Búgin Qazaqstanda jalpy sany 730 eldi mekende aýyl ákimderin saılaý boıynsha daýys berý bastaldy dep habarlaıdy "Adyrna" ulttyq portaly.
Aýyl ákimderiniń tikeleı saılaýyn ótkizý týraly Prezıdent Qasym-Jomart Toqaev óziniń «Jańa jaǵdaıdaǵy Qazaqstan: is-qımyl kezeńi» atty Joldaýynda aıtqan bolatyn.
Aýmaqtyq saılaý komıssııalarynyń málimeti boıynsha búginde 730 saılaý okrýginde 2582 kandıdat úmitkerlikke usynylǵan. Solardyń 2297-i tirkeýden ótken. Kandıdattardyń basym bóligi – óz-ózin usynýshylar.
Saılaý týraly zańnamaǵa engizilgen tolyqtyrýlar men túzetýlerdiń arqasynda aýyl ákimderiniń saılaýyna túskisi keletin úmitkerge óz-ózin usyný múmkindigi berilgen. Osy múmkindikti bul jolǵy saılaýda 1419 adam paıdalanǵan. Sondaı-aq, 878 úmitkerdi Ádilet mınıstrliginiń tirkeýinde bar 6 saıası partııa usynǵan. Halyqtyń daýys berýi arqyly ákim bolǵysy keletinderdiń genderlik quramyna kelsek, er úmitkerlerdiń sany –1839. Al 458-i — áıel adamdar.
Búgingi saılaý 14 oblys boıynsha 1847 saılaý ýchaskesinde ótip jatyr. Onyń qorytyndysy búgin keshke belgili bolady.
Jalpy bıyl jyl aıaǵyna deıin 775 aýyl ákimi saılanady. Elimizde barlyǵy 2346-ǵa jýyq aýyl ákimi bar. Osyny eskersek 2022 jyldyń basynda aýyl ákimderiniń quramy úshten birge jańarady.
Sonymen bul jolǵy saılaýda ákimin anyqtaıtyn eldi mekender sany boıynsha Aqmola oblysy kósh bastap tur. Munda bir kúnde 95 aýyl men aýyldyq okrýgtiń, aýdandyq mańyzy bar qala men kenttiń ákimi saılanady. Alǵashqy úshtiktiń qataryda Shyǵys Qazaqstan (77) jáne Qaraǵandy oblystary (75) bar.
"Adyrna" ulttyq portaly.
