Oblys äkım Nūrlan Noǧaevqa kommunaldyq bazar men köterme-taratu ortalyǧynyŋ qūrylys jobalary tanystyryldy. Jergılıktı auyl şaruaşylyǧy önımın öndıruşılerıne tegın sauda oryndary ūsynylady, būl öz kezegınde tūtynuşylar üşın baǧany tūraqtandyruǧa oŋ äser etedı, dep habarlaidy "Adyrna" ūlttyq portaly Maŋǧystau oblysy äkımınıŋ baspasöz qyzmetıne sılteme jasap.
22 qyrküiekte Maŋǧystau oblysyna kelgen saparynda Prezident Qasym-Jomart Toqaev öŋırdıŋ äleumettık-ekonomikalyq damuy jönındegı jiynda infliasiia deŋgeiınıŋ joǧary ekenın, mūnyŋ azyq-tülık tauarlary baǧasynyŋ tez ösuıne äser etıp jatqanyn atap ötken edı.
-Azyq-tülıktıŋ 80 paiyzǧa juyǧy importtalady. Osy rette, 50 myŋ tonna kökönıs syiatyn qoimalardyŋ tapşylyǧy baiqalady. Būl elımız boiynşa eŋ joǧary körsetkış. Atalǧan mäselenı maŋyzdylyǧyna qarai şeşu qajet. Ol üşın tiıstı mehanizmder bar. Osyǧan qatysty Ükımet Kökönıs qoimalarynyŋ qūrylysy jönındegı jol kartasyn äzırledı. Azyq-tülık baǧasynyŋ qymbattauyn toqtatu üşın auyl şaruaşylyǧy önımderıne tolyq qol jetımdı ärı retke keltırılgen sauda alaŋdaryn aşu kerek. Äkımdıkke Aqtau qalasynda kommunaldy jäne köterme bazarlardy saludy tapsyramyn, – dedı Memleket basşysy.
Jūmys bastalyp kettı. Nūrlan Noǧaevqa jeke investorlar esebınen Aqtau qalasynyŋ 36 şaǧyn audanynda salynatyn «Aqtau Avto qoima» JŞS jäne «Aqtau Ors» JŞS-nıŋ jobalary tanystyryldy.
«Aqtau Avto qoima» JŞS jobasy satu jäne tauar saqtaityn qoimasy bar ekı funksionaldyq aimaqtan tūrady. Jer telımınıŋ jalpy audany - 15 ga, onyŋ ışınde kommunaldyq sauda bazarynyŋ audany 9-10 ga qūraidy.Sonymen qatar, 2 myŋ şarşy metr aumaqta pavilondar salynady, onda fermerler öz önımderın deldalsyz jäne jalǧa alu tölemdersız sata alady, būl öz kezegınde tūtynuşylar üşın baǧany qalyptastyruǧa oŋ äser etedı.
Sauda jäne qoima kölemı 20 000 şarşy metr bolady. Jalǧa aluşylar sany - 500 adam. Jobaǧa salynǧan investisiia qūny 1,5 mlrd. teŋgenı qūraidy. Būdan basqa, bazar aumaǧynda avtomobilderge jäne qalalyq qoǧamdyq kölıkterge arnalǧan 750 oryndyq avtobeket jūmys ısteitın bolady. Sondai-aq, bır mezette 500 adam syiatyn jolauşylar terminaly ornalaspaq.Köterme sauda ortalyǧy bölşek sauda bazarlary, dükender, meiramhanalar jäne basqa da biznes subektılerı üşın azyq-tülık tauarlarynyŋ köterme saudasyn ūiymdastyrady. Osylaişa, deldaldy alyp tastap, jergılıktı öndıruşılerdıŋ önımın kepıldı ötkızudıŋ arqasynda azyq-tülık tauarlarynyŋ baǧasy tömendeidı dep kütılude. Jobaǧa salynǧan investisiia qūny 1,8 mlrd teŋgenı qūraidy. Jer uchaskesınıŋ jalpy audany – 12 ga. Jalǧa aluşylar sany, atap aitqanda ırı jäne orta köterme saudagerler sany 300 adam. Käsıpkerlerge yŋǧaily bolu üşın toŋazytqyş, qoimalar qyzmetı ūsynylady.
Atalǧan jobalar 2023 jyly ıske qosylady dep josparlanuda.Nūrlan Noǧaev jürgızılıp jatqan jūmysqa oŋ baǧa berdı, sondai-aq azyq-tülık naryǧyndaǧy baǧany tūraqtandyru boiynşa jūmysqa ırı käsıpkerlerdı tartu qajettıgın atap öttı. Öŋır basşysy memlekettık organdar men käsıpkerlık subektılerınıŋ jüielı jūmysy öŋır ekonomikasyna oŋ äserın tigızetının atap öttı.
"Adyrna" ūlttyq portaly.
