فوتو: ۆالەري بۋگاەۆ
پاۆلودار ۇلتتىق سپورت باعىتىنداعى ەڭ اۋقىمدى ءىس-شارانىڭ ورتالىعىنا اينالدى. وبلىس ورتالىعىندا ايماق باسشىسى اسايىن بايحانوۆتىڭ قولداۋىمەن بوي كوتەرگەن جاڭا يپپودرومنىڭ سالتاناتتى اشىلۋى ءوتىپ، كلاسسيكالىق جانە ۇلتتىق ات جارىستارى بويىنشا «ERTIS-BAYAN CUP» اشىق رەسپۋبليكالىق ءتۋرنيرى ءوتتى. اۋقىمدى دوداعا قازاقستاننىڭ تۇكپىر-تۇكپىرىنەن، سونداي-اق رەسەي مەن قىرعىزستاننان كەلگەن ۇزدىك شاباندوزدار مەن جۇيرىك تۇلپارلار قاتىستى.
جاڭا سپورت نىسانى مەملەكەت باسشىسى قاسىم-جومارت توقاەۆتىڭ بۇقارالىق سپورتتى دامىتۋ جانە ۇلتتىق سپورت تۇرلەرىن قولداۋ جونىندەگى تاپسىرمالارىن ىسكە اسىرۋ اياسىندا بوي كوتەردى.
بايگەنىڭ سالتاناتتى اشىلۋ راسىمىنە قاتىسقان پاۆلودار وبلىسىنىڭ اكىمى اسايىن بايحانوۆ جۇرتشىلىقتى قۇتتىقتاپ، شاباندوزدارعا ساتتىلىك تىلەدى. قازاقتىڭ اقجولتاي داستۇرىنە ساي جىلقى جالىنا بايلانعان تاسپانى شەشىپ، جاس شاباندوزعا قامشى سىيلادى.
جاڭا يپپودروم حالىقارالىق تالاپتارعا ساي جابدىقتالعان. مۇندا مىڭ كورەرمەنگە ارنالعان ەكى تريبۋنا، اۆتوتۇراقتار، ساۋدا ورىندارى، قوناقتارعا قىزمەت كورسەتۋ ايماقتارى، 20 ورىندى اتقورا جانە جاتتىعۋ الاڭدارى قاراستىرىلعان. ەنى 20 مەتر، ۇزىندىعى 2000 مەترگە سوزىلعان نەگىزگى جارىس جولى زاماناۋي سۋارۋ جۇيەسىمەن قامتاماسىز ەتىلگەن. سونىمەن قاتار 800 مەتردەن 2000 مەترگە دەيىنگى قاشىقتىقتاعى بايگەلەرگە ارنالعان مارە الاڭدارى مەن اتتاردى دايىنداۋعا ارنالعان ارنايى جاتتىعۋ جولى سالىنعان. يپپودروم اۋماعى اباتتاندىرىلىپ، كوگالداندىرىلعان.
«ERTIS-BAYAN CUP» تۋرنيرىندە كورەرمەندەر كلاسسيكالىق بايگە تۇرلەرى مەن عاسىرلار بويى قازاق حالقىنىڭ مادەنيەتى مەن تاريحىنىڭ اجىراماس بولىگى بولىپ كەلە جاتقان ۇلتتىق ات جارىستارىنىڭ تارتىستى باسەكەسىنە كۋا بولدى. جارىس باعدارلاماسىنا 1200, 2000 جانە 2400 مەتر قاشىقتىقتاعى كلاسسيكالىق بايگەلەر ەنگىزىلدى. اسىرەسە، 8 كم «قۇنان بايگە» مەن 18 كم «الامان بايگە» كوپشىلىكتىڭ ەرەكشە قىزىعۋشىلىعىن تۋدىردى. تارتىسقا تولى جارىستاردا جۇيرىكتەردىڭ شابىسى مەن شاباندوزداردىڭ شەبەرلىگى جوعارى دەڭگەيدە كورىنىس تاپتى. سونداي-اق پاۆلودارلىق سەلەكتسيادان شىققان جىلقىلار اراسىندا وتكەن ارنايى جارىسقا دا ەرەكشە نازار اۋدارىلدى.
حالىقارالىق دەڭگەيدەگى ءتۋرنيردىڭ جۇلدە قورى دا قوماقتى بولدى. نەگىزگى بايگەلەردىڭ جەڭىمپازدارىنا التى اۆتوكولىك تابىستالىپ، جۇلدەگەرلەر قوماقتى اقشالاي سىياقىلارمەن ماراپاتتالدى. سونىمەن قاتار مەرەكە اياسىندا ابسوليۋتتىك سالماق دارەجەسى بويىنشا قازاق كۇرەسىنەن بەلدەسۋلەر ءوتىپ، «تۇيە پالۋان» اتانعان سپورتشىعا اۆتوكولىك سىيعا بەرىلدى.
ۇيىمداستىرۋشىلار قوناقتارعا مازمۇندى مادەني-ويىن-ساۋىق باعدارلاماسىن ۇسىندى. قوناقتار قازاقى تازى يتتەرىنىڭ كورمەسىن تاماشالاپ، بۇركىتشىلەردىڭ ونەرىن كوردى. الەمدىك كينويندۋستريادا كەڭىنەن تانىلعان حالىقارالىق «Nomad» كاسكادەرلەر توبى ارنايى شوۋ ۇسىنىپ، كورەرمەندەردىڭ زور ىقىلاسىنا بولەندى.
وتباسىلىق دەمالىس ءۇشىن ارنايى ايماقتار ۇيىمداستىرىلىپ، بالالارعا ارنالعان ويىن-ساۋىق باعدارلامالارى وتكىزىلدى. سونداي-اق باعالى سىيلىقتار ويناتىلعان لوتەرەيا وتكىزىلىپ، قاتىسۋشىلار ءتۇرلى گادجەتتەر، ۆەلوسيپەدتەر جانە تۇرمىستىق تەحنيكا ۇتىپ الۋ مۇمكىندىگىنە يە بولدى.
مەرەكەلىك شارانىڭ كوركىن قازاقستاندىق تانىمال «ابىروي» جانە «جوشى» توپتارىنىڭ كونتسەرتى ودان ءارى قىزدىرا ءتۇستى. بۇدان بولەك، ءىس-شارا ارىسىندا گولليۆۋدتا اتوي سالىپ جۇرگەن قازاقستاندىق “Nomad” كاسكادەرلار توبىنىڭ ونەرىيدە جۇرتشىلىقتى ءتانتى ەتتى. ونەرپازداردىڭ اسەرلى اندەرى مەن كوتەرىڭكى كوڭىل كۇي سىيلاعان باعدارلاماسى پاۆلودارداعى ات سپورتى مەرەكەسىنىڭ جارقىن قورىتىندىسىنا اينالدى.
