ۇكىمەتتىڭ مازاعى: قاراعاندىلىق كوپبالالى انا 122 تەڭگە كولەمىندە ااك العان

3697
Adyrna.kz Telegram

قاراعاندىلىق داريعا قازانعاپوۆا مەملەكەتتەن 122 تەڭگە كولەمىندە اتاۋلى كومەك العان. اكىمدىكتىڭ ايتۋىنشا، ولار كوپبالالى اناعا اقشانى دۇرىس بەرگەن، ەشقانداي قاتەلىك بولماعان، دەپ حابارلايدى "ادىرنا" ۇلتتىق پورتالى orda.kz-كە سىلتەمە جاساپ.

31 ارنانىڭ حابارلاۋىنشا، داريعا قازانعاپوۆا ءتورت بالانىڭ اناسى رەتىندە مەملەكەتتەن اتاۋلى كومەك الادى. جىل باسىندا وعان 125 مىڭ تەڭگە كومەك بەرىلگەن. جازدا داريعا جۇبايىمەن ۇيدە كارتوپ ەگۋدى قولعا العان. شەنەۋنىكتەر ول وتباسىنىڭ تابىسىنا اسەر ەتەدى دەپ، ولارعا جاردەماقى بەرۋدەن باس تارتقان.

داريعا مۇنداي شەشىممەن كەلىسپەي، جاردەماقى الۋعا قايتا ءوتىنىش بىلدىرگەن. جەلتوقسان ايىندا وعان 122 تەڭگە الەۋمەتتىك كومەك بەرىلگەن.

كەلىنشەك ونى كورىپ، ءبىراز تاڭىرقاپ قالعان. ول قاتەلىك شىعار دەپ، الەۋمەتتىك قورعاۋ بولىمىنە بارعان. الايدا، وندا وعان ەشقانداي قاتە كەتپەگەنىن ايتقان.

- ودان دا بەرمەي-اق قويعانى دۇرىس ەدى. 122 تەڭگەمەن ءبىزدى مازاق قىلعانشا، سىزگە وتكاز كەلدى دەپ ايتسا بولاتىن ەدى. ەندى مىنا 122 تەڭگەگە بالا-شاعاما نە نان، نە پامپەرس اپەرە المايمىن. ۇكىمەتتىڭ ناعىز مازاعى ما، نە ەندى بۇل؟ - دەدى اشۋلى داريعا.

اكىمدىكتەگىلەر سوما دۇرىس بەرىلگەنىن ءالى دە العا تارتىپ وتىر. ولاردىڭ ايتۋىنشا، وتباسىنا باسقا دا كومەك بەرىلگەندىكتەن، بازا 120 تەڭگە ەسەپتەپ بەرگەن.

- ايەلدىڭ جولداسى ەڭبەكپەن قامتۋ باعدارلاماسىمەن جۇمىسقا ورنالاستى. سوندىقتان ونىڭ جالاقىسى مەن بالالارعا بەرىلەتىن جورگەكاقىسى بار. سونداي-اق بۇل وتباسى ەكى الەۋمەتتىك جولاقى كارتاسىن قولدانادى. وسى سەبەپتەرگە بايلانىستى 120 تەڭگە اتاۋلى الەۋمەتتىك كومەك تاعايىندالدى. ءار وتباسىنىڭ مۇشەسىنە 20 تەڭگەدەن بەرىلدى، - دەدى قاراعاندى قالاسى الەۋمەتتىك تولەمدەر سەكتورىنىڭ مەڭگەرۋشىسى لاريسا حاريتونوۆا.

"ادىرنا" ۇلتتىق پورتالى
پىكىرلەر