي جاسالعان. سوڭعى ۇلگىدەگى زاماناۋي قۇرال-جابدىقتارمەن زەرتتەۋدەن وتۋگە، قاجەتتى تالداۋلاردى تاپسىرۋعا، ەمشارا كابينەتىنىڭ قىزمەتتەرىن الۋعا بولادى.
وڭىردە وسى جىلى كوپسالالى بالالار اۋرۋحاناسىندا شۇعىل بالالار حيرۋرگياسىنىڭ ءبولىمى اشىلدى. الداعى ۋاقىتتا حالىقارالىق دەڭگەيدەگى يننوۆاتسيالىق قۇرىلعىلارمەن جابدىقتالعان بۇل بولىمشە مىڭداعان بالانىڭ ءومىرىن ساقتايتىن ورتالىققا اينالماق.
وبلىستا انا مەن بالا ءومىرىن قورعاۋ بويىنشا دا كەشەندى جۇمىستار جاسالۋدا. بيىل تابيعي ءوسىم ءبىر جارىم ەسەگە ارتىپ، 5 ايدا 9 مىڭنان اسا بالا دۇنيەگە كەلدى. انا ءولىمى تىركەلگەن جوق.
"ادىرنا" ۇلتتىق پورتالى.
