رەسەي مەن قازاقستاننىڭ قارىم-قاتىناسى ايرىقشا وداقتاستىق سيپاتقا يە. بىراق ماسكەۋ رەسپۋبليكاداعى ۇلتشىلدىق ماسەلەسى بويىنشا ارتىق كەتكەن كەز كەلگەن جاعدايدى مۇقيات قاداعالايدى. بۇل تۋرالى رەسەي سىرتقى ىستەر مينيسترلىگىنىڭ رەسمي وكىلى ماريا زاحاروۆا ايتتى، دەپ حابارلايدى “ادىرنا” ۇلتتىق پورتالى Stan.kz اقپارات اگەنتتىگىنە سىلتەمە جاساپ.
Lenta.ru باسىلىمىنىڭ جازۋىنشا، رەسەي قازاقستان پرەزيدەنتى قاسىم-جومارت توقاەۆتىڭ ۇلتشىلدىققا قارسى “نولدىك توزىمدىلىك” قاعيداسىن ۇستانۋ كەرەكتىگىن ايتقان سوزدەرىن تولىق قولدايدى. ديپلومات تىلگە قاتىستى قانداي دا ءبىر اقپارات تاراتاتىن تۇلعالاردىڭ ارەكەتتەرى قازاقستاندىق بيلىك تاراپىنان جاۋاپسىز قالمايتىنىن ايتتى.
ء"بىز قازاقستان باسشىلىعىمەن ارقاشان بىرگە قيمىلدايمىز. ۇلتشىلدىق كورىنىستەردىڭ الدىن الا وتىرىپ، ولارعا ەرەكشە ءمان بەرەتىن بولامىز. سونداي-اق، بۇل ماسەلەنىڭ شەشىمى ءۇشىن بىرلەسىپ كۇش-جىگەر جۇمسايتىنىمىزعا ەشقانداي كۇمان بولماۋى ءتيىس", — دەپ اتاپ ءوتتى زاحاروۆا.
ول رەسەي مەن قازاقستان تىعىز الەۋمەتتىك-مادەني بايلانىستارعا يە بولعاندىقتان، ەكى ەلدىڭ جاستارىمەن اتاۋلى ماسەلەگە قاتىستى جۇمىس جۇرگىزۋ بويىنشا بارلىق ىقتيمال قۇرالدار مەن رەسۋرستاردى پايدالانۋ قاجەتتىگىن اتاپ ءوتتى.
21 قازاندا پرەزيدەنت قاسىم-جومارت توقاەۆ قازاقستان حالقى اسسامبلەياسى كەڭەسىنىڭ كەڭەيتىلگەن وتىرىسىندا اتقارۋشى بيلىك ورگاندارى مەن پروكۋراتۋرادان ەتنيكالىق نەگىزدەگى قاقتىعىستاردىڭ جانە قوعامدىق ءتارتىپتى بۇزۋعا باعىتتالعان وزگە دە ارەكەتتەردىڭ جولىن كەسۋدى تالاپ ەتتى. ول سونداي-اق مۇنداي وقيعالارعا “نولدىك توزىمدىلىك” تانىتۋعا شاقىردى.
قازاقستاندا تىلدىك رەيدتەر جۇرگىزىلگەن بولاتىن. ولاردىڭ بارىسىندا بەلسەندىلەر دۇكەندەر مەن مەملەكەتتىك مەكەمەلەر قىزمەتكەرلەرىنىڭ قازاق ءتىلى ءبىلىمىن تەكسەرىپ، كامەرادا ورىس ءتىلدى ازاماتتاردان كەشىرىم سۇراتقان.
”ادىرنا” ۇلتتىق پورتالى
