قاراعاندىدا تۇڭعىش رەت الەمدىك دەڭگەيدەگى ءدۇبىرلى دودا وتپەكشى

3409
Adyrna.kz Telegram

قازاقستان ۇستەل تەننيسىنەن «ITTF Kazakhstan International Open-2021» حالىقارالىق ءتۋرنيرىن تۇڭعىش رەت قابىلدايتىن بولدى. ءدۇبىرلى دودا 15-19 قىركۇيەك ارالىعىندا قاراعاندىداعى Saryarka ۇستەل تەننيسىنىڭ جاڭا ورتالىعىندا وتەدى، دەپ حابارلايدى "ادىرنا" ۇلتتىق پورتالىنىڭ ءتىلشىسى. 

جارىسقا اۋستريا، ساۋد ارابياسى، ءۇندىستان، بەلارۋس، رەسەي، وزبەكستان، قىرعىزستان جانە قازاقستان ەلدەرىنەن 70-تەن استام سپورتشى قاتىسادى.

جۇلدە قورى 30 مىڭ اقش دوللارىن قۇرايتىن ايتۋلى جارىس تمد ەلدەرى اۋماعىنداعى حالىقارالىق ۇستەل تەننيسى فەدەراتسياسىنىڭ (ITTF) بيىلعى جىلعى جالعىز رەيتينگتىك ءتۋرنيرى بولماقشى.

- ءبىز Kazakhstan Open ءتۋرنيرىن جىل سايىن وتكىزۋدى جوسپارلاپ وتىرمىز. بۇعان بىلتىر مەملەكەت باسشىسى قاسىم-جومارت كەمەلۇلى توقاەۆ اشقان قاراعاندى تەننيس ورتالىعىنىڭ الەمدىك ستاندارتتارعا سايكەستىگى جانە كەز كەلگەن دەڭگەيدەگى جارىستاردى وتكىزۋگە قابىلەتتى بولۋى مۇمكىندىك بەرەدى، – دەيدى قازاقستان ۇستەل تەننيسى فەدەراتسياسىنىڭ پرەزيدەنتى دانيار ابىلعازين.

فەدەراتسيا مالىمدەمەسىنە سايكەس، قازىرگى ۋاقىتتا ەلىمىزدىڭ جەتى وڭىرىندە دە ۇستەل تەننيسى ورتالىقتارى سالىنۋدا. جالپى اۋماعى ءتورت مىڭ شارشى مەتر بولاتىن Saryarka تەننيس ورتالىعىندا حالىقارالىق ۇستەل تەننيسى فەدەراتسياسىنىڭ بارلىق تەحنيكالىق تالاپتارىنا جاۋاپ بەرەتىن ۇستەلدەر، ويىن جانە جاتتىعۋ زالدارى بار. سونداي-اق، مۇندا كەشەندى دايىندىققا ارنالعان جاتتىعۋ زالدارى، مەديتسينالىق كابينەت، سپورتشىلارعا ارنالعان دەمالىس بولمەلەرى، تورەشىلەر مەن باپكەرلەر بولمەلەرى، كونفەرەنتس-زالدار مەن فۋدكورت قاراستىرىلعان.

ايتا كەتەيىك، اتالعان جارىستا قازاقستان قۇراماسى ساپىندا ەكى بىردەي وليمپيادا ويىندارىنا قاتىسۋشى جانە كوماندا كوشباسشىسى كيريلل گەراسيمەنكو ونەر كورسەتەدى. تەننيس ءتۋرنيرىن Qazsport تەلەارناسى مەن حالىقارالىق ۇستەل تەننيسى فەدەراتسياسىنىڭ رەسمي سايتى تىكەلەي ەفيردە كورسەتەدى.

زارينا اشىربەك،

"ادىرنا" ۇلتتىق پورتالى

 

پىكىرلەر