رەسەي تەرگەۋ كوميتەتى وپپوزيتسيونەر الەكسەي ناۆالنىي مەن ونىڭ جاقتاستارىنىڭ ۇستىنەن "ەكسترەميستىك قاۋىمداستىق قۇردى جانە ونىڭ جۇمىسىنا ارالاستى" دەپ ءىس قوزعادى. بۇل تۋرالى كوميتەتتىڭ رەسمي سايتى حابارلادى، دەپ جازادى "ادىرنا" ۇلتتىق پورتالى ازاتتىق راديوسىنا سىلتەمە جاساپ.
ناۆالنىي، لەونيد ۆولكوۆ جانە يۆان جدانوۆ "ەكترەميستىك قاۋىمداستىق قۇرىپ، ونى باسقاردى" دەگەن كۇدىككە ىلىنسە، ليۋبوۆ سوبول، ۆياچەسلاۆ گيمادي، رۋسلان شاۆەددينوۆ جانە بىرنەشە ادام "قاۋىمداستىق جۇمىسىنا ارالاستى" دەپ ايىپتالعان. بۇل ايىپ بويىنشا ەڭ ۇلكەن جازا – 10 جىلعا باس بوستاندىعىنان ايىرۋ.
تەرگەۋ كوميتەتى 2014 جىلى ناۆالنىي "ەكسترەميستىك قاۋىمداستىق قۇردى", ال ۆولكوۆ پەن جدانوۆ كوپ ۇزاماي "قاۋىمداستىققا قوسىلدى" دەپ سانايدى.
كوميتەت ناۆالنىيدىڭ "جەمقورلىقپەن كۇرەس قورىن" "ەكسترەميستىك قاۋىمداستىق" دەپ سانايدى. رەسەي بيلىگى ناۆالنىيدىڭ بۇل قورىن ەلدە "ەكسترەميستىك" دەپ تانىپ، قىزمەتىنە تىيىم سالعان.
ۆەدومستۆو ناۆالنىي قۇرعان قور "مەملەكەتتىك ورگانداردىڭ ابىرويىنا نۇقسان كەلتىرىپ، ەلدەگى تۇراقتىلىققا قاۋىپ ءتوندىردى; ەل اراسىندا نارازى كوڭىل كۇي قالىپتاستىردى" دەپ سانايدى. كوميتەتتىڭ مالىمدەمەسىندە تىيىم سالىنعان اقپاراتتى تاراتۋ جولى رەتىندە ناۆالنىيدىڭ Youtube كانالى كورسەتىلگەن.
ناۆالنىي بۇعان دەيىن Youtube ارناسىندا رەسەي بيلىگىندەگى جەمقورلىق سحەمالارىن اشاتىن بىرنەشە ۇلكەن زەرتتەۋلەرىن جاريالاعان. ونىڭ ۆيدەولارىن ميلليونداعان ادام كورىپ، رەسەي قوعامىندا رەزونانس تۋعىزعان.
تەرگەۋ كوميتەتى ايىپتاعانداردىڭ كوبى قازىر شەتەلدە ءجۇر. ال ناۆالنىي رەسەيدە تۇرمەدە وتىر. ول "الاياقتىق" ايىبى بويىنشا تۇرمە جازاسىن وتەپ جاتىر. ناۆالنىيدىڭ تۇرمە جازاسى 2023 جىلدىڭ كۇزىندە اياقتالۋى كەرەك.
ايتا كەتەيىك، رەسەيدە ناۆالنىي مەن ونىڭ جاقتاستارىنىڭ ۇستىنەن تاعى بىرنەشە قىلمىستىق ءىس قوزعالعان. وپپوزيتسيونەردىڭ جاقتاستارى بۇل ىستەردىڭ بارلىعىنىڭ ساياسي استارى بار دەپ سانايدى. حالىقارالىق ۇيىمداردىڭ ءبىرازى ناۆالنىيدى "ساياسي تۇتقىن" دەپ تانىعان.
"ادىرنا" ۇلتتىق پورتالى
