بۇگىن قازاقستاندا جالپى سانى 730 ەلدى مەكەندە اۋىل اكىمدەرىن سايلاۋ بويىنشا داۋىس بەرۋ باستالدى دەپ حابارلايدى "ادىرنا" ۇلتتىق پورتالى.
اۋىل اكىمدەرىنىڭ تىكەلەي سايلاۋىن وتكىزۋ تۋرالى پرەزيدەنت قاسىم-جومارت توقاەۆ ءوزىنىڭ «جاڭا جاعدايداعى قازاقستان: ءىس-قيمىل كەزەڭى» اتتى جولداۋىندا ايتقان بولاتىن.
اۋماقتىق سايلاۋ كوميسسيالارىنىڭ مالىمەتى بويىنشا بۇگىندە 730 سايلاۋ وكرۋگىندە 2582 كانديدات ۇمىتكەرلىككە ۇسىنىلعان. سولاردىڭ 2297-ءى تىركەۋدەن وتكەن. كانديداتتاردىڭ باسىم بولىگى – ءوز-ءوزىن ۇسىنۋشىلار.
سايلاۋ تۋرالى زاڭناماعا ەنگىزىلگەن تولىقتىرۋلار مەن تۇزەتۋلەردىڭ ارقاسىندا اۋىل اكىمدەرىنىڭ سايلاۋىنا تۇسكىسى كەلەتىن ۇمىتكەرگە ءوز-ءوزىن ۇسىنۋ مۇمكىندىگى بەرىلگەن. وسى مۇمكىندىكتى بۇل جولعى سايلاۋدا 1419 ادام پايدالانعان. سونداي-اق، 878 ۇمىتكەردى ادىلەت مينيسترلىگىنىڭ تىركەۋىندە بار 6 ساياسي پارتيا ۇسىنعان. حالىقتىڭ داۋىس بەرۋى ارقىلى اكىم بولعىسى كەلەتىندەردىڭ گەندەرلىك قۇرامىنا كەلسەك، ەر ۇمىتكەرلەردىڭ سانى –1839. ال 458-ءى — ايەل ادامدار.
بۇگىنگى سايلاۋ 14 وبلىس بويىنشا 1847 سايلاۋ ۋچاسكەسىندە ءوتىپ جاتىر. ونىڭ قورىتىندىسى بۇگىن كەشكە بەلگىلى بولادى.
جالپى بيىل جىل اياعىنا دەيىن 775 اۋىل اكىمى سايلانادى. ەلىمىزدە بارلىعى 2346-عا جۋىق اۋىل اكىمى بار. وسىنى ەسكەرسەك 2022 جىلدىڭ باسىندا اۋىل اكىمدەرىنىڭ قۇرامى ۇشتەن بىرگە جاڭارادى.
سونىمەن بۇل جولعى سايلاۋدا اكىمىن انىقتايتىن ەلدى مەكەندەر سانى بويىنشا اقمولا وبلىسى كوش باستاپ تۇر. مۇندا ءبىر كۇندە 95 اۋىل مەن اۋىلدىق وكرۋگتىڭ، اۋداندىق ماڭىزى بار قالا مەن كەنتتىڭ اكىمى سايلانادى. العاشقى ۇشتىكتىڭ قاتارىدا شىعىس قازاقستان (77) جانە قاراعاندى وبلىستارى (75) بار.
"ادىرنا" ۇلتتىق پورتالى.
