30 مىڭنان استام قازاقستاندىق Telegram قولدانۋشىنىڭ دەرەكتەرى جەلىدە تارادى، دەپ حابارلايدى «ادىرنا» ۇلتتىق پورتالى nege.kz سايتىنا سىلتەمە جاساپ.
الاياقتار قازاقستاندىق قولدانۋشىلاردىڭ جەكە دەرەكتەرىن بانك كارتالارىن بۇزۋ ماقساتىندا قوڭىراۋ شالۋ نەمەسە حابارلاما جولداۋ ءۇشىن پايدالانۋى مۇمكىن. بۇل تۋرالى KZ-CERT كومپيۋتەردەگى وقيعالارعا جاۋاپ قايتارۋ قىزمەتى ايتتى.
ورتالىق قىزمەتكەرلەرى ينتەرنەتتىڭ قازاقستاندىق سەگمەنتىنە اقپاراتتىق قاۋىپسىزدىك بويىنشا مونيتورينگ جۇرگىزىپ، مەسسەندجەر ارناسىنىڭ بىرىنەن Telegram جەلىسىن پايدالانۋشىلاردىڭ جەكە دەرەكتەرى تۋرالى 744 مىڭ جازبا توپتالعان فايلدى انىقتادى.
«اناليز ناتيجەسىندە ول فايلدىڭ ىشىندە قولدانۋشىنىڭ ID ادرەسى، اتى-ءجونى، تەلەفون ءنومىرى جانە ء"وزى جايلى" گرافاسىنداعى مالىمەتتەر بار ەكەنى بەلگىلى بولدى. سونىڭ ىشىندە 30 مىڭنان استام اككاۋنتتا قازاقستاندىق نومىرلەر تىركەلگەن»، - دەپ جازىلعان حابارلامادا.
Telegram-ارناسىنىڭ اۆتورى انىقتالعان فايلدى «گلاز بوگا» پلاتفورماسىنداعى كليەنتتەردىڭ بازاسى دەپ تۇسىنىكتەمە بەرگەن. بۇل الەۋمەتتىك جەلى، مەسسەندجەر، ىزدەۋ جۇيەلەرى مەن باسقا دا اقپارات كوزدەرىنەن الىنعان دەرەكتەر نەگىزىندە جيناقتالعان قولدانۋشىلار تۋرالى جەكە مالىمەتتەردى الۋعا مۇمكىندىك بەرەتىن تمد-داعى ءىرى سەرۆيس (قولدانۋشى سانى 1 ميلليوننان اسادى).
ساراپشىلاردىڭ پىكىرىنشە، مۇنداي جەكە دەرەكتەردىڭ تارالۋى الەۋمەتتىك جەلىدەگى الاياقتاردىڭ ول مالىمەتتەردى جەكە باس پايداسىنا، ياعني دەربەس نەمەسە بانك دەرەكتەرىن الۋ ماقساتىندا قوڭىراۋ شالۋ نەمەسە حابارلاما جولداۋ ءۇشىن قولدانۋى مۇمكىن.
ەسكە سالساق، جەكە ومىرگە قولسۇعۋشىلىق فاكتىسىنە بايلانىستى رەسەيدە «گلاز بوگا» Telegram-بوتىنىڭ جۇمىسى زاڭسىز دەپ تانىلعان.
"ادىرنا" ۇلتتىق پورتالى
