قازاقستان پرەزيدەنتى نۇرسۇلتان نازارباەۆتىڭ توراعالىعىمەن بىرىككەن ۇلتتار ۇيىمى قاۋىپسىزدىك كەڭەسىنىڭ "جاپپاي قىرىپ-جوياتىن قارۋدى تاراتپاۋ: سەنىم شارالارى" اتتى وتىرىسى ءوتتى، - دەپ حابارلايدى اقوردا ءباسپاسوزى.
جيىندى اشقان مەملەكەت باسشىسى وتىرىسقا قاتىسقانى ءۇشىن بىرىككەن ۇلتتار ۇيىمىنىڭ باس حاتشىسى ا.گۋتەرريشكە، پولشا رەسپۋبليكاسىنىڭ پرەزيدەنتى ا.دۋداعا جانە بۇۇ قاۋىپسىزدىك كەڭەسىنە مۇشە باسقا دا ەلدەردىڭ دەلەگاتسيا باسشىلارىنا ريزاشىلىق ءبىلدىردى.
"مۇمكىندىكتى پايدالانا وتىرىپ، پرەزيدەنت دۋدانى پولشانىڭ بىرىككەن ۇلتتار ۇيىمى قاۋىپسىزدىك كەڭەسىنىڭ تۇراقتى ەمەس مۇشەسى رەتىندەگى قىزمەتىنىڭ باستالۋىمەن قۇتتىقتايمىن. سونىمەن بىرگە، كوت-د’يۆۋار، كۋۆەيت، پەرۋ جانە ەكۆاتورلىق گۆينەيانى دا بيىل قاۋىپسىزدىك كەڭەسىنىڭ تۇراقتى ەمەس مۇشەسى بولۋىمەن قۇتتىقتايمىن. جاھاندىق ۇيىمنىڭ وسى ماڭىزدى ورگانى اياسىندا ىنتىماقتاستىق پەن ىقپالداستىق تانىتىپ، بىرلەسە جەمىستى جۇمىس ىستەيمىز دەپ ۇمىتتەنەمىن", - دەدى قازاقستان پرەزيدەنتى.
نۇرسۇلتان نازارباەۆ بەكىتىلگەن كۇن تارتىبىنە سايكەس، ءسوزدى بۇۇ-نىڭ باس حاتشىسى ا.گۋتەرريشكە بەردى.
گۋتەرريشتىڭ بايانداماسىنان كەيىن مەملەكەت باسشىسى كەڭەس مۇشەلەرىنە ارناپ مالىمدەمە جاسادى.
ء"بىز قازاقستاننىڭ بىرىككەن ۇلتتار ۇيىمى قاۋىپسىزدىك كەڭەسىنىڭ تۇراقتى ەمەس مۇشەسى بولىپ سايلانۋىن جانە بۇگىنگى توراعالىق قىزمەتىمىزدى الەمدىك قوعامداستىقتىڭ ەلىمىزگە جانە ونىڭ بەيبىتشىل ساياساتىنا دەگەن سەنىمى دەپ بىلەمىز. بۇل مارتەبەلى قىزمەتتەگى ورتالىق ازيانىڭ ءبىرىنشى مەملەكەتى بولا وتىرىپ، ءبىز دۇنيەجۇزىلىك ۇيىمنىڭ بۇل ماڭىزدى ورگانىنداعى ءوڭىر حالىقتارىنىڭ "ۇنىنە" اينالدىق، - دەدى قازاقستان پرەزيدەنتى.
نۇرسۇلتان نازارباەۆ قازاقستاننىڭ بۇۇ قاۋىپسىزدىك كەڭەسى جۇمىسىنا وتكەن جىلعى قوسقان ۇلەسىن اتاپ ءوتتى.
"اۋعانستان/"تاليبان", يليم/دايش، ء"ال-كايدا" جانە سومالي/ەريترەيا جونىندەگى كوميتەتتەردى باسقارا وتىرىپ، ولاردىڭ جەمىستى قىزمەت ەتۋىنە ءوز ۇلەسىمىزدى قوسىپ كەلەمىز. كەڭەستىڭ بارلىق مۇشە-مەملەكەتتەرىنە بەرىك ىنتىماقتاستىعى ءۇشىن ريزاشىلىعىمدى بىلدىرەمىن", - دەدى مەملەكەت باسشىسى.
قازاقستان پرەزيدەنتى بەيبىتشىلىك پەن قاۋىپسىزدىككە قول جەتكىزۋ جولىنداعى سەنىم شارالارى شيەلەنىستىڭ الدىن الۋ جانە ماڭىزدى جاھاندىق پروبلەمالاردى شەشۋ كەزىندە نەگىزگى ءرول اتقاراتىنىن ايتتى.
"مەن بىرىككەن ۇلتتار ۇيىمى باس اسسامبلەياسىنىڭ 47-ءشى سەسسياسىنىڭ مىنبەرىنەن ازياداعى قاۋىپسىزدىك جانە سەنىم شارالارى جونىندەگى وڭىرلىك قۇرىلىم قۇرۋ تۋرالى ۇسىنىس ايتقان بولاتىنمىن. تىنىمسىز ديپلوماتيالىق جۇمىستىڭ ناتيجەسىندە بۇل مەحانيزمدى قۇرۋعا قول جەتكىزىلدى. بۇگىندە ازياداعى ءوزارا ىقپالداستىق جانە سەنىم شارالارى كەڭەسى وڭىردەگى 26 مەملەكەتتى بىرىكتىرىپ، تابىستى جۇمىس ىستەۋدە. شيرەك عاسىردان كەيىن تاعى دا بىرىككەن ۇلتتار ۇيىمىندا قاۋىپسىزدىك كەڭەسىنىڭ تۇراقتى ەمەس مۇشەسى رەتىندە قازاقستاننىڭ اتىنان ءسوز سويلەپ تۇرمىن", - دەدى نۇرسۇلتان نازارباەۆ.
مەملەكەت باسشىسى سەنىم شارالارىن كۇن تارتىبىنەن تۇسىرمەۋ قاجەتتىگىن ايتىپ، بۇعان ىقپال ەتەتىن بىرنەشە فاكتوردى اتاپ ءوتتى.
قازاقستان پرەزيدەنتى يادرولىق قارۋدى تاراتپاۋ تۋرالى شارتقا نەگىزدەلگەن قارۋدى تاراتپاۋ رەجىمىن نىعايتۋ ماسەلەسىندە تەرەڭ مەنتالدى وزگەرىستەر مەن كوپجاقتى جاڭا ساياسي شەشىمدەر قاجەت ەكەنىن ايتتى.
وسىعان بايلانىستى نۇرسۇلتان نازارباەۆ قارۋدى تاراتپاۋ سالاسىنداعى سەنىمدى نىعايتا تۇسۋگە باعىتتالعان بىرقاتار شارالاردى ۇسىندى.
سوڭىندا مەملەكەت باسشىسى قاقتىعىستاردى ءتيىمدى شەشۋ ءۇشىن الەمدىك يادرولىق دەرجاۆالار اراسىندا ءوزارا تۇسىنىستىك پەن ءوزارا سەنىم ورناتۋدىڭ ماڭىزدىلىعىنا نازار اۋداردى.
"الەمدىك قوعامداستىق - الۋان ءتۇرلى جانە كوپ قىرلى سيپاتى ارقىلى كۇشەيە تۇسكەن ءبىرتۇتاس ورگانيزم. ول جەر بەتىندەگى ۇلتتار مەن حالىقتار اراسىندا تەڭگەرىم مەن ۇيلەسىم بولعان كەزدە عانا العا باسىپ، دامي الادى. سول سەبەپتى، ءبىز حالىقارالىق قۇقىق ۇستەمدىگىنە نەگىزدەلگەن قاۋىپسىز الەم مەن ادىلەتتى الەمدىك تارتىپكە بىرلەسە قول جەتكىزۋىمىز كەرەك. بۇل ىستە بىرىككەن ۇلتتار ۇيىمى قاۋىپسىزدىك كەڭەسىنىڭ ءرولى زور جانە وعان تاريحي ميسسيا جۇكتەلەتىنى دە ءسوزسىز", - دەدى قازاقستان پرەزيدەنتى.
سونداي-اق، كەڭەس وتىرىسى بارىسىندا پولشا پرەزيدەنتى ا.دۋدا، كۋۆەيت پرەمەر-ءمينيسترىنىڭ ورىنباسارى – سىرتقى ىستەر ءمينيسترى شەيح ساباح حالەد ءال-ساباح جانە رەسەي فەدەراتسياسىنىڭ سىرتقى ىستەر ءمينيسترى لاۆروۆ ءسوز سويلەدى.
tengrinews.kz
