ەلىمىزدە ءسان ءۇشىن سالىنعان مەشىتتەر كوبەيىپ، ءبىرازى قاڭىراپ قالعان. ءدىن ىستەرى ءمينيسترى نۇرلان ەرمەكباەۆتىڭ ايتۋىنشا، يمامى جوق، ادام كوپ بارمايتىن بۇل عيماراتتاردى قوجايىندارى ساۋداعا قويىپ جاتىر، دەپ حابارلايدى كتك.
كەي مەشىتتەر ءتىپتى جاماعات سانىنا سايكەس كەلمەيدى دەيدى مينيستر. ونىڭ ۇستىنە، حالىق كوپ جۇرەتىن كوشەنىڭ بويىنا سالىنعان مەشىتتەر مەن شىركەۋلەردىڭ كەيبىرىندە كولىك قوياتىن ورىندارى بولمايدى. داۋىسى قاتتى شىعىپ، قوڭىراۋلارى اينالاداعى تۇرعىنداردىڭ مازاسىن الادى. وسىنى بۇلداپ مينيسترلىككە شاعىمداناتىندار كوبەيگەن. سوندىقتان، عيباداتحانالاردىڭ، اسىرەسە مەشىتتەردىڭ قۇرىلىسىن تارتىپكە كەلتىرەتىن ۋاقىت جەتتى دەيدى ەرمەكباەۆ.
“بۇگىندە ەلىمىزدە 3601 مەشىتتىڭ 84-ءى قاڭىراپ بوس تۇر. بۇل پروتسەستى جۇيەگە كەلتىرۋ ءۇشىن ءدىني عيباداتحانالار سالۋعا رۇقسات بەرەتىن ايقىن ستاندارتتار بولۋى قاجەت. سونىڭ ىشىندە، جاڭادان قۇرىلىس سالۋعا نيەتتى ازاماتتارعا قوسىمشا تالاپتار قويىلۋى مۇمكىن. مىسالى، عيباداتحانا سالۋدىڭ جاڭا ۇلگىلى ەرەجەلەرىن ەنگىزۋ كەرەك”، – دەيدى قر ءدىن ىستەرى جانە ازاماتتىق قوعام ءمينيسترى نۇرلان ەرمەكباەۆ.
قر ءدىن ىستەرى جانە ازاماتتىق قوعام ءمينيسترى نۇرلان ەرمەكباەۆ.
Stan.kz
