اباي وبلىسىنىڭ ءبىلىم باسقارماسىنىڭ باسشىسى بولىپ ەردەمبەكوۆ باۋىرجان امانگەلدىۇلى تاعايىندالدى، دەپ حابارلايدى “ادىرنا” ۇلتتىق پورتالى.
بۇل تۋرالى وبلىس اكىمدىگى حابارلادى.
باۋىرجان ەردەمبەكوۆ 1974 جىلى سەمەي قالاسىندا دۇنيەگە كەلگەن. 1996 جىلى سەمەي مەملەكەتتىك ۋنيۆەرسيتەتىن «قازاق ءتىلى مەن ادەبيەتى» ماماندىعى بويىنشا، ال 2016 جىلى قازاق گۋمانيتارلىق-زاڭ ۋنيۆەرسيتەتىن «مەملەكەتتىك جانە جەرگىلىكتى باسقارۋ» ماماندىعى بويىنشا تامامداعان.
ەڭبەك جولىن 1991 جىلى جارما اۋدانى اسقارالى اۋىلىنداعى لەكەروۆ اتىنداعى مەكتەپتە قازاق ءتىلى مەن ادەبيەتى ءپانىنىڭ مۇعالىمى بولىپ باستاعان. ءار جىلدارى ءتۇرلى جوعارى وقۋ ورىندارىندا دەكان، پرورەكتور، كافەدرا مەڭگەرۋشىسى، رەكتور قىزمەتتەرىن اتقاردى.
سونداي-اق ول شاكارىم ۋنيۆەرسيتەتىنىڭ رەكتورى، «اباي جانە ۇلتتىق رۋحانيات» عىلىمي-زەرتتەۋ ورتالىعىنىڭ باس عىلىمي قىزمەتكەرى بولدى. سوڭعى قىزمەتى — شاكارىم ۋنيۆەرسيتەتىندە قازاق فيلولوگياسى جانە جۋرناليستيكا كافەدراسىنىڭ پروفەسسورى.
2025 جىلعى 5 قىركۇيەكتەن باستاپ اباي وبلىسى ءبىلىم باسقارماسىنىڭ باسشىسى قىزمەتىنە كىرىستى.
