اقش سەناتورلارىنىڭ ءبىر توبى پرەزيدەنت دجو بايدەندى رەسەي بيلىگى ماسكەۋدەگى امەريكا ەلشىلىگىنىڭ شتاتىن كەڭەيتۋگە كەلىسپەسە، 300 رەسەيلىك ديپلوماتتى اقش-تان شىعارۋعا شاقىردى، دەپ حابارلايدى "ادىرنا", Reuters سايتىنا سىلتەپ.
اگەنتتىكتىڭ مالىمەتىنشە، دەموكراتيالىق جانە رەسپۋبليكالىق پارتيالاردىڭ اقش سەناتورلارى بايدەنگە حات جازىپ، وندا ماسكەۋدەگى ەلشىلىك قىزمەتكەرلەرىنىڭ سانىن كوبەيتۋ ءۇشىن «شۇعىل شارالار قابىلداۋدى» سۇراعان. سەناتتىڭ سىرتقى بايلانىستار جانە بارلاۋ كوميتەتتەرىنىڭ جەتەكشىلەرى - دەموكراتتار بوب مەنەندەس پەن مارك ۋورنەر مەن رەسپۋبليكاشىلار دجيم ريش پەن ماركو رۋبيونىڭ ۇسىنىسى ەلشىلىكتەردىڭ قىزمەتكەرلەرىنە قاتىستى ۆاشينگتون مەن ماسكەۋ اراسىنداعى ماسەلەنىڭ شيەلەنىسۋىنە اكەلەدى.
«ديپلوماتيالىق ميسسياداعى بۇل تەڭگەرىمسىزدىككە جول بەرىلمەيدى. تيىسىنشە، رەسەي رەسەيدە جۇمىس ىستەيتىن امەريكاندىق ديپلوماتتار مەن اقش-تاعى جۇمىس ىستەيتىن رەسەيلىك ديپلوماتتاردىڭ اراسىنداعى تەڭدىككە جەتۋ ءۇشىن جەتكىلىكتى مولشەردە ۆيزا بەرۋى كەرەك»، - دەدى سەناتورلار بايدەنگە جازعان حاتىندا.
ولاردىڭ پىكىرىنشە، ەگەر ماسكەۋ مۇنى جاساماسا، وندا بايدەن 300-گە دەيىن رەسەيلىك ديپلوماتتى شىعارۋدى باستاۋ كەرەك. سەناتورلاردىڭ باعالاۋى بويىنشا، قازىرگى ۋاقىتتا اقش -تا 400 -دەن استام رەسەيلىك ديپلومات بار، ال رەسەيدە تەك 100-گە جۋىق امەريكاندىق ديپلومات قىزمەت ەتەدى.
حات اۆتورلارى 1 تامىزدا اقش -تا رەسەيلىكتەردى نەمەسە ءۇشىنشى ەلدەردىڭ ازاماتتارىن ەلشىلىككە جۇمىسقا قابىلداۋعا تىيىم سالاتىن ەرەجەلەر رەسەيدە كۇشىنە ەنگەنىن ەسكە سالدى. بۇل ديپلوماتيالىق ميسسيانىڭ كۇندەلىكتى قىزمەتىنە جانە مەملەكەتتىك دەپارتامەنتتىڭ رەسەيدە تۇراتىن نەمەسە رەسەيگە باراتىن امەريكاندىقتاردىڭ قاجەتتىلىكتەرىن قاناعاتتاندىرۋ مۇمكىندىگىنە قاۋىپ ءتوندىردى، دەپ جازدى ولار.
"ادىرنا" ۇلتتىق پورتالى
