ورىنگۇل ارىستان – ەلىمىزدىڭ اتىن حالىقارالىق دەڭگەيگە شىعارىپ، دارىنى مەن تالانتىن بىرنەشە مارتە دالەلدەگەن زەرەك وقۋشى. الەم چەمپيونى قازىرگى تاڭدا نەمەن اينالىسىپ ءجۇر؟ بولاشاقتا كىم بولۋدى ارماندايدى؟ وسى جانە وزگە دە سۇراقتاردىڭ جاۋابىن الۋ ماقساتىندا ەرەكشە قابىلەتى بار جاسپەن تىلدەسىپ، سۇقبات قۇردىق.
«كالكۋلياتور قىز» اتانىپ كەتكەن ارۋ 2006 جىلى اقتاۋ قالاسىندا دۇنيەگە ەسىگىن اشقان. 11 جاسىندا مالايزيا ەلىندە وتكەن مەنتالدى اريفمەتيكا وليمپياداسىندا ءى ورىندى قانجىعاسىنا بايلادى. اراعا ءبىر جىل سالىپ، دۇنيەجۇزىنىڭ 150 ءبىلىمدى جاس ماتەماتيگىمەن بىرگە 30 مىڭ ەسەپتى 26 مينۋت 26 سەكۋندتا شىعارىپ، الەمدىك رەكورد ورناتتى.
«باستاۋىشتا وقىپ جۇرگەنىمدە ماتەماتيكا ءپانى ءبىراز قيىندىقتاردى تۋدىردى. ۇلگەرىمىمدى جاقسارتىپ، ءبىلىمىمدى ارتتىرۋ ءۇشىن انام مەنى 3-سىنىپتا مەنتالدى اريفمەتيكا كۋرستارىنا قاتىستىردى. باستاپقى كەزدەن-اق تەز ۇيرەنىپ كەتتىم. ۇستازىم جىلدام ەسەپتەۋگە دەيىن بەيىمىمدى بايقاپ، ءتۇرلى جارىستارعا قاتىستىرا باستادى. وبلىستىق، رەسپۋبليكالىق، حالىقارالىق دودالاردا باعىمدى سىناپ، چەمپيون اتاندىم»، - دەپ اڭگىمەسىن باستادى كەيىپكەرىمىز.
ورىنگۇلدىڭ ايتۋىنشا، مەنتالدى اريفمەتيكا از عانا ۋاقىتتىڭ ىشىندە ومىرىنە ەلەۋلى وزگەرىستەر اكەلگەن.
«بۇرىن ماتەماتيكا ءپانى مۇعالىمىنەن ەسكەرتۋلەردى ءجيى السام، بۇگىندە ەسەپ شىعارۋدا اسا قينالمايمىن. بۇل سالانىڭ ارقاسىندا كوكجيەگىمدى كەڭەيتىپ، ءبىراز ەلدەردى ارالادىم. سونداي-اق كەرەمەت جاندارمەن تانىستىم»، - دەيدى ول.
قازىرگى تاڭدا جاس دارىن IT مەكتەپ-ليتسەيىنىڭ 9 سىنىپ وقۋشىسى. سۇقبات بارىسىندا العىر ارۋ جاڭا قىزىعۋشىلىعى بار ەكەنىن دە جاسىرمادى.
– 6-سىنىپتا №17 مەكتەپتەن IT ليتسەيىنە اۋىستىم. وقۋىم قيىنداي باستاعان سوڭ، ساباعىما دۇرىس زەيىن قويا باستادىم. ارالاساتىن ورتام دا وزگەرىپ، جاڭا دوستار تاپتىم. بالكىم، سودان بولار، قىزىعۋشىلىقتارىم اۋىسا باستادى. بۇگىندە بيمەن اينالىسامىن، شەتەل ادەبيەتىن وقيمىن. سۇيىكتى كىتابىم – ءحارري پوتتەر. كەيدە سۋرەت سالامىن.
ءبىر قىزىعى، ورىنگۇل ماتەماتيك ەمەس، دارىگەر بولۋدى ارماندايدى.
– بولاشاقتا ءبىلىمدى دە بىلىكتى دارىگەر بولعىم كەلەدى. سەبەبى، مەديتسينالىق ماسەلەلەر كوبەيىپ كەتتى. ولاردىڭ شەشىمىن تاۋىپ، قوعامعا پايدامدى تيگىزگىم كەلەدى. مەديتسينا – وتە قىزىق سالا. الداعى ۋاقىتتا ءبىلىمىمدى شەتەلدىك جوعارى وقۋ ورنىندا جالعاستىرۋدى كوزدەپ وتىرمىن»،– دەپ ءسوزىن قورىتىندىلادى ارۋ.
«ادىرنا» ۇلتتىق پورتالى
