ەلىمىز تاۋەلسىزدىك العالى 30 جىل ىشىندە ماڭعىستاۋ وبلىسىندا 11 ملن 333,2 مىڭ شارشى مەتر تۇرعىن ءۇي پايدالانۋعا بەرىلدى. اسىرەسە تۇرعىن ءۇي قۇرىلىسى وبلىس ورتالىعىندا قارقىندى جۇرۋدە. اقتاۋدا سوڭعى بەس جىلدا جاڭا 11 شاعىن اۋدان بوي كوتەردى دەپ حابارلايدى وبلىس اكىمىنىڭ ءباسپاسوز قىزمەتى.
ايتا كەتەيىك، 2021 جىلدىڭ جوسپارى 1,201 شارشى مەتردى قۇرادى. ال بيىلعى 10 ايدىڭ قورىتىندىسى بويىنشا 954 مىڭ شارشى مەتر تۇرعىن ءۇي تاپسىرىلعان.
2020 جىلى «نۇرلى جەر» تۇرعىن ءۇي-كوممۋنالدىق دامىتۋدىڭ 2020-2025 جىلدارعا ارنالعان مەملەكەتتىك باعدارلاماسى اياسىندا جالعا بەرىلەتىن تۇرعىن ءۇي قۇرىلىسىنا جانە ساتىپ الۋعا 2,4 ملرد. تەڭگە ءبولىندى. بۇل قاراجات كولەمى 23,5 مىڭ ش. م. 305 پاتەرلى تۇرعىن ۇيلەردىڭ قۇرىلىسىنا جانە 67 پاتەر ساتىپ الۋعا جۇمسالدى.
اقتاۋ قالاسىنىڭ تۇرعىنى قىلىشباي سامات تا جاڭا پاتەر الدى. ونىڭ ايتۋىنشا، ول «اققۋ-3» تۇرعىن ءۇي كەشەنىندەگى العاشقى پاتەرىن مەملەكەتتىك باعدارلامالارعا سايكەس، «وتباسى بانك» ارقىلى كونكۋرستان ءوتىپ العان. باسپانالى بولعان جاس جىگىت جاقىندا شاڭىراق كوتەرمەك.
بۇدان بولەك «نۇرلى جەر» باعدارلاماسى بويىنشا اقتاۋ قالاسىنىڭ جاڭا شاعىن اۋداندارىندا جاڭادان سالىنعان تۇرعىن ۇيلەردى ينجەنەرلىك جەلىلەرمەن قامتاماسىز ەتۋگە رەسپۋبليكالىق بيۋدجەتتەن 3,2 ملرد. تەڭگە ءبولىندى. قاراجات تولىق يگەرىلگەن.
بيىل «نۇرلى جەر» مەملەكەتتىك باعدارلاماسى اياسىندا 1407 پاتەرلىك تۇرعىن ۇيلەردىڭ قۇرىلىسىن اياقتاۋ جوسپارلانعان.
- قالانىڭ جاڭا شاعىن اۋداندارىندا جەكە قۇرىلىس سالۋشىلاردىڭ قاتىسۋىمەن 100-دەن استام كوپپاتەرلى تۇرعىن ءۇيدىڭ قۇرىلىسى جۇرگىزىلۋدە. ولاردىڭ بەلگىلى ءبىر بولىگى وسى جىلدىڭ سوڭىنا دەيىن پايدالانۋعا بەرىلەدى. ينجەنەرلىك جەلىلەردىڭ قۇرىلىسىنا ۇلتتىق قوردان 4,5 ملرد.تەڭگە ءبولىندى. ورتالىق مەملەكەتتىك ورگاندار 13 جوبانى ىسكە اسىرۋعا كەلىسىم بەردى. بارلىق جوبا جىل سوڭىنا دەيىن اياقتالادى دەپ كۇتىلۋدە، - دەدى ماڭعىستاۋ وبلىسى قۇرىلىس، ساۋلەت جانە قالا قۇرىلىسى باسقارماسى باسشىسىنىڭ مىندەتىن اتقارۋشى اينۇر مانكەشوۆا.
«ادىرنا» ۇلتتىق پورتالى.
