گۇلشات ءتۇسىپ – قازاق تىلىندەگى اۋدارما سالاسىنىڭ دامۋىنا زور ۇلەس قوسىپ جۇرگەن عالىمداردىڭ ءبىرى، ەكى مارتە «بولاشاق» ستيپەندياسىنىڭ يەگەرى. ول 2019 جىلدان بەرى ۇلىبريتانيانىڭ ابەردين ۋنيۆەرسيتەتىندە «اۋدارما ءىسى» ماماندىعى بويىنشا دوكتورانتۋرادا ءبىلىم الادى. بۇگىندە فيلولوگيا عىلىمدارىنىڭ كانديداتى و.ۋايلد، س.موەم، ل.لەسسيگ، د.گانجي سىندى اتاقتى تۇلعالاردىڭ ەڭبەكتەرىن انا تىلىمىزگە اۋدارىپ ۇلگەرگەن. پورتالىمىزدىڭ ءتىلشىسى عالىممەن تىلدەسىپ، سۇقبات قۇردى.
– گۇلشات حانىم، ءبىر ەمەس، بىرنەشە شەتەلدىك جوو-دا تاجىريبە جيناپ، ءبىلىم الدىڭىز. وسى جىلدار ارالىعىندا نە ءتۇيدىڭىز؟ ءسىز ءتالىم العان ۋنيۆەرسيتەتتەردىڭ قازاقستاندىق جوو-لاردان نەگىزگى ايىرماشىلىعى قانداي ەكەن؟
شەتەلدە ستۋدەنتتەردىڭ وقۋىنا بارلىق جاعداي جاسالعان
– انگليانىڭ ليدس ۋنيۆەرسيتەتىندە وقىپ، «حالىقارالىق ءبىلىم سالاسىنداعى كوشباسشىلىق جانە ساياسات» باعدارلاماسىن ماگيستر بىلىكتىلىگى بويىنشا ءبىتىردىم. سول كەزدە قازاقستان جوو-لارىنا بولون پروتسەسىنىڭ ەنۋىن زەرتتەگەن بولاتىنمىن. بولون پروتسەسى – بىرنەشە ەۋروپا ەلىنىڭ بىرىڭعايلانعان جانە جۇيەلەنگەن ستاندارتتار جۇيەسى. جاھاندانۋ ءۇردىسىنىڭ كورىنىسى وسى كەلىسىمگە قول قويعان بارلىق جوو-دان تالاپ ەتىلەدى. ونىڭ ماڭىزدى اسپەكتىلەرىنە كرەديتتىك وقۋ تەحنولوگياسى مەن اكادەميالىق ۇتقىرلىق (موبيلدىلىك) كىرەدى. وسىلار ارقىلى جوو-لار حالىقارالىق ستاندارتتارعا سايكەستەندىرىلەدى دەپ كۇتىلەدى. ءبىز بولون دەكلاراتسياسىنا الدىمەن باقىلاۋشى بولدىق جانە وسى جىلدارى جوو سالاسىنداعى ءبىلىم تۋرالى زاڭنامامىزدى بولون پروتسەسىنىڭ تالاپتارىنا سايكەستەندىردىك. سودان كەيىنگى كەزەڭدە بولون پروتسەسىنە مۇشەلىككە ءوتىپ، دەكلاراتسياعا قول قويدىق. دەمەك، ءبىزدىڭ جوعارى ءبىلىم بەرۋ جۇيەسىنىڭ ساپاسى ەۋروپالىق ءبىلىم ستاندارتتارىنا ساي، ديپلومدارىمىز بەن ءبىلىم دەڭگەيىمىز سولارمەن پارا-پار دەگەندى بىلدىرەدى. بۇنىڭ بارلىعى، ارينە، قاعاز جۇزىندە. شىن مانىندە، بولون پروتسەسىنىڭ مۇشەسى بولىپ ەسەپتەلەتىن باتىستىڭ الدىڭعى قاتارلى ۋنيۆەرسيتەتى مەن قازاقستاننىڭ ۋنيۆەرسيتەتىنىڭ ءبىلىم دەڭگەيى سايكەس ەمەس. بۇنىڭ سەبەپتەرى بىرنەشەۋ: بىرىنشىدەن، باتىس ۋنيۆەرسيتەتتەرى كرەديت سانىن ەسەپتەگەندە، وعان ادامنىڭ جۇمىسقا قابىلەتتى فيزيكالىق ۋاقىت كولەمىن جانە بەلگىلى ءبىر تاقىرىپ نەمەسە ءپاندى تۇپكىلىكتى مەڭگەرۋگە كەتەتىن رەالدى ۋاقىتتى نەگىزگە الادى. مىسالى، ستۋدەنت ديسكۋرس تەورياسىن مەڭگەرۋ ءۇشىن ۇسىنىلاتىن كىتاپ سانى مەن ولاردىڭ كولەمىن 8 ساعاتتىق (اپتاسىنا 5 كۇن) جۇمىس كۇنىندە ورتاشا جىلدامدىقپەن وقىعاندا قانشا ۋاقىت كەتەتىنى ەسەپكە الىنادى جانە سول ۋاقىتتى كىتاپحانادا وتكىزۋىنە جاعداي جاسالادى. كىتاپحانا بارىنشا ىڭعايلى ەتىپ جابدىقتالعان. اتاپ ايتساق، جەكە وتىرىپ دايىندالاتىن بولمەلەر، ورتاق بولمەلەر، توپ بولىپ جۇمىس جاساۋعا ارنالعان بولمەلەر بار. ولاردىڭ بارلىعى تەحنيكانىڭ سوڭعى نۇسقالارىمەن قامتاماسىز ەتىلگەن. جيھازدار دا ۇيىڭدەگىدەي جايلى، دەنە ەرەكشەلىگىنە سايلانىپ قويىلعان. تەگىن ءارى سۋپەر جىلدام ينتەرنەت جەلىلەرىمەن جابدىقتالعان، كىتاپحانانىڭ استىڭعى بولىگىندە بىرنەشە باعا دەڭگەيىن ۇسىنا الاتىن كافەلەر مەن اسحانالار ورنالاستىرىلعان، سىرتتا ماشينا، ۆەلوسيپەد قوياتىن جەر قاراستىرىلعان. كىتاپتى الۋ، وتكىزۋ، ولاردى ىزدەۋ جۇيەسىنىڭ بارلىعى ەلەكتروندى جانە اۆتوماتتاندىرىلعان. ۋنيۆەرسيتەتتەر الەمنىڭ ەڭ ءىرى جانە سالماقتى عىلىم مەن ءبىلىم بازالارىنا قولجەتىمدىلىك اشىپ قويعان. تاقىرىپتى جازساڭ بولعانى، ادەبيەتتەر ءتىزىمىن جاساپ بەرەتىن، جازىپ جاتقان دۇنيەڭنىڭ ءتىزىمىن ءتىزىپ بەرەتىن سەرۆيستەردى ساتىپ الىپ، قولجەتىمدى ەتكەن. كىتاپحانالار اپتاسىنا 7 كۇن، 12 ساعاتتان ىستەيدى. ال سەسسيا وتەتىن ۋاقىتتان 1 اي بۇرىن جانە سەسسيا كەزەڭى اياقتالعانشا 24 ساعات جۇمىس ىستەيدى.
ءپاندى ءوتۋ كەزىندە كىتاپتاردى وقىپ، مەڭگەرۋگە كەتكەن ۋاقىتتى ەسەپتەپ العان سوڭ قالعان ۋاقىتقا اپتاسىنا ورتاشا ەسەپپەن 2 رەتتەن ءدارىس ساباقتارى مەن اراسىندا مۇعالىممەن جەكە كونسۋلتاتسيالارىن ەسەپتەيدى. وسىلاردىڭ بارلىعىن جيىپ، ءبىر كرەديتتىڭ قانشا ساعاتتان تۇراتىنىن ايقىندايدى. بۇل رەالدى ءومىر تالاپتارىنا سايكەستەندىرىلگەن كرەديت سانى. سوڭىندا ستۋدەنتتەن ساپالى ەسسە جازۋ سۇرالادى. ونى وقىتۋشى 1-1,5 اي تەكسەرىپ وقيدى، ءوزىنىڭ پىكىرىن جازىپ، باعاسىن قويادى. ەسسەنى باعالاۋ كريتەريلەرىندە بىرنەشە اسپەكتى بار: پلاگياتقا تەكسەرۋ، ءستيلىن، اكادەميالىق ساۋاتتىلىعىن، سىني پايىمىن تەكسەرۋ. ياعني بەرىلگەن كىتاپتاردى وقىدى ما، جوق پا، ناتيجەسىندە ءوزىنىڭ پىكىرىن قالىپتاستىردى ما، سونى باعامدايدى. وسىلاردىڭ ارقايسىن شكالا بويىنشا باعالاپ بولعان سوڭ ورتاق باعاسىن شىعارىپ، ستۋدەنتكە جىبەرەدى. بۇل تەكسەرۋگە كەتكەن ۋاقىت مۇعالىمنىڭ جۇمىس ۋاقىتى دەپ ەسەپتەلىپ، اقشاسى تولەنەدى.
قازاقستانداعى جوعارى ءبىلىم بەرۋ سالاسىندا عىلىمي دارەجەسى بار ماماندار تاپشى
– ال بىزدە كرەديت سانى مۇلدەم باسقاشا ەسەپتەلەدى. وندا ستۋدەنتتىڭ كىتاپ وقىپ ۇلگەرۋىنە، ماتەريالدى مەڭگەرۋىنە قاجەتتى ۋاقىت مۇلدەم قاراستىرىلماعان. كرەديت سانى جوو وقىتۋشىلارىنىڭ جۇكتەمەسىمەن ەسەپتەلەدى. مىسالى، وقىتۋشىنىڭ جىلدىق جۇكتەمەسى 700 ساعات بولسا (قازاقستاندا جۇكتەمە 600-800 ساعات ارالىعىندا), بۇل تەك وقىتۋشىنىڭ اۋديتوريادا وتكىزۋى ءتيىس ساعاتىنىڭ سانى، ودان بولەك، كەيبىر جوو-لار شتاتتاعى وقىتۋشىلاردىڭ تاڭعى 8-دەن كەشكى 5-كە دەيىن وفيستە بولۋىن تالاپ ەتەدى. سونىمەن وسى 700 ساعات جۇكتەمەنى تولتىرۋ ءۇشىن بارلىق كۋرسقا ونىڭ ساباقتارى كىرگىزىلەدى نەمەسە وقىتۋشىعا تاعى بىرنەشە ءپاندى جۇرگىزۋگە تۋرا كەلەدى، سەبەبى جۇكتەمە تولۋى ءتيىس، ايتپەسە جالاقى از بولادى. نەگىزى بولون پروتسەسى بويىنشا ستۋدەنت وزىنە كەرەك پاندەردى كەڭەس بەرۋشىمەن (ەدۆايزەر) بىرگە وتىرىپ، جەكە وقۋ باعدارلاماسىن جاساعاندا ءوزى تاڭداپ الۋى ءتيىس. بۇل بولون پروتسەسىنىڭ تالابى. باتىس ۋنيۆەرسيتەتتەرى وسىلاي جۇمىس ىستەيدى. ال بىزدە ستۋدەنتتەن ەشتەڭە سۇرالمايدى، وعان كەرەك بولسىن، بولماسىن جەكە وقۋ جوسپارىنا پاندەردى ەنگىزىپ قويادى، سەبەبە ول سول ءپان وقىتۋشىسىنىڭ جۇكتەمەسىن تولتىرۋعا قاجەت. ەگەر وقىتۋشى جۇكتەمەسى تولماي قالسا، وقىتۋشى از جالاقىعا كەلىسپەسە، ول جۇمىستان كەتىپ قالۋى مۇمكىن. ال بۇل ەكىنشى ماسەلەگە اپارىپ سوقتىرادى. ايتالىق، جۇكتەمەسى تولماي، جالاقىسى ازايىپ قالعان وقىتۋشىنىڭ عىلىمي دارەجەسى بولسا، ونى جوو، اسىرەسە ايماقتىق جوو جىبەرگىسى كەلمەيدى، ويتكەنى قازاقستانداعى جوعارى ءبىلىم بەرۋ سالاسىندا عىلىمي دارەجەسى بار ماماندار تاپشى. سونىمەن قاتار، زاڭعا سايكەس، ۋنيۆەرسيتەتتەر ليتسەنزياسىن ۇستاپ تۇرۋى جانە جۇمىسىن جالعاستىرۋى ءۇشىن وقىتۋشىلارىنىڭ كەم دەگەندە 50% عىلىمي دارەجەسى بار وقىتۋشىلار بولۋى ءتيىس. سوندىقتان جوو وقىتۋشىنى جىبەرمەيدى دە، ءارى ونىڭ پاندەرىن بارلىق كۋرسقا ەنگىزۋگە تىرىسادى نەمەسە وعان قوسىمشا جاڭا پاندەر بەرەدى. مۇنىڭ ءبارى ستۋدەنتتىڭ ساباقتار سانىن كوبەيتەدى. قازاقستاندىق جوو-دا ستۋدەنت كۇنىنە 5-6 ساعاتىن اۋديتوريالىق ساباقتاردا وتكىزەدى. قالعان 1-2 ساعات تاماقتانۋى مەن جولىنا كەتتى دەپ ەسەپتەگەندە، جۇمىس كۇنى اياقتالدى دەگەن ءسوز. دەمەك، ستۋدەنتتىڭ وزدىگىنەن ىزدەنۋىنە، كىتاپ وقۋىنا ۋاقىت قاراستىرىلماعان. بۇل ناعىز كەڭەستىك جۇيە قالىپتاستىرعان ءبىلىم بەرۋ ءستيلى. ەكىنشىدەن، كىتاپحانالار دۇرىس جابدىقتالماعان، ۇشىنشىدەن ولارداعى كىتاپ قورى جاقسى ەمەس، تورتىنشىدەن، ەشقانداي الەمدىك عىلىمي بازالارعا قولجەتىمدىلىك قاراستىرىلماعان. مەن قازىر بارلىق جوو تۋرالى ايتىپ وتىرعانىم جوق، اراسىندا بىرنەشە قارجى جاعىنان قامتاماسىز ەتىلگەن ۋنيۆەرسيتەت بارىنشا باتىستىق ستاندارتتارمەن جۇمىس جاساۋعا تىرىسادى، ارينە. دەسە دە، كوپشىلىك جوو-نىڭ جاعدايى وسى. ستۋدەنت قانداي دا ءبىر ءپان اياسىندا نەمەسە قۇبىلىس تۋرالى ءوزى ىزدەنبەيدى، ىزدەنۋ، سىني پايىم قالىپتاستىرۋدى بىلمەي شىعادى. ەسەسىنە، وعان ءبارى تەك وقىتۋشى تاراپىنان ايتىلىپ بەرىلەدى، بولدى. بۇل جالپى ءبىلىم الۋ پروتسەسىنىڭ قاعيداتتارىنا قارسى. جوو-دا ءبىلىمدى بەرمەيدى، ءبىلىمدى ستۋدەنت ءوزى الۋى ءتيىس. ول ءۇشىن ىزدەنۋ كەرەك. ال ىزدەنۋگە ۋاقىت قاراستىرىلۋى قاجەت.
قاعاز جۇزىندە ءبارى تاماشا..
– قازىر قازاقستانداعى جوو-لارعا اۆتونومدىق ستاتۋس بەرىلىپ، جالاقى، وقىتۋشى مەن كرەديت سانىنا بايلانىستى ولقىلىقتاردى تۇزەتۋگە مۇمكىندىك بەرىلدى. الايدا، وسى ولقىلىقتاردى ولار تۇزەتىپ جاتىر ما، جوق پا بەلگىسىز. ويتكەنى قاعاز جۇزىندە ءبارى تاماشا، ال ىسكە كەلگەندە جاعدايدىڭ قانداي ەكەنىن زەرتتەۋ قاجەت. بۇل جەردە باتىستىق جوعارى ءبىلىم بەرۋ جۇيەسىمەن وتاندىق جوعارى ءبىلىم بەرۋ جۇيەسى اراسىنداعى ءبىر عانا اسپەكتى تالقىلاپ وتىرمىز. بۇدان بولەك، اكادەميالىق ۇتقىرلىقتى ەنگىزۋ ساياساتىندا قانشاما قاتەلىكتەر بار..
– «دوريان گرەيدىڭ پورترەتى»، «ەركىن مادەنيەت»، «ينتەللەكتۋالدىق مەنشىك قۇقىعى» سىندى شەتەل تۋىندىلارىن قازاق تىلىنە اۋداردىڭىز. بۇل سالاعا قالاي كەلدىڭىز؟
– مەنىڭ العاشقى ماماندىعىم – اۋدارماشى. ءال-فارابي اتىنداعى قازۇۋ-دىڭ «اۋدارما ءىسى جانە سالىستىرمالى ادەبيەتتانۋ» ماماندىعى بويىنشا باكالاۆريات، ماگيستراتۋرا جانە اسپيرانتۋراسىن بىتىرگەنمىن. سوندىقتان، اۋدارمانى ۇنەمى جاسايمىن. العاشقى اۋدارمام 2-كۋرستا وقىپ جۇرگەن كەزىمدە جارىق كوردى. اعىلشىن تىلىنەن سومەرسەت موەمنىڭ اڭگىمەسىن اۋدارىپ، ونى «قازاق ادەبيەتى» گازەتى جارىققا شىعارعان بولاتىن. اۋدارما ارقىلى قوسىمشا ءبىلىم الىپ، تابىس تابامىن. سونىمەن قاتار، سوڭعى كەزدەرى ءوز تىلىڭە ءبىلىم-عىلىم، اقپارات اكەلۋ جولى رەتىندە قاراستىرامىن، سوندىقتان، اۋدارما تۋرالى ۇسىنىستار تۇسكەن كەزدە، ونىڭ ءبىز ءۇشىن ماڭىزدىلىعىنا ءمان بەرەمىن، سودان سوڭ بارىپ، اقىسى مەن قيىندىعىنا تالداۋ جاسايمىن.
– باتىس تەوريالارىن قازاق تىلىنە اۋدارۋدىڭ ماڭىزىن اتاپ وتە الاسىز با؟
– كەڭەس ۇكىمەتى قۇلاعان سوڭ ونداعى گۋمانيتارلىق عىلىم سالالارى، ونىڭ ىشىندە ەكونوميكا، الەۋمەتتانۋ، فيلوسوفيا، تاريح سالالارىنداعى پاندەردىڭ عىلىمي نەگىزدەردەن ادا ەكەنى بەلگىلى بولدى. باتىس اكادەميالىق ورتاسىندا، ءتىپتى، ««black» and «blank disciplines»، ياعني «قارا»جانە «بوس پاندەر» دەگەن تەرمين دە پايدا بولدى. «قارا» دەگەنى – لەنينيزم مەن ستالينيزم تەوريالارىن مەڭزەگەندەرى، ال «بوس» دەگەنى – ىشىندەگى قاعيداتتارىنىڭ ءبارى ويدان قۇراستىرىلعان، ىسكە جارامسىز دەگەن ماعىنادا. بۇلارداعى جاساندى نەگىز ستالينيزم مەن لەنينيزم بولدى. قولدان جاسالعان جاساندى تەوريالار اشكەرەلەندى. كەڭەس ۇكىمەتى عالىمدارى ولاردىڭ نەگىزى الەمگە ايگىلى جانە الەۋەتتى تەوريا ماركسيزمنەن الىندى دەپ دابىرالاتقانىمەن، شىن مانىندە، گۋمانيزمگە جاقىن، راتسيونالدى ەكونوميكا قاعيداتتارىنا نەگىزدەلگەن ماركسيزم مەن اۆتوريتارلىق بيلىكتى ۇستاپ تۇرۋعا عانا نەگىزدەلگەن جانە ءفاشيزمنىڭ ەلەمەنتتەرى بار، ۇلتتاردى «تۇرمەدە» ۇستاۋ عانا كوزدەلگەن، ونىڭ ۇستىنە ەكونوميكالىق نەگىزدەرى ءالسىز لەنينيزم مەن ستالينيزم ماركسيزمگە مۇلدەم ۇقسامايتىن، اۋىلدارى الىس بولىپ شىقتى. سونىمەن، ءبىز ۆاكۋمدە قالعان بولىپ شىقتىق. ال بۇل ۋاقىتتا، ارينە، ەشكىمگە بودان بولماعان، ءارى عىلىمي رەسۋرستارى مەن تەحنولوگيالارىن مۇناي رەسۋرستارى سياقتى ساتىپ ۇيرەنگەن باتىس عىلىمنىڭ نەشە ءتۇرلى باعىتىن دامىتىپ ۇلگەردى. ءبىز كوشتەن قالىپ قويدىق. سول ولقىلىقتى تولتىرۋ ءۇشىن عىلىمدى تەزىرەك قازاقىلاندىرۋىمىز قاجەت. بىرىنشىدەن، دەكولونيزاتسيالانۋ پروتسەسىن جىلدامداتامىز. ءبىز كولونيا بولدىق، ودان قۇتىلۋدىڭ جولى – ءوزىمىزدىڭ كىم ەكەنىمىزدى ءتۇسىنۋ، حالىق رەتىندە باسىمىزدان وتكەن دۇنيەلەردى ساراپتاپ، جاۋاپ الۋ، سول ارقىلى بولاشاق باعداردى ايقىنداۋ. بولاشاقتى ايقىنداۋ تەك ءبىر عانا تۇلعانىڭ ايتقانىنا سەنۋ بولماۋ كەرەك، ءار تۇستان عالىمدار ساراپتاما جاساپ، ءۇن قوسۋ كەرەك، ازاماتتىق قوعام وسى عىلىمي تۇيىندەرمەن تانىس بولۋى كەرەك. ءسويتىپ، قوعامدا سىني جانە عىلىمي كوزقاراستارعا نەگىزدەلگەن پايىم قالىپتاستىرۋ قاجەت. ول ءۇشىن، ارينە، الەۋەتتى عىلىم مەن تەوريالار كەرەك. ولاردىڭ ءبارى باتىستا دايىن تۇر. ءبىز سوعان جەتە الماي وتىرمىز. ەكىنشىدەن، عىلىم كەلگەن ءتىل داميدى. ونىڭ دامۋى ءۇشىن تىلدە عىلىم، ساياسات، ەكونوميكا سويلەۋى كەرەك. سوندا عانا ءتىل تۇرمىستىق سالالاردا، توي-تومالاقتا عانا قولدانىلىپ قانا قويماي، تولىققاندى ءومىر سۇرەدى، داميدى، تۇتاس حالىقتىڭ تىلىنە اينالادى. ول ءۇشىن قازاق تىلىندە سەنىمدى جانە ساپالى عىلىمي اقپارات دايىنداپ، جاس بۋىندى سۋسىنداتۋ كەرەك، ولارعا انا تىلىمىزدە عىلىمي جانە ءبىلىم كونتەنتىن جاساپ بەرۋىمىز كەرەك. سول ءۇشىن باتىس عىلىمى قازاق تىلىنە ۇزدىكسىز، پارمەندى تۇردە اۋدارىلۋى ءتيىس.
– ال عالىم رەتىندە قازاق اۋدارما سالاسى مەن ونىڭ ساپاسىنا قانداي باعا بەرەسىز؟
– جالپى ايتقاندا، قازىر قازاق اۋدارماسىندا ۇلتتىق سيپات باسىم. كەڭەس كەزىندە جىلىنا 10 كىتاپ اۋدارىلسا، سونىڭ 6-ى كوكپ تاريحى سياقتى ساياسي كىتاپتار مەن بروشيۋرالار بولاتىن. قازىر ءبىز ءوزىمىزدىڭ ۇلتىمىزعا شىنىمەن كەرەك دۇنيەلەرىمىزدى اۋدارىپ جاتىرمىز. بۇل تاۋەلسىزدىكتىڭ ارقاسى. الايدا قارقىنىمىز تىم باياۋ. ەڭسەمىزدى كوتەرىپ كەتكەن شارا ۇلتتىق اۋدارما بيۋروسى اتقارعان «گۋمانيتارلىق باعىتتاعى 100 كىتاپ» باعدارلاماسى بولدى. ول قانشاما جاڭا تەرميندى قالىپتاستىردى، كونتسەپتتەر اكەلدى، ۇعىمدەر ەنگىزدى. ءتىلدىڭ ءبىرشاما جاندانۋىنا، عىلىمي ءتىلدىڭ ءبىراز كوتەرىلۋىنە ۇلەس قوستى. جەكە كاسىپكەرلەر دە اۋدارمامەن اينالىسۋعا تىرىسىپ جاتىر، الايدا جەتكىلىكسىز دەڭگەيدە. اۋدارما وتە ۇلكەن قارجىنى تالاپ ەتەتىن سالا. سوندىقتان وعان ستراتەگيالىق ماڭىزى بار سالا رەتىندە قاراۋ قاجەت. ال مەملەكەت ۇزدىكسىز جانە اياماي قارجىلاندىرىپ، تىلگە عىلىم مەن ءبىلىمدى اكەلۋگە مۇرىندىق بولۋى ءتيىس. ءبىلىم مەن عىلىمعا كەتكەن قارجى ەشقاشان بوس كەتپەيدى جانە ول ون ەسە كوپ پايدا اكەلەتىنى بەلگىلى.
– ءماندى دە ماعىنالى اڭگىمەڭىز ءۇشىن كوپ راقمەت! شىعارماشىلىق تابىس تىلەيمىز!
اڭگىمەلەسكەن ديانا اسان،
«ادىرنا» ۇلتتىق پورتالى
