مەن وقىپ جاتقان تىلدىك كۋرستا ءار قۇرلىقتان كەلگەن ءار ۇلتتىڭ وكىلدەرى بار. ادەتتەگىدەي 20 ستۋدەنتتىڭ بەسەۋى قىتاي.
ساباق اراسىندا اڭگىمە، نەدەن باستالىپ كەتكەنى ەسىمدە جوق، شىڭعىسحان تاقىرىبىنا ويىستى. ۇلى قاعان جايلى وزگە ۇلتتار، وزگە قۇرلىقتىڭ ادامدارى اسا ساۋاتتى ەمەس ەكەن. قىزىعۋشىلىق تا تانىتا قويعان جوق. بىراق، قىتايدىڭ ءبىر-بىرىنەن الشاقتاۋ وبلىستارىنان كەلگەن بەس قىتاي دا "شىڭعىسحان – قىتاي" دەگەن پىكىرگە تاباندى جانە قۇدايداي سەنەدىەكەن.
مەن ولاردىڭ قىتايدىڭ ەسەبىنە جىعىپ بەرىپ، بۇرمالانعان تاريح وقۋلىقتارىن مەكتەپتە ساباق رەتىندە وقىعانىن جاقى بىلەم. سوندىقتان دا شىڭعىسحاندى قىتاي دەگەنىنە اسا تاڭ قالا قويعان جوقپىن. ونىڭ ۇستىنە سۇڭ يمپەرياسىن تاريح تاعىنان تايدىرىپ، بۇكىل شىعىس ازياعا ىقپالىن جۇرگىزگەن قۇبىلاي جانە ول قۇرعان يۋان يمپەرياسى ءۇشىن دە ولار شىڭعىسحاندى تاۋەلدەۋگە قۇمار. ازداپ مادەنيەت پەن تاريحتان ساۋاتى بار ادام بۇل اقيقاتتىڭ استارىن سەزە قويادى.
بىراق مەنى تاڭ قالدىرعان مۇلدە باسقا جاعداي. داۋ قىزا كەلگەندە مەن ولارعا كىتاپحاناعا بارىپ تاريحي كىتاپتاردى وقىپ اۋرە بولماي-اق، «بايدۋ百度»-دان ەمەس، «Google-گە» سۇيەنىپ دەرەكتەر ىزدەپ كورۋىن ءوتىندىم (قىتايداعى ينتەرنەتتەن ىزدەۋ جۇيەسى تەك وسى بايدۋعا عانا سۇيەنەدى. ال GOOGLE جانە وسى كومپانياعا قاتىستى بارلىق قۇرىلعى بۇل مەملەكەتتە بۇعاتتالعان). ارينە، اينالاسى بەس مينۋتتا شىڭعىسحاننىڭ قازاق بولماسا دا، ونىڭ قىتاي ەمەس ەكەنىنە كوزى ابدەن جەتەتىن دەرەكتەردى كورىپ كوزدەرىنىڭ الاقانداي بولعانى ەدى. ولاردىڭ جۇزىندەگى تاڭدانىس بەينە اسىراندى بالانىڭ وتىز جىل بويى ءوزىن باعىپ-قاققان ادامنىڭ بيولوگيالىق اتا-اناسى ەمەس ەكەنىن الدە كىمنەن ەستىپ تۇرعان ساتىندەي ەدى. ولار مۇنى قابىلداي المايدى ەكەن. ءبارىبىر مويىنداعان جوق. كوزى جەتتى، كوڭىلى پاسەيدى. بىراق، جۇزدەرىندە «بۇل مۇمكىن ەمەس» دەگەندى بىلدىرەتىن ىزالى تاڭىرقاۋ ءالى بار.
مىنە، شىڭعىسحاندى تاۋەلدەپ، ونىڭ تۇلپارىنىڭ تۇياعى تيگەن جەردىڭ ءبارىن مەنشىكتەۋدى ۇرپاق ساناسىندا شەگەمەن قاققانداي ەتىپ ورناتىپ تاستاعان بۇل يدەولوگيا – بەينە، ءدىن سەكىلدى. كوڭىلدەرىنە كۇمان، كۇدىك ءتۇسىپ تۇرعان ساتتە دە بۇل سەنىمنەن ەشقاشان مىزعىمايدى.
قايسار قاۋىمبەك،
فب-داعى پاراقشاسىنان
