وبلىس اكىم نۇرلان نوعاەۆقا كوممۋنالدىق بازار مەن كوتەرمە-تاراتۋ ورتالىعىنىڭ قۇرىلىس جوبالارى تانىستىرىلدى. جەرگىلىكتى اۋىل شارۋاشىلىعى ءونىمىن وندىرۋشىلەرىنە تەگىن ساۋدا ورىندارى ۇسىنىلادى، بۇل ءوز كەزەگىندە تۇتىنۋشىلار ءۇشىن باعانى تۇراقتاندىرۋعا وڭ اسەر ەتەدى، دەپ حابارلايدى "ادىرنا" ۇلتتىق پورتالى ماڭعىستاۋ وبلىسى اكىمىنىڭ ءباسپاسوز قىزمەتىنە سىلتەمە جاساپ.
22 قىركۇيەكتە ماڭعىستاۋ وبلىسىنا كەلگەن ساپارىندا پرەزيدەنت قاسىم-جومارت توقاەۆ ءوڭىردىڭ الەۋمەتتىك-ەكونوميكالىق دامۋى جونىندەگى جيىندا ينفلياتسيا دەڭگەيىنىڭ جوعارى ەكەنىن، مۇنىڭ ازىق-تۇلىك تاۋارلارى باعاسىنىڭ تەز وسۋىنە اسەر ەتىپ جاتقانىن اتاپ وتكەن ەدى.
-ازىق-تۇلىكتىڭ 80 پايىزعا جۋىعى يمپورتتالادى. وسى رەتتە، 50 مىڭ توننا كوكونىس سىياتىن قويمالاردىڭ تاپشىلىعى بايقالادى. بۇل ەلىمىز بويىنشا ەڭ جوعارى كورسەتكىش. اتالعان ماسەلەنى ماڭىزدىلىعىنا قاراي شەشۋ قاجەت. ول ءۇشىن ءتيىستى مەحانيزمدەر بار. وسىعان قاتىستى ۇكىمەت كوكونىس قويمالارىنىڭ قۇرىلىسى جونىندەگى جول كارتاسىن ازىرلەدى. ازىق-تۇلىك باعاسىنىڭ قىمباتتاۋىن توقتاتۋ ءۇشىن اۋىل شارۋاشىلىعى ونىمدەرىنە تولىق قول جەتىمدى ءارى رەتكە كەلتىرىلگەن ساۋدا الاڭدارىن اشۋ كەرەك. اكىمدىككە اقتاۋ قالاسىندا كوممۋنالدى جانە كوتەرمە بازارلاردى سالۋدى تاپسىرامىن، – دەدى مەملەكەت باسشىسى.
جۇمىس باستالىپ كەتتى. نۇرلان نوعاەۆقا جەكە ينۆەستورلار ەسەبىنەن اقتاۋ قالاسىنىڭ 36 شاعىن اۋدانىندا سالىناتىن «اقتاۋ اۆتو قويما» جشس جانە «اقتاۋ ورتس» جشس-ءنىڭ جوبالارى تانىستىرىلدى.
«اقتاۋ اۆتو قويما» جشس جوباسى ساتۋ جانە تاۋار ساقتايتىن قويماسى بار ەكى فۋنكتسيونالدىق ايماقتان تۇرادى. جەر تەلىمىنىڭ جالپى اۋدانى - 15 گا، ونىڭ ىشىندە كوممۋنالدىق ساۋدا بازارىنىڭ اۋدانى 9-10 گا قۇرايدى.
سونىمەن قاتار، 2 مىڭ شارشى مەتر اۋماقتا پاۆيلوندار سالىنادى، وندا فەرمەرلەر ءوز ونىمدەرىن دەلدالسىز جانە جالعا الۋ تولەمدەرسىز ساتا الادى، بۇل ءوز كەزەگىندە تۇتىنۋشىلار ءۇشىن باعانى قالىپتاستىرۋعا وڭ اسەر ەتەدى.
ساۋدا جانە قويما كولەمى 20 000 شارشى مەتر بولادى. جالعا الۋشىلار سانى - 500 ادام. جوباعا سالىنعان ينۆەستيتسيا قۇنى 1,5 ملرد. تەڭگەنى قۇرايدى. بۇدان باسقا، بازار اۋماعىندا اۆتوموبيلدەرگە جانە قالالىق قوعامدىق كولىكتەرگە ارنالعان 750 ورىندىق اۆتوبەكەت جۇمىس ىستەيتىن بولادى. سونداي-اق، ءبىر مەزەتتە 500 ادام سىياتىن جولاۋشىلار تەرمينالى ورنالاسپاق.
كوتەرمە ساۋدا ورتالىعى بولشەك ساۋدا بازارلارى، دۇكەندەر، مەيرامحانالار جانە باسقا دا بيزنەس سۋبەكتىلەرى ءۇشىن ازىق-تۇلىك تاۋارلارىنىڭ كوتەرمە ساۋداسىن ۇيىمداستىرادى. وسىلايشا، دەلدالدى الىپ تاستاپ، جەرگىلىكتى وندىرۋشىلەردىڭ ءونىمىن كەپىلدى وتكىزۋدىڭ ارقاسىندا ازىق-تۇلىك تاۋارلارىنىڭ باعاسى تومەندەيدى دەپ كۇتىلۋدە. جوباعا سالىنعان ينۆەستيتسيا قۇنى 1,8 ملرد تەڭگەنى قۇرايدى. جەر ۋچاسكەسىنىڭ جالپى اۋدانى – 12 گا. جالعا الۋشىلار سانى، اتاپ ايتقاندا ءىرى جانە ورتا كوتەرمە ساۋداگەرلەر سانى 300 ادام. كاسىپكەرلەرگە ىڭعايلى بولۋ ءۇشىن توڭازىتقىش، قويمالار قىزمەتى ۇسىنىلادى.
اتالعان جوبالار 2023 جىلى ىسكە قوسىلادى دەپ جوسپارلانۋدا.
نۇرلان نوعاەۆ جۇرگىزىلىپ جاتقان جۇمىسقا وڭ باعا بەردى، سونداي-اق ازىق-تۇلىك نارىعىنداعى باعانى تۇراقتاندىرۋ بويىنشا جۇمىسقا ءىرى كاسىپكەرلەردى تارتۋ قاجەتتىگىن اتاپ ءوتتى. ءوڭىر باسشىسى مەملەكەتتىك ورگاندار مەن كاسىپكەرلىك سۋبەكتىلەرىنىڭ جۇيەلى جۇمىسى ءوڭىر ەكونوميكاسىنا وڭ اسەرىن تيگىزەتىنىن اتاپ ءوتتى.
"ادىرنا" ۇلتتىق پورتالى.
