قر دەنساۋلىق ساقتاۋ ۆيتسە-ءمينيسترى اجار عينيات شىمكەنتتەگى مەديتسينالىق مەكەمەلەردى ارالادى، دەپ حابارلايدى قازاقپارات ءتىلشىسى. ۆيتسە-مينيستر قالا اكىمى مۇرات ايتەنوۆپەن بىرگە ىندەتكە قارسى كۇرەستىڭ ناتيجەلەرىن تالقىلاپ سيتۋاتسيالىق شتابتىڭ جۇمىسىمەن تانىستى.
حالىققا كورسەتىلىپ جاتقان مەديتسينالىق كومەك جونىندە جانە مامان تاپشىلىعىن جويۋداعى باستامالار تۋرالى سۇراستىردى. سونىمەن قاتار، ءمينيستردىڭ ورىنباسارى دەنساۋلىق سالاسىنداعى احۋال جونىندە ونلاين-جينالىس وتكىزىپ قاتارداعى قاراپايىم قىزمەتكەرلەردىڭ پىكىرىن ءبىلدى. اجار عينياتتىڭ ايتۋىنشا، شىمكەنتتە 5 اپتانىڭ ىشىندە اۋرۋحانالارداعى ەمدەلۋگە ارنالعان جاتىن ورىنداردىڭ جۇكتەمەسى 60 پايىزعا دەيىن تومەندەگەن. ونىڭ ىشىندەگى جانساقتاۋ بولىمىندەگى ورىندار 66 پايىزعا ازايعان. پاندەمياعا جانە ەنگىزىلگەن قاتاڭ كارانتيندىك شارالارعا بايلانستى دارىگەرلەر ناۋقاستاردىڭ ۇيىنە بارىپ قىزمەت جاسادى. رەسپۋبليكا بويىنشا ءموبيلدى بريگادالاردىڭ سانى 7,6 ەسەگە كوبەيىپ قازىرگى ۋاقىتتا جالپى سانى 3640-تى قۇرادى. شىمەنت قالاسىندا 211 بريگادا جۇمىس ىستەپ تۇر. ءموبيلدى بريگادالار 5 مىڭنان استام حالىقتى قامتىدى. شىمكەنت قالاسى 5,0 كورسەتكىشتى قۇرادى. «ەمحانالاردىڭ، جەدەل-جاردەمنىڭ جانىنان حالىققا كەڭەس بەرەتىن 4040 Call-ورتالىقتار قۇرىلدى. شىمكەنتتە وسىنداي 12 ورتالىق ىسكە قوسىلدى. مەديتسينالىق جەدەل-جاردەمنىڭ تۇنگى اۋىسىمى 2000 بريگاداعا دەيىن ءوستى. دەگەنمەن، قازىر جەدەل-جاردەمگە حابارلاسۋ كورسەتكىشى 62 پايىزعا دەيىن ازايدى. قالا بويىنشا بۇل كورسەتكىش 37 پايىزدى قۇرايدى. وسىدان سوڭ ءمينيستردىڭ ورىنباسارى ىندەت ءورشىپ اۋرۋلار سانى كۇرت كوبەيگەن كەزدە جەدەل سالىنعان ءمودۋلدى ينفەكتسيالىق ستاتسيونار سانالاتىن «قالالىق جۇقپالى اۋرۋلار اۋرۋحاناسىن» ارالاپ شىقتى. 200 ورىنعا شاقتالعان مەكەمەنىڭ جۇمىسىمەن جان-جاقتى تانىستى. قالالىق دەنساۋلىق ساقتاۋ باسقارماسىنىڭ مالىمەتىنشە، COVID-19 قارسى كۇرەستى كۇشەيتۋ ماقساتىندا 26 پروۆيزورلىق ورتالىق جۇمىس ىستەگەن. قازىرگى تاڭدا سونىڭ 19 پايىزى قالدى. ياعني، ۋاقىتشا ەمدەۋ ورىندارىنىڭ جۇكتەمەسى 81 پايىزعا ازايعان. تامىز ايىنان باستاپ مەديتسينالىق مەكەمەلەر قالىپتى جۇمىس رەجيمىنە كوشتى. اتاپ ايتقاندا، ناۋقاستار جوسپارلى ەم قابىلداي الادى.
