بعم-ءنىڭ اپپارات جينالىسىندا مينيستر اسحات ايماعامبەتوۆ «مۇعالىم مارتەبەسى تۋرالى» زاڭ بۇزىلسا، وندا قاتاڭ شارا قابىلداناتىنىن ايتتى، دەپ حابارلايدى "ادىرنا" ۇلتتىق پورتالى.
- شاعىمدار كوپ ءتۇسىپ جاتىر. ءار شاعىم، ءوتىنىش بويىنشا ءتيىستى شارالار دا قابىلدانىپ جاتىر. قىزمەتىنەن بوساتۋ، تارتىپتىك-اكىمشىلىك جاۋاپكەرشىلىككە تارتۋ جۇمىستارى جالعاسادى. مۇعالىم تەك بالالارعا ساباق بەرۋى كەرەك. باسقا وزىنە ءتان ەمەس جۇمىستارعا تارتۋعا تىيىم سالىنادى. قاعازباستىلىقتى جويۋ بويىنشا جۇمىس ءارى قاراي جالعاسادى. سوندىقتان «مۇعالىم مارتەبەسى تۋرالى» زاڭنىڭ ورىندالۋى بويىنشا جۇمىس جۇرگىزىلە بەرەدى، - دەدى مينيستر.
وسى ورايدا، مينيستر جەرگىلىكتى دەپارتامەنتتەرگە اكىمشىلىك ايىپپۇلدار، تارتىپتىك جاۋاپكەرشىلىككە تارتۋ جۇمىستارىن جالعاستىرۋدى تاپسىردى.
- بۇل ماسەلە جەكە باقىلاۋىمدا بولادى. ەڭ ءبىرىنشى كەزەكتە ءبىلىم باسقارمالارى، ءبىلىم بولىمدەرىنەن باستاۋىمىز كەرەك. ويتكەنى ءار ءتۇرلى ەسەپتەر بويىنشا ساۋالدار ارىپتەستەرىمىزدىڭ دەڭگەيىنەن شىعىپ وتىر. جازدا وتكىزگەن جالپى تالداۋىمىز بۇگىن وسى ماسەلەنى كورسەتتى. سول سەبەپتى اقپاراتتى ءتيىستى ۇلتتىق بازادان عانا الۋ كەرەك. مەكتەپتەرگە ءار ءتۇرلى ەسەپتەر بويىنشا ساۋالدار جولداۋ زاڭعا قايشى كەلەدى، - دەپ مالىمدەدى اسحات ايماعامبەتوۆ.
سونىمەن قاتار مينيستر ەگەر زاڭ بۇزىلسا، وندا قاتاڭ شارا قابىلداناتىنىن ايتتى.
- اۋدان دەڭگەيىندەگى ءبىلىم بولىمدەرىندە، وبلىس دەڭگەيدەگى ءبىلىم باسقارلامالارىندا ماسەلەلەر شەشىلمەي، جەكە قابىلداۋىما كەلىپ، شەشىلىپ جاتقان ماسەلەلەر بار. ولاي بولسا، مەكتەپتەگى ديرەكتور، اۋدانداعى ءبىلىم ءبولىمى باسشىسى، وبلىستاعى ءبىلىم باسقارماسىنىڭ باسشىسى نە ىستەپ وتىر دەگەن سۇراق تۋىندايدى. سۇراقتاردى ءار دەڭگەيدە ءوز قۇزىرەتتىلىگى بويىنشا شەشىڭىزدەر، - دەدى ءبىلىم جانە عىلىم ءمينيسترى.
ەسكە سالا كەتسەك، بۇعان دەيىن تۇركىستان وبلىسىنىڭ سارىاعاش اۋدانىندا وماروۆ اتىنداعى №50 مەكتەپ ديرەكتورى مۇعالىمدەردى كۋرورتتىق ايماقتاعى گولف الاڭىن تازارتۋعا جىبەرگەن بولاتىن. جاعداي انىقتالعاننان كەيىن ول قىزمەتىنەن بوساتىلدى.
"ادىرنا" ۇلتتىق پورتالى
